ЧЕКСИЗ МИННАТДОРМИЗ

Мустақиллик йилларида мамлакатимизда кичик бизнес ва хусусий тадбиркорлик ҳаракатини ривожлантиришга алоҳида эътибор берилди. Натижада мамлакатимизда тадбиркорлик кенг ривож топди, у барқарор иқтисодий тараққиётимизнинг омили сифатида намоён бўлди.

Мамлакатимизда тадбиркорликни қўллаб-қувватлаш, унинг ҳуқуқий ҳимоясини кучайтириш юзасидан бир қанча ишлар амалга оширилди.

Илгари биз бирор бир иш юзасидан давлат идораларига борганимизда у ерларда биздан солиқ ва коммунал тўловлардан қарзимиз бор-йўқлиги ҳақидаги маълумотномалар, тадбиркорлик субъекти таъсис хужжатлари, лицензиялар ва рухсат берувчи тусдаги хужжатлар нусхаларини талаб қилишарди.

Ўзбекистон Республикаси Вазирлар Маҳкамасининг 2014 йилнинг 31 декабридаги "Тадбиркорлик субъектларига давлат хизматлари кўрсатиш тартибини янада такомиллаштириш чора-тадбирлари тўғрисида”ги 377-сонли қарори бундай оворагарчиликларга чек қўйди.

Муҳтарам Президентимиз томонидан 2015 йилнинг 15 майида қабул қилинган "Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги Фармони ва бу муҳим ҳужжат асосида қабул қилинган Ўзбекистон Республикаси Қонуни бизнинг ҳуқуқий ҳимоямизни янада кучайтирди.

Ушбу Қонун асосида тадбиркорлик субъектларининг фаолиятини текшириш ва молия-хўжалик фаолиятини тафтиш қилиш тартибини бузганлик учун жавобгарлик ҳам кучайтирилди. Бу борада Ўзбекистон Республикасининг маъмурий жавобгарлик тўғрисидаги кодекси ва Жиноят кодексига қатор ўзгартишлар киритилди. Эндиликда бу масалалар бўйича айбдор деб топилган шахслар энг кам ойлик иш ҳақининг бир юз эллик бараваридан уч юз бараваригача миқдорда жарима ёки уч йилгача муайян ҳуқуқдан маҳрум қилиш ёхуд уч йилгача ахлоқ тузатиш ишлари билан жазоланади.

Тадбиркорлик соҳасида бундай текширишларни камайтириш, уларни қатъий тартибга солиш тадбиркорларнинг вақтини беҳуда олиш, кайфиятига салбий таъсир кўрсатиш каби ҳолатларга барҳам беради ва уларнинг самарали фаолият юритиши учун янада кўпроқ имконият яратади.

Мен оддий бир ҳунарманд сифатида тадбиркорларга берилаётган имтиёзлар ҳақида уларнинг ҳуқуқий ҳимоясини кучайтириш мақсадида олиб борилаётган ишлар тўғрисида оммавий ахборот воситалари орқали берилаётган хабарларни, президентимиз Фармон ва Қарорлари, шунингдек ҳукуматимиз қарорларини доимий равишда кузатиб бораман.

Бу соҳадаги ҳар бир янгиликка дуч келганимда мени доимо муҳтарам юртбошимизга, ҳукуматимизга, мустақил Ватанимизга бўлган миннатдорлик ҳисси чулғаб олади.