Moʻl paxta hosili uchun agrotexnik tadbirlar sifatli amalga oshirilmoqda

Yerga qadalgan har bir urugʻning sogʻlom unib chiqishi va ertangi kunda moʻl hosil berishi bevosita mirishkor dehqonning mashaqqatli mehnatiga, shuningdek, barcha agrotexnik tadbirlarning oʻz vaqtida, ilmiy asoslangan holda olib borilishiga chambarchas bogʻliqdir. Ayni kunlarda Amudaryo tumani dalalarida ham 2026-yilgi moʻl paxta hosili uchun gʻoʻza parvarishi boʻyicha qizgʻin va masʼuliyatli mehnat jarayonlari izchil davom ettirilmoqda.

Joylardagi paxta maydonlarida barcha zarur agrotexnik tadbirlar oldindan belgilangan aniq reja asosida, uyushqoqlik bilan amalga oshirilmoqda. Mavsumning hal qiluvchi pallasida tumanning barcha hududlarida har bir gektar yerdan moʻl va yuqori sifatli hosil olish maqsadida tizimli ishlar yoʻlga qoʻyilgan. Xususan, qator oralariga sifatli ishlov berish, ekinlarni vaqtida sugʻorish, mineral oʻgʻitlar bilan meʼyorida oziqlantirish, gʻoʻzani chilpish hamda turli xil zararkunanda va kasalliklarga qarshi kurashish ishlariga mutaxassislar tomonidan alohida eʼtibor qaratilmoqda. Bu borada tuman Fermerlar Kengashi rahbariyati fermerlarning eng yaqin maslahatchisi va koʻmakchisiga aylangan.

Ushbu yoʻnalishda olib borilayotgan ishlarning amaliy misoli sifatida Amudaryo tumanidagi "Choykoʻl Doʻstlik" fermer xoʻjaligi faoliyatini alohida eʼtirof etish maqsadga muvofiqdir. Mazkur fermer xoʻjaligida 2026-yil hosili uchun erta bahor faslida jami 64 gektar maydonga xorijiy selektsiyaga mansub boʻlgan, mahalliy iqlim sharoitlariga moslashgan va serhosil paxta navlarining urugʻi qadalgan edi. Bugungi kunga kelib, ushbu maydonlarda barcha agrotexnik tadbirlar ilmiy tavsiyalar, koʻp yillik tajribalar va zamonaviy yondashuvlar asosida, eng muhimi, oʻz vaqtida bajarilmoqda.

Xoʻjalik aʼzolari va ishchi-xodimlar tomonidan paxta qator oralariga sifatli hamda chuqur ishlov berish orqali tuproqning havo almashinuvi sezilarli darajada yaxshilanmoqda. Shu bilan birga, oʻsimlikning oziqaga boʻlgan talabini toʻlaqonli qondirish maqsadida mineral oʻgʻitlarni belgilangan meʼyorlarda va muddatlarda qoʻllash, mintaqadagi suv resurslaridan oqilona hamda tejamkorlik bilan foydalangan holda sugʻorish ishlari tizimli tashkil etilmoqda.

Bundan tashqari, gʻoʻza parvarishida eng muhim bosqichlardan biri boʻlgan chilpish tadbirlari, shuningdek, turli xil hasharotlar va oʻsimlik kasalliklariga qarshi profilaktik chora-tadbirlar izchil va sifatli amalga oshirilmoqda. Sohaning yetuk mutaxassislari tomonidan har bir kontur va maydon doimiy ravishda nazorat qilinib, barcha jarayonlarda agrotexnik talablarga qatʼiy amal qilinishi taʼminlanmoqda.

Ana shunday tizimli, mashaqqatli va ilm-fanga asoslangan holda olib borilayotgan samarali ishlar natijasida fermer xoʻjaligi jamoasi joriy mavsum yakunida har gektar yerdan 70-80 tsentnerdan yuqori va sifatli paxta hosili olishni oʻz oldiga maqsad qilib qoʻygan.

Bunday yuqori koʻrsatkichlarga erishish nafaqat hosildorlikni sezilarli darajada oshirishga, balki fermer xoʻjaligining iqtisodiy samaradorligini va daromadlarini yuksaltirishga, qolaversa, mamlakatimiz paxtachilik sohasini yanada rivojlantirishga qoʻshilgan munosib hissa boʻlishi shubhasizdir.

Taʼkidlash joizki, paxta parvarishida zarur boʻlgan barcha agrotexnik tadbirlarni aynan oʻz vaqtida va yuqori sifat bilan bajarish ertangi kutiladigan moʻl hosilning, farovonlikning asosiy garovi hisoblanadi. Shu boisdan ham bugungi kunda butun Amudaryo tumani boʻylab mirishkor fermerlar, tajribali agronomlar va qishloq xoʻjaligi sohasi mutaxassislari bir yoqadan bosh chiqarib, oʻzaro hamjihatlikda mehnat qilmoqdalar hamda har bir maydondan yuqori hosildorlikka erishish yoʻlida fidokorona faoliyat olib bormoqdalar.