BAKTERIOLOGIK TEKShIRUV: U QANDAY AMALGA OShIRILADI?

Aholining sogʻlom va farovon yashashi koʻp jihatdan uning tibbiy madaniyatiga, yaʼni sogʻlom turmush tarziga amal qilishiga bogʻliq. Kundalik hayotida sanitariya-gigiyena qoidalariga qatʼiy amal qiluvchi, yashash xonadonini orasta tutuvchi insonlar kamdan-kam holatlarda kasallikka chalinadilar. Aksincha, pala-partish hayot tarzini oʻziga odatiy hol sifatida qabul qiluvchi insonlarning turli yuqumli va yuqumli boʻlmagan kasalliklar bilan ogʻrib turishi koʻp kuzatiladi. Aholi orasida bunday noxush holatlarning, ayniqsa, yuqumli infektsiyalar, xavfli bakteriyalar tarqalishining oldini olishda Sanitariya epidemiologik-osoyishtalik va Jamoat salomatligi boʻlimining bakteriologiya laboratoriyasi xodimlari tomonidan amalga oshiriladigan tahliliy tekshiruv ishlari, xavfli bakteriyalar va infektsiyalar oʻchogʻini aniqlash hamda xavfni bartaraf etish borasidagi chora-tadbirlar muhim ahamiyatga ega.

Amudaryo tuman Sanitariya epidemiologik-osoyishtalik va jamoat salomatligi boʻlimi bakteriologiya laboratoriyasida 2 nafar oliy toifali, bir nafar 1-toifali va yana bir nafar oliy maʼlumotli shifokor, 3 nafar oliy, bir nafar 1-toifaga ega malakali laborantlar hamda 4 nafar kichik tibbiyot xodimlar faoliyat olib borishadi.

Oʻzaro hamjihatlik muhiti qaror topgan jamoada aholi salomatligini qatʼiy talablar asosida muhofaza qilish, tuman hududida oʻtkir yuqumli kasalliklarni qoʻzgʻatuvchi infektsiyalar va xavfli bakteriyalar tarqalishining oldini olishga qaratilgan chora-tadbirlar puxta reja asosida amalga oshiriladi. Natijada koronavirus infektsiyasidan soʻng tuman hududida yuqumli infektsiyalar umuman kuzatilmadi. Oʻtkir oshqozon-ichak kasalliklari, turli yiringli va bolalar orasida koʻp uchraydigan gijja kasalliklarini aniqlash hamda ushbu kasalliklar oʻchogʻini bartaraf etish borasidagi bakteriologik tekshiruvlar samarali tashkil etilgani bois yil sayin tuman aholisi orasida yuqumli kasalliklarga chalinish holatlari tobora kamayib bormoqda.

Bakteriologiya laboratoriyasida sanitariya boʻlimi, oʻtkir oshqozon-ichak kasalliklari hamda havo-tomchi boʻlimlari faoliyat olib boradi. Laboratoriyaga tuman Tibbiyot birlashmasidan, tumandagi barcha maktabgacha va maktab taʼlimi muassasalaridan, aholi yashash joylaridan, shuningdek, ichimlik suvlari manbalaridan namunalar olib kelinib tekshiriladi va boshqa obʼektlardan namuna xamda sinamalar qabul qilinadi. Keltirilgan barcha namunalar laboratoriyaning malakali mutaxassislari tomonidan belgilangan qatʼiy laborator nazorat asosida tekshirilib, tahliliy xulosalar beriladi.

Tuman Tibbiyot birlashmasidan havo, suv, surtma namunalari hamda barcha boʻlimlardan olib kelingan tibbiy asbob-uskunalarning sterillik holati doimiy ravishda bakteriologik tekshiruvdan oʻtkazib boriladi. Shuningdek, maktab va maktabgacha taʼlim muassasalari oʻqituvchilari, oʻquvchilar va tarbiyalanuvchilarning xavfsizligini taʼminlash maqsadida mazkur muassasalar joylashgan hududlardan suv, tuproq, oziq-ovqat mahsulotlaridan namunalar olinib, muntazam ravishda tahliliy tekshiruvdan oʻtkaziladi.

Bir yoshgacha boʻlgan bolalarda uchraydigan stafilokokk kasalligi, barcha yosh toifadagi bolalar va kattalarda kuzatiladigan ovqatdan zaharlanish, yaʼni botulizm kasalligiga qarshi kurash vaqtida amalga oshirilmasa, koʻngilsiz oqibatlarga olib kelishi mumkin. Shu bois, laboratoriya xodimlari tomonidan bemorlar va ular bilan muloqotda boʻlganlardan tahlil uchun qon olinib, jiddiy tekshiruvdan oʻtkaziladi.

Bakteriologiya laboratoriyasi xodimlari uchun har bir kun qaynoq ish jarayonida oʻtadi. Oʻta xavfli yuqumli kasalliklarga tekshirish, musbat chiqqan natijalarni Qoraqalpogʻiston Respublikasi Sanitariya epidemiologik-osoyishtalik va Jamoat salomatligi boshqarmasining oʻta xavfli yuqumli kasalliklar laboratoriyasiga yuborish ham aynan shu yerda, malakali mutaxassislar tomonidan amalga oshiriladi.

Bundan tashqari, parazitologiya laboratoriyasida aholi tomonidan olib kelingan namunalar yuzasidan parazit kasalliklarini aniqlash boʻyicha tahlillar amalga oshirilib, umumtaʼlim maktablari oʻquvchilari va maktabgacha taʼlim muassasalari tarbiyalanuvchilarini gijja kasalligiga tekshirish ishlari ham amalga oshiriladi.

Bakteriologiya va parazitologiya laboratoriyasi xodimlari tomonidan amalga oshirilayotgan barcha ishlarning mazmun-mohiyatida xalqimiz salomatligini ishonchli muhofaza qilish, jamiyatimizda sogʻlom turmush tarzini qaror toptirishdek ezgu niyat mujassam. Zero, salomatlik bor joyda farovonlik, yuksak taraqqiyot va baxtiyor hayot hukmron boʻladi.

Robiya Yoʻldosheva.