ChEKSIZ MINNATDORMIZ

Mustaqillik yillarida mamlakatimizda kichik biznes va xususiy tadbirkorlik harakatini rivojlantirishga alohida eʼtibor berildi. Natijada mamlakatimizda tadbirkorlik keng rivoj topdi, u barqaror iqtisodiy taraqqiyotimizning omili sifatida namoyon boʻldi.

Mamlakatimizda tadbirkorlikni qoʻllab-quvvatlash, uning huquqiy himoyasini kuchaytirish yuzasidan bir qancha ishlar amalga oshirildi.

Ilgari biz biror bir ish yuzasidan davlat idoralariga borganimizda u yerlarda bizdan soliq va kommunal toʻlovlardan qarzimiz bor-yoʻqligi haqidagi maʼlumotnomalar, tadbirkorlik subʼekti taʼsis xujjatlari, litsenziyalar va ruxsat beruvchi tusdagi xujjatlar nusxalarini talab qilishardi.

Oʻzbekiston Respublikasi Vazirlar Mahkamasining 2014-yilning 31-dekabridagi "Tadbirkorlik subʼektlariga davlat xizmatlari koʻrsatish tartibini yanada takomillashtirish chora-tadbirlari toʻgʻrisida”gi 377-sonli qarori bunday ovoragarchiliklarga chek qoʻydi.

Muhtaram Prezidentimiz tomonidan 2015-yilning 15-mayida qabul qilingan "Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari toʻgʻrisida”gi Farmoni va bu muhim hujjat asosida qabul qilingan Oʻzbekiston Respublikasi Qonuni bizning huquqiy himoyamizni yanada kuchaytirdi.

Ushbu Qonun asosida tadbirkorlik subʼektlarining faoliyatini tekshirish va moliya-xoʻjalik faoliyatini taftish qilish tartibini buzganlik uchun javobgarlik ham kuchaytirildi. Bu borada Oʻzbekiston Respublikasining maʼmuriy javobgarlik toʻgʻrisidagi kodeksi va Jinoyat kodeksiga qator oʻzgartishlar kiritildi. Endilikda bu masalalar boʻyicha aybdor deb topilgan shaxslar eng kam oylik ish haqining bir yuz ellik baravaridan uch yuz baravarigacha miqdorda jarima yoki uch yilgacha muayyan huquqdan mahrum qilish yoxud uch yilgacha axloq tuzatish ishlari bilan jazolanadi.

Tadbirkorlik sohasida bunday tekshirishlarni kamaytirish, ularni qatʼiy tartibga solish tadbirkorlarning vaqtini behuda olish, kayfiyatiga salbiy taʼsir koʻrsatish kabi holatlarga barham beradi va ularning samarali faoliyat yuritishi uchun yanada koʻproq imkoniyat yaratadi.

Men oddiy bir hunarmand sifatida tadbirkorlarga berilayotgan imtiyozlar haqida ularning huquqiy himoyasini kuchaytirish maqsadida olib borilayotgan ishlar toʻgʻrisida ommaviy axborot vositalari orqali berilayotgan xabarlarni, prezidentimiz Farmon va Qarorlari, shuningdek hukumatimiz qarorlarini doimiy ravishda kuzatib boraman.

Bu sohadagi har bir yangilikka duch kelganimda meni doimo muhtaram yurtboshimizga, hukumatimizga, mustaqil Vatanimizga boʻlgan minnatdorlik hissi chulgʻab oladi.