"Обод турмуш йили" янгиликлари

КОЛЛЕЖ ЎҚУВЧИЛАРИ УЧУН ОРОМГОҲ

"Дўрман” қишлоқ хўжалик ва касб-ҳунар коллежида ўқувчиларнинг ёзги таътилда дам олишини ташкил этишга алоҳида эътибор берилмоқда. Шу мақсадда коллеж ётоқхонасини ўқувчилар оромгоҳига айлантириш юзасидан тайёргарлик ишлари олиб борилмоқда.

Ёзги таътил бошланиши билан ушбу оромгоҳ 100 нафар ўқувчини ўз бағрига олади. Таътил давомида бу ерда 300 нафар ўқувчи мириқиб дам олиш, спорт ўйинлари билан шуғулланиш имкониятига эга бўлишади.

БАЛЛИ, ҚИЗЛАР!

Яқинда Манғит иқтисодиёт касб-ҳунар коллежида таълим олаётган қизлар ўртасида "Балли, қизлар!” кўрик-танлови ўтказилди.

Кўрик-танловда коллежнинг биринчи босқич талабалари фаол иштирок этишиб, ғолибликни қўлга киритишди.

Коллежнинг биринчи босқич талабаларидан Меҳрибон Турсунбоева биринчи ўринни, Шаҳноза Холмуродова иккинчи ўринни ва Шаҳло Холбоева учинчи ўринни эгаллашга муваффақ бўлишди.

Кўрик-танлов ғолиблари бўлган бу эпчил ва зукко қизлар коллеж маъмуриятининг фахрий ёрлиқлари ва қимматбаҳо совғалари билан тақдирландилар.

ЁШ СПОРТЧИЛАР ЮТУҒИ

Шу йилнинг 15-16 май кунлари Нукус шаҳрида 1997-2005 йилларда туғилган спортчилар ўртасида спортнинг стол тенниси ва теннис ўйинлари бўйича Қорақалпоғистон Республикаси биринчилиги учун мусобақалар ўтказилди.

Ушбу спорт мусобақаларида Манғит шаҳридаги 1-сонли болалар ва ўсмирлар спорт мактаби ёш спортчилари фаол иштирок этишди.

Стол тенниси мусобақасида Марина Камлова ва Муҳриддин Ражабовлар биринчи ўринни, теннис бўйича ўтказилган мусобақаларда Бониёр Собиров 1-ўринни, Дилшод Каримов 2-ўринни эгаллашга муваффақ бўлдилар.

Ёш спортчиларимизнинг бу ютуқларида стол теннис бўийча мураббийи Хурсанд Ражабов ва теннис бўйича мураббий Баҳром Соатовларнинг ҳиссалари катта бўлди.