7 апрель — Бутунжаҳон саломатлик куни

Инсон ҳаётидаги энг олий қадрият, ҳеч қандай бойликка алмаштириб бўлмайдиган бебаҳо неъмат — бу, шубҳасиз, саломатликдир. Ер юзидаги ҳар бир давлат, ҳар бир жамият ўзининг келажагини соғлом ва баркамол авлодсиз тасаввур қила олмайди. Шу боисдан ҳам, бутун дунёда аҳоли саломатлигини муҳофаза қилиш, тиббий хизмат сифатини ошириш ва касалликларнинг олдини олиш энг устувор вазифалар қаторига киради. Бугунги кунда глобал миқёсда кенг нишонланаётган 7 апрель — Бутунжаҳон саломатлик куни ҳам айнан шу эзгу мақсадларга хизмат қилувчи, инсониятни ўз соғлиғига эътиборли бўлишга ундовчи муҳим саналардан биридир.

Тарих саҳифаларига назар ташлайдиган бўлсак, бундан роппа-роса етмиш саккиз йил муқаддам, яъни 1948 йилнинг 7 апрель куни Жаҳон соғлиқни сақлаш ташкилотига асос солинди. Ўша тарихий кун шарафига ҳар йили 7 апрель – Бутунжаҳон саломатлик куни сифатида дунё бўйлаб кенг нишонланади. Ўзбекистон 1992 йилнинг 25 май санасидан бошлаб ушбу йирик халқаро ташкилотнинг тўлақонли аъзоси ҳисобланади.

Жорий йилда мазкур халқаро сана «Менинг соғлигим — менинг ҳуқуқим» шиори остида дунё бўйлаб кенг нишонланмоқда. Сана муносабати билан Амударё туман тиббиёт бирлашмасининг бир гуруҳ фаол ходимлари иштирокида 7 апрель куни тиббиёт бирлашмасининг очиқ майдончасида эрталабки бадантарбия машқлари ҳамда фаол юриш машғулотлари ташкил этилди. Мазкур соғломлаштириш тадбирида тиббиёт ходимлари фаол иштирок этиб, ўз ҳаракатлари билан кенг жамоатчиликка чинакам ўрнак ва ибрат намунасини кўрсатиб бердилар.

Машғулотлардан сўнг, ушбу муҳим сана муносабати билан тиббиёт ходимлари иштирокида кенгайтирилган йиғилиш бўлиб ўтди. Йиғилиш давомида сўзга чиққан тажрибали шифокор Жумабой Явкашев йиғилганлар эътиборини бугунги куннинг энг долзарб тиббий ва ижтимоий масалаларига қаратди. У ўз нутқида аҳоли орасида соғлом турмуш тарзини кенг ва таъсирчан усулларда тарғиб қилиш, одамларни мунтазам жисмоний фаолликка чорлашнинг беқиёс аҳамияти ҳақида тўхталиб ўтди.

Айниқса, турли зарарли одатлар ва гиёҳвандликдек мудҳиш иллатлардан аҳолини, энг аввало ёшларни асраш, турли касалликлар тарқалишининг олдини олиш борасидаги тарғибот тадбирларини кучайтириш кераклиги алоҳида қайд қилинди. Бунинг учун эса тиббиёт ходимлари оммавий ахборот воситалари ҳамда ижтимоий тармоқларда янада фаол бўлишлари, аҳолига тўғри ва ишончли тиббий маслаҳатларни доимий равишда етказиб беришлари зарурлиги таъкидланди.

Муҳокамалар жараёнида малакали шифокорлар Ўктам Канжаев, Олимбой Шамуратов, Гавҳар Хўжаметова ҳамда тиббиёт бирлашмаси бошлиғининг даволаш ишлари бўйича ўринбосари Зокир Ўразбаевлар ҳам сўзга чиқиб, кун тартибидаги масала юзасидан ўзларининг қимматли фикр-мулоҳазаларини билдирдилар. Улар томонидан аҳоли қатламлари орасида соғлом турмуш тарзини тизимли равишда тарғиб қилиш, айниқса, ҳамюртларимизни жисмоний фаоллик ва турли спорт турлари билан мунтазам шуғулланишга жалб этиш ўта муҳимлиги, бу борадаги кенг қамровли тушунтириш ишларини ҳар қачонгидан ҳам юқори поғонага олиб чиқиш зарурлиги алоҳида қайд этилди.

Мутахассисларнинг таъкидлашича, узоқ ва мазмунли умр кўришнинг асосий шарти бу — касалликларни даволаш эмас, балки уларнинг олдини олишдир. Ўз вақтида олиб борилган тўғри профилактика тадбирлари, доимий равишда соғлом турмуш тарзига қатъий амал қилиш, ҳар бир шахснинг нафақат ўзи, балки ён-атрофидагиларнинг саломатлигига ҳам юксак масъулият билан муносабатда бўлиши жамият саломатлигининг асосий шартидир.  Қолаверса, кундалик истеъмолда инсон соғлиғи ва атроф-муҳитга зарар етказмайдиган, хавфсиз товарлар ҳамда сифатли хизматларни танлай билиш маданияти ҳам саломатлик кафолатининг ажралмас бир қисми ҳисобланади.

«Менинг соғлигим — менинг ҳуқуқим» шиори остида ўтаётган бу йилги Бутунжаҳон саломатлик куни барчамизни яна бир бор ҳушёрликка, ўзимизнинг ва яқинларимизнинг саломатлигига бефарқ бўлмасликка ундайди. Спорт ва жисмоний тарбияни кундалик одатимизга айлантириш, зарарли иллатлардан йироқ бўлиш ҳамда тиббий маданиятимизни юксалтириш орқалигина биз соғлом ва фаровон келажакни қура оламиз.