ASKAR QASAMI

Vatan, sarhadlaring omon boʻlsin, deb,

Mevazor bogʻlaring larzon boʻlsin, deb,

Farzandi jonlaring sogʻlom boʻlsin, deb,

Senga yuqqan gardni olmoqqa shayman -

Tinchlikka qasamyod qilib yashayman!

Ilm ista ukajon, hikmat – ilmda,

Bilgilki, ilm-irfon - qismat elimga,

Boq har taraf, oʻgʻlon, hayot yoʻlingda

Boʻlsa neki gʻovlarni olmoqqa shayman -

Sogʻlikka qasamyod qilib yashayman!

Bir yuz oʻttiz olti millat bolasi,

Yoʻqdir hech kam-koʻsti, ozod dunyosi,

Har birining doʻsti tenglik navosi.

Ahil elim, deya mehrim toʻshayman -

Totuvlikka qasam bilan yashayman!

Oy koʻkka oʻrlaydi, tunlar farahli,

Dil shodon kuylaydi, necha  farsahli

Vatan kengliklarin kezgan mahali,

Visolga oshiqqan koʻngilda nayman -

Pok ishqqa qasamyod qilib yashayman!

Tarix qaddin tutib, soʻzlab turibdi,

Balki dardin yutib, boʻzlab turibdi,

Zardi jondan oʻtib, tuzlab turibdi,

Vatan! Darding yuvib oʻtguvchi soyman -

Hurlikka qasamyod qilib yashayman!

Avlodlar Istiqbol tomon yurdilar,

Kulib baxt-u iqbol, javlon urdilar,

Ulugʻ Jaloliddin Manguberdilar,

Temuriy oʻgʻlonlar boshida oyman -

Quyoshingga qasam bilan yashayman!

Vatan, har goʻshangda baxtni koʻrmoq-chun

Va mangu osuda Vaqtni koʻrmoq-chun,

Hurlikning eng ulugʻ taxtin qurmoq-chun,

Metin qalqon oʻzim, kamon-u yoyman -

Baxtingga qasamyod qilib yashayman!

Onajon, dedim men, tuprogʻing oʻpdim.

Tugʻingni tutdim men, bayrogʻing oʻpdim,

Men kim Askar oʻgʻling, poyingga choʻkdim,

Oʻzbekiston! Jonim bermoqqa shayman,

Kelajakka qasam bilan yashayman!

Robiya YOʻLDOShEVA.