IMKONIYaTI ChEKLANGAN, LEKIN IMKONLARI ChEKSIZ INSONLAR DOIMO EʼTIBORIMIZDA

Oʻzbekiston Respublikasi Nogironlar jamiyati Amudaryo tuman boʻlinmasi tomonidan tumanda istiqomat qiluvchi imkoniyati cheklangan, nogironligi bor boʻlgan insonlarga mehr-muruvvat koʻrsatish, ular hayotiga oid muammolar yechimini topishda koʻmaklashish maqsadida tez-tez xonadonlariga borib, holidan xabar olinmoqda. Xususan, Oq-oltin OFY hokim yordamchisi bilan birgalikda ovulda yashovchi fuqaro, 1-guruh nogironi Oʻrinboy Shomuratov oilasiga borib, homiy tadbirkor D.Xaytbayeva tomonidan taqdim qilingan oziq-ovqat mahsulotlari yetkazib berildi. Oʻ.Shomuratov oila aʼzolari bilan suhbat oʻtkazilib, ularning kasb-hunarga qiziqishi oʻrganib chiqildi va salohiyatiga yarasha hunarmandchilik bilan shugʻulanish takliflari berildi. Koʻngli kemtik, imkoniyati cheklangan fuqarolarning kayfiyatini koʻtarish maqsadida sobiq afgʻonchi jangchilar ishtirokida “Vatan sevgisi - iymon belgisi” deb nomlangan tadbir oʻtkazilib, unda 15 nafar imkoniyati cheklangan yoshlarimiz ishtirok etishdi.

Mazkur tadbirga Qoraqalpogʻiston Respublikasi nogironlar jamiyati raisi P. Dauletyarova, Nukus shahri nogironlar jamiyati raisi G.Toshboyeva, Qoraqalpogʻiston Respublikasi nogironlar jamiyati mutaxassisi R.Shinibayeva, Amudaryo tuman oila va xotin-qizlar boʻlimi raisi G.Saburova va boshqa masʼullar ishtirok etishdi.

Tadbir davomida saxovatpesha homiy tadbirkorlar D.Haytboyeva va B.Xalbayevalar tomonidan fayzli dasturxon yozildi va shirinliklar tortilib, sovgʻalar ulashildi.

Jamiyatimiz aʼzolari uchun 8-mart – Xalqaro xotin-qizlar kuni, Navroʻz – umumxalq bayrami har yili yanada zavqli va taassurotlarga boy tarzda oʻtadi. Mehr-oqibat, saxovat va muruvvat bayramining totli taomi – sumalak pishirilib, bahoriy taomlar tayyorlanadi. 2023-yilgi bahor bayramlari ham yanada zavqli taassurotlarga boy, shodiyonalik bilan nishonlandi.

Jamiyatimiz aʼzolari mamlakat hayotidagi muhim siyosiy jarayonlarda ham doimo faol. Konstituttsiyamizga oʻzgartirish kiritish boʻyicha oʻtkazilgan ijtimoiy-siyosiy tadbirlarda va referendumda faol ishtirok etishdi. Xususan, 2023-yilning 30-aprel sanasida Qoraqalpogʻiston Respublikasi miqyosida oʻtkazilgan “Konstitutsiya – kelajagimiz kafili” deb nomlangan tadbirda jamiyatimizning qoʻli gul chevarlari tomonidan qoʻl mehnati mahsulotlari koʻrgazmasi tashkil etildi.

Jamiyatimiz aʼzolarini yaxshi kunlarda eslash doimo anʼanaga aylangan. Turli bayram sanalari munosabati bilan Beshtom MFY, Kuyukoʻpir OFY, Qipchoq ShFY, Durunki, Yangiobod, Oybek nomli, Boyovul MFY larda yashovchi 15 nafar imkoniyati cheklangan fuqarolar holidan xabar olindi.

Shuningdek, Amudaryo tuman hokimligi, Maktabgacha va maktab taʼlimi boʻlimi bilan birgalikda 1-iyun - Xalqaro bolalarni himoya qilish kuni munosabati bilan 30 nafar imkoniyati cheklangan, nogironligi bor bolajonlar oʻrtasida “Maftunkor ranglar jilosi” deb nomlangan rasm chizish boʻyicha koʻrik-tanlovi boʻlib oʻtdi. Tadbir davomida tadbirning bosh homiysi, D.Xaytbayeva va saxovatli insonlardan I.Olimov, E.Kazakov, D.Rahimovlar, bolajonlarni sovgʻalar, shirinliklar va muzqaymoq bilan siyladilar .

Tadbir yakunida 1-oʻrin 21-sonli oʻrta taʼlim maktabi oʻquvchisi Ruxshona Fayzullayevaga, 2-oʻrin 28-sonli oʻrta taʼlim maktabi oʻquvchisi Behruzbek Yuldoshboyevlarga nasib etdi va ular 2023-yil 2-iyun sanasida Nukus shahrida Adliya Vazirligi bilan birgalikda oʻtkazilgan “Rang-barang buyoqlar” deb nomlangan koʻrik-tanlovida muvaffaqiyatli ishtirok etib qaytdilar.

Joriy yilning 9-iyul sanasida esa jamiyatimiz aʼzolari Oʻzbekiston Respublikasi Prezidenti saylovida katta shodiyonalik bilan ishtirok etdilar.

Imkoniyati cheklangan, nogironligi bor bolajonlar oʻrtasida sport oʻyinlari shashka-shaxmat boʻyicha doʻstona musobaqalar ham reja asosida oʻtkazib boriladi.

Shuningdek, saxovatpesha insonlar tomonidan kundalik oziq-ovqat mahsulotlari yordam paketlari tumanimizning barcha hududlaridagi imkoniyati cheklangan fuqarolarga, nogironligi boʻlgan bolajonlarga muntazam ravishda yetkazib beriladi. Zero, bir gʻarib koʻngilni shod etish, Kaʼbani obod qilmoq bilan barobar, deydilar.

Bizning maqsadimiz ham hamisha ezgu, jamiyat aʼzolarning oʻz hayotlaridan rozi yashashlariga koʻmaklashishdir.

N.Xolboyeva, Oʻzbekiston Nogironlar jamiyati Amudaryo tuman boʻlinmasi raisi.