АСКАР ҚАСАМИ

Ватан, сарҳадларинг омон бўлсин, деб,

Мевазор боғларинг ларзон бўлсин, деб,

Фарзанди жонларинг соғлом бўлсин, деб,

Сенга юққан гардни олмоққа шайман -

Тинчликка қасамёд қилиб яшайман!

Илм иста укажон, ҳикмат – илмда,

Билгилки, илм-ирфон - қисмат элимга,

Боқ ҳар тараф, ўғлон, ҳаёт йўлингда

Бўлса неки ғовларни олмоққа шайман -

Соғликка қасамёд қилиб яшайман!

Бир юз ўттиз олти миллат боласи,

Йўқдир ҳеч кам-кўсти, озод дунёси,

Ҳар бирининг дўсти тенглик навоси.

Аҳил элим, дея меҳрим тўшайман -

Тотувликка қасам билан яшайман!

Ой кўкка ўрлайди, тунлар фараҳли,

Дил шодон куйлайди, неча  фарсаҳли

Ватан кенгликларин кезган маҳали,

Висолга ошиққан кўнгилда найман -

Пок ишққа қасамёд қилиб яшайман!

Тарих қаддин тутиб, сўзлаб турибди,

Балки дардин ютиб, бўзлаб турибди,

Зарди жондан ўтиб, тузлаб турибди,

Ватан! Дардинг ювиб ўтгувчи сойман -

Ҳурликка қасамёд қилиб яшайман!

Авлодлар Истиқбол томон юрдилар,

Кулиб бахт-у иқбол, жавлон урдилар,

Улуғ Жалолиддин Мангубердилар,

Темурий ўғлонлар бошида ойман -

Қуёшингга қасам билан яшайман!

Ватан, ҳар гўшангда бахтни кўрмоқ-чун

Ва мангу осуда Вақтни кўрмоқ-чун,

Ҳурликнинг энг улуғ тахтин қурмоқ-чун,

Метин қалқон ўзим, камон-у ёйман -

Бахтингга қасамёд қилиб яшайман!

Онажон, дедим мен, тупроғинг ўпдим.

Туғингни тутдим мен, байроғинг ўпдим,

Мен ким Аскар ўғлинг, пойингга чўкдим,

Ўзбекистон! Жоним бермоққа шайман,

Келажакка қасам билан яшайман!

Робия ЙЎЛДОШЕВА.