Мўл пахта ҳосили учун агротехник тадбирлар сифатли амалга оширилмоқда

Ерга қадалган ҳар бир уруғнинг соғлом униб чиқиши ва эртанги кунда мўл ҳосил бериши бевосита миришкор деҳқоннинг машаққатли меҳнатига, шунингдек, барча агротехник тадбирларнинг ўз вақтида, илмий асосланган ҳолда олиб борилишига чамбарчас боғлиқдир. Айни кунларда Амударё тумани далаларида ҳам 2026 йилги мўл пахта ҳосили учун ғўза парвариши бўйича қизғин ва масъулиятли меҳнат жараёнлари изчил давом эттирилмоқда.

Жойлардаги пахта майдонларида барча зарур агротехник тадбирлар олдиндан белгиланган аниқ режа асосида, уюшқоқлик билан амалга оширилмоқда. Мавсумнинг ҳал қилувчи палласида туманнинг барча ҳудудларида ҳар бир гектар ердан мўл ва юқори сифатли ҳосил олиш мақсадида тизимли ишлар йўлга қўйилган. Хусусан, қатор ораларига сифатли ишлов бериш, экинларни вақтида суғориш, минерал ўғитлар билан меъёрида озиқлантириш, ғўзани чилпиш ҳамда турли хил зараркунанда ва касалликларга қарши курашиш ишларига мутахассислар томонидан алоҳида эътибор қаратилмоқда. Бу борада туман Фермерлар Кенгаши раҳбарияти фермерларнинг энг яқин маслаҳатчиси ва кўмакчисига айланган.

Ушбу йўналишда олиб борилаётган ишларнинг амалий мисоли сифатида Амударё туманидаги "Чойкўл Дўстлик" фермер хўжалиги фаолиятини алоҳида эътироф этиш мақсадга мувофиқдир. Мазкур фермер хўжалигида 2026 йил ҳосили учун эрта баҳор фаслида жами 64 гектар майдонга хорижий селекцияга мансуб бўлган, маҳаллий иқлим шароитларига мослашган ва серҳосил пахта навларининг уруғи қадалган эди. Бугунги кунга келиб, ушбу майдонларда барча агротехник тадбирлар илмий тавсиялар, кўп йиллик тажрибалар ва замонавий ёндашувлар асосида, энг муҳими, ўз вақтида бажарилмоқда.

Хўжалик аъзолари ва ишчи-ходимлар томонидан пахта қатор ораларига сифатли ҳамда чуқур ишлов бериш орқали тупроқнинг ҳаво алмашинуви сезиларли даражада яхшиланмоқда. Шу билан бирга, ўсимликнинг озиқага бўлган талабини тўлақонли қондириш мақсадида минерал ўғитларни белгиланган меъёрларда ва муддатларда қўллаш, минтақадаги сув ресурсларидан оқилона ҳамда тежамкорлик билан фойдаланган ҳолда суғориш ишлари тизимли ташкил этилмоқда.

Бундан ташқари, ғўза парваришида энг муҳим босқичлардан бири бўлган чилпиш тадбирлари, шунингдек, турли хил ҳашаротлар ва ўсимлик касалликларига қарши профилактик чора-тадбирлар изчил ва сифатли амалга оширилмоқда. Соҳанинг етук мутахассислари томонидан ҳар бир контур ва майдон доимий равишда назорат қилиниб, барча жараёнларда агротехник талабларга қатъий амал қилиниши таъминланмоқда.

Ана шундай тизимли, машаққатли ва илм-фанга асосланган ҳолда олиб борилаётган самарали ишлар натижасида фермер хўжалиги жамоаси жорий мавсум якунида ҳар гектар ердан 70-80 центнердан юқори ва сифатли пахта ҳосили олишни ўз олдига мақсад қилиб қўйган.

Бундай юқори кўрсаткичларга эришиш нафақат ҳосилдорликни сезиларли даражада оширишга, балки фермер хўжалигининг иқтисодий самарадорлигини ва даромадларини юксалтиришга, қолаверса, мамлакатимиз пахтачилик соҳасини янада ривожлантиришга қўшилган муносиб ҳисса бўлиши шубҳасиздир.

Таъкидлаш жоизки, пахта парваришида зарур бўлган барча агротехник тадбирларни айнан ўз вақтида ва юқори сифат билан бажариш эртанги кутиладиган мўл ҳосилнинг, фаровонликнинг асосий гарови ҳисобланади. Шу боисдан ҳам бугунги кунда бутун Амударё тумани бўйлаб миришкор фермерлар, тажрибали агрономлар ва қишлоқ хўжалиги соҳаси мутахассислари бир ёқадан бош чиқариб, ўзаро ҳамжиҳатликда меҳнат қилмоқдалар ҳамда ҳар бир майдондан юқори ҳосилдорликка эришиш йўлида фидокорона фаолият олиб бормоқдалар.