Мустақилликнинг 35 йиллиги олдидан кенг кўламли ободонлаштириш ишлари амалга оширилмоқда

Юртимизда энг улуғ ва энг азиз айём – Ўзбекистон Республикаси давлат мустақиллигининг 35 йиллигини кенг нишонлашга пухта ҳозирлик кўрилмоқда. “Ягона Ватан, ягона халқ бўлиб, янги ҳаёт ва келажак яратамиз!” деган эзгу ғоя остида нишонланадиган ушбу санани ҳар томонлама муносиб ва юқори савияда кутиб олиш мақсадида бутун республикамизда бўлгани каби Амударё туманида ҳам кенг кўламли ободонлаштириш ва бунёдкорлик ишлари уюшқоқлик билан ташкил этилмоқда.

Ушбу йўналишда ҳудудларга бириктирилган Халқ депутатлари Амударё тумани Кенгаши депутатлари, масъул ташкилотларнинг раҳбарлари ҳамда ходимлари иштирокида кенг қамровли амалий ишлар олиб борилмоқда. Жумладан, тумандаги барча маҳаллалар, марказий ва ички кўчалар ҳамда ижтимоий соҳа объектлари атрофларини тозалаш, ҳудудларни ободонлаштириш, зарур санитария-тозалик ишларини амалга оширишга алоҳида эътибор қаратилмоқда. Бундан ташқари, йўл четларидаги дарахтларни оқлаш, уларга шакл бериш, мавжуд яшил ҳудудларни парваришлаш ҳамда атроф-муҳитни тартибга келтириш ишлари ҳам юқори суръатларда бажарилмоқда.

Жойлардаги ободонлаштириш ишларини янада жадаллаштириш мақсадида Халқ депутатлари Амударё тумани Кенгаши депутатлари, “Маҳалла еттиликлари” ҳамда аҳоли вакиллари бир ёқадан бош чиқариб, қизғин меҳнат қилишмоқда. Манғит шаҳрининг Беруний, Янгиобод ва Олмазор маҳаллалари ҳудудида олиб борилаётган кенг кўламли тозалик ишлари доирасида Жумуртов шоҳ кўчаси ва аҳоли зич яшайдиган масканлардаги барча ички кўчалар тўлиқ тозаланмоқда. Шунингдек, автомобил йўлларининг ёқалари тартибга келтирилиб, белгиланган меъёрлар асосида чиқиндилардан тозалаш, мавжуд кўкаламзор ва яшил ҳудудларни агротехник қоидалар асосида парвариш қилиш ишлари изчил амалга оширилмоқда.

Ўтказилаётган ушбу кенг қамровли ободонлаштириш тадбирларидан кўзланган асосий мақсад – аввало, маҳалла аҳли учун янада қулай, озода ва ҳар томонлама файзли муҳит яратишдан иборатдир. Қолаверса, маҳаллаларнинг санитария ҳолатини тубдан яхшилаш, соғлом турмуш тарзини кенг тарғиб орқали энг улуғ ва энг азиз байрамимиз бўлмиш Мустақиллик айёмини ҳар бир хонадонда муносиб, кўтаринки ва ўзига хос байрамона кайфиятда кутиб олишига шароит яратиш кўзда тутилган.

Энг асосийси, бу каби умумхалқ тадбирлари аҳолининг, айниқса, ёш авлоднинг фуқаролик масъулиятини оширишга, уларнинг қалбида Ватан тараққиёти ва ривожига бўлган дахлдорлик туйғусини янада мустаҳкамлашга хизмат қилади. Мамлакатимиз мустақиллигининг 35 йиллиги муносабати билан уюшқоқлик асосида ташкил этилаётган бундай кенг кўламли ободонлаштириш ва кўкаламзорлаштириш тадбирларидан кўзланган бош мақсад эса битта – Ватанимиз шодиёнасини, яъни мустақиллик байрамини энг юқори савияда нишонлаш учун барча зарур чора-тадбирларни амалга оширишдир.