ЁШЛАР ТАРБИЯСИГА ҲАММАМИЗ МАСЪУЛМИЗ
Мамлакатимизда олиб борилган кузатувлар натижасида аниқланишича, жами аҳолининг китоб ўқиш даражаси тўрт-тўрт ярим фоизни, телевизор кўриш даражаси эса тўқсон фоиздан юқорини ташкил этар экан. Шу маълумотнинг ўзиёқ бизнинг ўз маънавиятимизни юксалтиришга эътиборимиз нечоғлик эканлигини кўрсатиб турибди. Тўғри, бугунги глобаллашув жараёнида аҳолининг кундалик ахборотга бўлган эҳтиёжи тобора ортмоқда. Телевидение бу борада етакчи ўринда туради. Бироқ телеканалларда, айниқса хорижий телеканалларда намойиш этиладиган кўрсатувларнинг ҳаммаси ҳам кишининг руҳий озиқ олишига, маънавий юксалишига хизмат қилади, дея олмаймиз.
Шу боисдан-да кейинги йилларда билим булоғи, маънавият сарчашмаси бўлган китобларга кенг омманинг эътиборини жалб қилишга, китоб ўқишнинг аҳамиятини тарғиб этишга улкан эътибор қаратилаяпти. Ҳар йили китоб сайллари, байрамлар ўтказилаётганлиги ҳам бежиз эмас.
Китоблар инсоннинг етук шахс сифатида шаклланишига, ҳаётда ўз ўрнини топишига беғараз кўмак берувчи манбадир.
Афсуски буни қадрламай, бугунги тезкор замонда билими саёз, тартиб-интизоми, илм олиши ўз вақтида назорат қилинмаганлиги туфайли вақтини бемақсад ўтказадиган ёшлар ҳам учраб туради.
Мамлакатимизда истиқлол йилларида қўлга киритилаётган тезкор ривожланишларни, юксалишларни кўролмаётган, элимизнинг тинчлигига раҳна солишга уринаётган манфур кучлар – экстремистик гуруҳлар ана шундай – ҳаётда ўз олдига орзу-мақсад қўймаган, келажаги сари интилмайдиган лекин шоҳона яшашни орзу қиладиган ёшларни ўз гирдобига тортиб, онгини заҳарлаётгани, тинчлигимизга таҳдид солишга уринаётгани ғоят ачинарлидир. Бу ёшлар онгида бўшлиқнинг мавжудлиги нақадар аянчли оқибатларга олиб келиши мумкинлигини бизга доимо эслатиб туради.
Туман фуқаролик ҳолатлари далолатномаларини ёзиш бўлими ходимлари ҳам ёшлар маънавиятини юксалтиришга, ҳуқуқий билимларини оширишга ҳисса қўшиш мақсадида таълим муассасалари ўқувчилари билан давра суҳбатлари, учрашувлар ўтказмоқда. Тадбирларда вояга етмаганлар орасида ҳуқуқбузарликларнинг олдини олишга оид маърузалар ўқилмоқда, эрта турмуш қуришнинг салбий оқибатлари, соғлом оилани барпо қилиш йўл-йўриқлари кенг тушунтирилмоқда. Чунки таълим-тарбия, ёшлар камолига ҳисса қўшиш барчамизнинг ишимиздир.
М.ПРИМБЕТОВА,
туман ФҲДЁ бўлими ходими.
(http://navoiy.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
