Mustaqillikning 35-yilligi oldidan keng koʻlamli obodonlashtirish ishlari amalga oshirilmoqda

Yurtimizda eng ulugʻ va eng aziz ayyom – Oʻzbekiston Respublikasi davlat mustaqilligining 35-yilligini keng nishonlashga puxta hozirlik koʻrilmoqda. “Yagona Vatan, yagona xalq boʻlib, yangi hayot va kelajak yaratamiz!” degan ezgu gʻoya ostida nishonlanadigan ushbu sanani har tomonlama munosib va yuqori saviyada kutib olish maqsadida butun respublikamizda boʻlgani kabi Amudaryo tumanida ham keng koʻlamli obodonlashtirish va bunyodkorlik ishlari uyushqoqlik bilan tashkil etilmoqda.

Ushbu yoʻnalishda hududlarga biriktirilgan Xalq deputatlari Amudaryo tumani Kengashi deputatlari, masʼul tashkilotlarning rahbarlari hamda xodimlari ishtirokida keng qamrovli amaliy ishlar olib borilmoqda. Jumladan, tumandagi barcha mahallalar, markaziy va ichki koʻchalar hamda ijtimoiy soha obʼektlari atroflarini tozalash, hududlarni obodonlashtirish, zarur sanitariya-tozalik ishlarini amalga oshirishga alohida eʼtibor qaratilmoqda. Bundan tashqari, yoʻl chetlaridagi daraxtlarni oqlash, ularga shakl berish, mavjud yashil hududlarni parvarishlash hamda atrof-muhitni tartibga keltirish ishlari ham yuqori surʼatlarda bajarilmoqda.

Joylardagi obodonlashtirish ishlarini yanada jadallashtirish maqsadida Xalq deputatlari Amudaryo tumani Kengashi deputatlari, “Mahalla yettiliklari” hamda aholi vakillari bir yoqadan bosh chiqarib, qizgʻin mehnat qilishmoqda. Mangʻit shahrining Beruniy, Yangiobod va Olmazor mahallalari hududida olib borilayotgan keng koʻlamli tozalik ishlari doirasida Jumurtov shoh koʻchasi va aholi zich yashaydigan maskanlardagi barcha ichki koʻchalar toʻliq tozalanmoqda. Shuningdek, avtomobil yoʻllarining yoqalari tartibga keltirilib, belgilangan meʼyorlar asosida chiqindilardan tozalash, mavjud koʻkalamzor va yashil hududlarni agrotexnik qoidalar asosida parvarish qilish ishlari izchil amalga oshirilmoqda.

Oʻtkazilayotgan ushbu keng qamrovli obodonlashtirish tadbirlaridan koʻzlangan asosiy maqsad – avvalo, mahalla ahli uchun yanada qulay, ozoda va har tomonlama fayzli muhit yaratishdan iboratdir. Qolaversa, mahallalarning sanitariya holatini tubdan yaxshilash, sogʻlom turmush tarzini keng targʻib orqali eng ulugʻ va eng aziz bayramimiz boʻlmish Mustaqillik ayyomini har bir xonadonda munosib, koʻtarinki va oʻziga xos bayramona kayfiyatda kutib olishiga sharoit yaratish koʻzda tutilgan.

Eng asosiysi, bu kabi umumxalq tadbirlari aholining, ayniqsa, yosh avlodning fuqarolik masʼuliyatini oshirishga, ularning qalbida Vatan taraqqiyoti va rivojiga boʻlgan daxldorlik tuygʻusini yanada mustahkamlashga xizmat qiladi. Mamlakatimiz mustaqilligining 35-yilligi munosabati bilan uyushqoqlik asosida tashkil etilayotgan bunday keng koʻlamli obodonlashtirish va koʻkalamzorlashtirish tadbirlaridan koʻzlangan bosh maqsad esa bitta – Vatanimiz shodiyonasini, yaʼni mustaqillik bayramini eng yuqori saviyada nishonlash uchun barcha zarur chora-tadbirlarni amalga oshirishdir.