БАКТЕРИОЛОГИК ТЕКШИРУВ: У ҚАНДАЙ АМАЛГА ОШИРИЛАДИ?

Аҳолининг соғлом ва фаровон яшаши кўп жиҳатдан унинг тиббий маданиятига, яъни соғлом турмуш тарзига амал қилишига боғлиқ. Кундалик ҳаётида санитария-гигиена қоидаларига қатъий амал қилувчи, яшаш хонадонини ораста тутувчи инсонлар камдан-кам ҳолатларда касалликка чалинадилар. Аксинча, пала-партиш ҳаёт тарзини ўзига одатий ҳол сифатида қабул қилувчи инсонларнинг турли юқумли ва юқумли бўлмаган касалликлар билан оғриб туриши кўп кузатилади. Аҳоли орасида бундай нохуш ҳолатларнинг, айниқса, юқумли инфекциялар, хавфли бактериялар тарқалишининг олдини олишда Санитария эпидемиологик-осойишталик ва Жамоат саломатлиги бўлимининг бактериология лабораторияси ходимлари томонидан амалга ошириладиган таҳлилий текширув ишлари, хавфли бактериялар ва инфекциялар ўчоғини аниқлаш ҳамда хавфни бартараф этиш борасидаги чора-тадбирлар муҳим аҳамиятга эга.

Амударё туман Санитария эпидемиологик-осойишталик ва жамоат саломатлиги бўлими бактериология лабораториясида 2 нафар олий тоифали, бир нафар 1-тоифали ва яна бир нафар олий маълумотли шифокор, 3 нафар олий, бир нафар 1-тоифага эга малакали лаборантлар ҳамда 4 нафар кичик тиббиёт ходимлар фаолият олиб боришади.

Ўзаро ҳамжиҳатлик муҳити қарор топган жамоада аҳоли саломатлигини қатъий талаблар асосида муҳофаза қилиш, туман ҳудудида ўткир юқумли касалликларни қўзғатувчи инфекциялар ва хавфли бактериялар тарқалишининг олдини олишга қаратилган чора-тадбирлар пухта режа асосида амалга оширилади. Натижада коронавирус инфекциясидан сўнг туман ҳудудида юқумли инфекциялар умуман кузатилмади. Ўткир ошқозон-ичак касалликлари, турли йирингли ва болалар орасида кўп учрайдиган гижжа касалликларини аниқлаш ҳамда ушбу касалликлар ўчоғини бартараф этиш борасидаги бактериологик текширувлар самарали ташкил этилгани боис йил сайин туман аҳолиси орасида юқумли касалликларга чалиниш ҳолатлари тобора камайиб бормоқда.

Бактериология лабораториясида санитария бўлими, ўткир ошқозон-ичак касалликлари ҳамда ҳаво-томчи бўлимлари фаолият олиб боради. Лабораторияга туман Тиббиёт бирлашмасидан, тумандаги барча мактабгача ва мактаб таълими муассасаларидан, аҳоли яшаш жойларидан, шунингдек, ичимлик сувлари манбаларидан намуналар олиб келиниб текширилади ва бошқа объектлардан намуна хамда синамалар қабул қилинади. Келтирилган барча намуналар лабораториянинг малакали мутахассислари томонидан белгиланган қатъий лаборатор назорат асосида текширилиб, таҳлилий хулосалар берилади.

Туман Тиббиёт бирлашмасидан ҳаво, сув, суртма намуналари ҳамда барча бўлимлардан олиб келинган тиббий асбоб-ускуналарнинг стериллик ҳолати доимий равишда бактериологик текширувдан ўтказиб борилади. Шунингдек, мактаб ва мактабгача таълим муассасалари ўқитувчилари, ўқувчилар ва тарбияланувчиларнинг хавфсизлигини таъминлаш мақсадида мазкур муассасалар жойлашган ҳудудлардан сув, тупроқ, озиқ-овқат маҳсулотларидан намуналар олиниб, мунтазам равишда таҳлилий текширувдан ўтказилади.

Бир ёшгача бўлган болаларда учрайдиган стафилококк касаллиги, барча ёш тоифадаги болалар ва катталарда кузатиладиган овқатдан заҳарланиш, яъни ботулизм касаллигига қарши кураш вақтида амалга оширилмаса, кўнгилсиз оқибатларга олиб келиши мумкин. Шу боис, лаборатория ходимлари томонидан беморлар ва улар билан мулоқотда бўлганлардан таҳлил учун қон олиниб, жиддий текширувдан ўтказилади.

Бактериология лабораторияси ходимлари учун ҳар бир кун қайноқ иш жараёнида ўтади. Ўта хавфли юқумли касалликларга текшириш, мусбат чиққан натижаларни Қорақалпоғистон Республикаси Санитария эпидемиологик-осойишталик ва Жамоат саломатлиги бошқармасининг ўта хавфли юқумли касалликлар лабораториясига юбориш ҳам айнан шу ерда, малакали мутахассислар томонидан амалга оширилади.

Бундан ташқари, паразитология лабораториясида аҳоли томонидан олиб келинган намуналар юзасидан паразит касалликларини аниқлаш бўйича таҳлиллар амалга оширилиб, умумтаълим мактаблари ўқувчилари ва мактабгача таълим муассасалари тарбияланувчиларини гижжа касаллигига текшириш ишлари ҳам амалга оширилади.

Бактериология ва паразитология лабораторияси ходимлари томонидан амалга оширилаётган барча ишларнинг мазмун-моҳиятида халқимиз саломатлигини ишончли муҳофаза қилиш, жамиятимизда соғлом турмуш тарзини қарор топтиришдек эзгу ният мужассам. Зеро, саломатлик бор жойда фаровонлик, юксак тараққиёт ва бахтиёр ҳаёт ҳукмрон бўлади.

Робия Йўлдошева.