YoShLAR TARBIYaSIGA HAMMAMIZ MASʼULMIZ

Mamlakatimizda olib borilgan kuzatuvlar natijasida aniqlanishicha, jami aholining  kitob oʻqish darajasi toʻrt-toʻrt  yarim foizni, televizor koʻrish darajasi esa toʻqson foizdan yuqorini tashkil etar ekan. Shu maʼlumotning oʻziyoq bizning oʻz maʼnaviyatimizni yuksaltirishga eʼtiborimiz nechogʻlik ekanligini koʻrsatib turibdi. Toʻgʻri, bugungi globallashuv jarayonida aholining kundalik axborotga boʻlgan ehtiyoji tobora ortmoqda. Televideniye bu borada yetakchi oʻrinda turadi. Biroq telekanallarda, ayniqsa xorijiy telekanallarda namoyish etiladigan koʻrsatuvlarning hammasi ham kishining ruhiy oziq olishiga, maʼnaviy yuksalishiga xizmat qiladi, deya olmaymiz.

Shu boisdan-da keyingi yillarda bilim bulogʻi, maʼnaviyat sarchashmasi boʻlgan kitoblarga keng ommaning  eʼtiborini jalb qilishga, kitob oʻqishning ahamiyatini targʻib etishga ulkan eʼtibor qaratilayapti. Har yili  kitob sayllari, bayramlar oʻtkazilayotganligi ham bejiz emas.

Kitoblar insonning  yetuk shaxs sifatida shakllanishiga, hayotda oʻz oʻrnini topishiga begʻaraz koʻmak beruvchi manbadir.

Afsuski buni qadrlamay, bugungi tezkor zamonda bilimi sayoz, tartib-intizomi, ilm olishi oʻz vaqtida nazorat qilinmaganligi tufayli vaqtini bemaqsad oʻtkazadigan yoshlar ham uchrab turadi.

Mamlakatimizda istiqlol yillarida qoʻlga kiritilayotgan tezkor rivojlanishlarni, yuksalishlarni koʻrolmayotgan, elimizning tinchligiga rahna solishga urinayotgan manfur kuchlar – ekstremistik guruhlar ana shunday – hayotda oʻz oldiga orzu-maqsad qoʻymagan, kelajagi sari intilmaydigan lekin shohona yashashni orzu qiladigan yoshlarni oʻz girdobiga tortib, ongini zaharlayotgani, tinchligimizga tahdid solishga urinayotgani gʻoyat achinarlidir. Bu yoshlar ongida boʻshliqning mavjudligi naqadar ayanchli oqibatlarga olib kelishi mumkinligini bizga doimo eslatib turadi.

Tuman fuqarolik holatlari dalolatnomalarini yozish boʻlimi xodimlari ham yoshlar maʼnaviyatini yuksaltirishga, huquqiy bilimlarini oshirishga hissa qoʻshish maqsadida taʼlim muassasalari oʻquvchilari bilan davra suhbatlari, uchrashuvlar oʻtkazmoqda. Tadbirlarda voyaga yetmaganlar orasida huquqbuzarliklarning oldini olishga oid maʼruzalar oʻqilmoqda, erta turmush qurishning salbiy oqibatlari, sogʻlom oilani barpo qilish yoʻl-yoʻriqlari keng tushuntirilmoqda. Chunki taʼlim-tarbiya, yoshlar kamoliga hissa qoʻshish barchamizning ishimizdir.

M.PRIMBETOVA,

tuman FHDYo boʻlimi xodimi.

(http://navoiy.uz)