АМУДАРЁЛИКЛАР “РИЗҚИНИ СОТИБ РАВШАН ОЛМАЙДИЛАР” ЁКИ ҚУТИЛАРДАГИ ШАМЛАР ЎТМИШДА ҚОЛДИ
Болалигимизда уйимиздаги электр чироғи тез-тез ўчиб турар, баъзан кечки овқат пайтида, баъзан ўқитувчимиз берган уйга вазифаларимизни бажараётганимизда “лип” этиб чироқ ўчар, шунда опа-укалар барчамиз битта мойчироқ атрофида ўтириб, хирагина ёруғликда бир амаллаб дарсимизни тайёрлардик. Ота-оналаримиз эса бундай вазиятларнинг олдини олиш “йўли”ни қилишарди. “Йўл”и – боғимизда етиштирилган меваларни бозорга олиб бориб, сув текинга сотиш ва эвазига бир қути шам харид қилиш. Кейинги гал электр чироғимиз ўчганида онам раҳматлик: “мана, ризқингизни сотиб, равшан олиб бердик, мойчироқ – бизларга, равшан – сизларга”, дея шамларга ишора қилиб, ҳазиллашардилар.
Минг шукур, замон ўзгарди, электр чироғимиз ўчиб қолишининг олдини олиш “йўли”ни энди давлатнинг ўзи қилаётир. Халқимиз ҳатто электр энергиясидан самарали фойдаланиш орқали ўз ҳаётини яхши ва ижобий томонга ўзгартириб, фаровон ва обод, нурафшон хонадонларда яшаётир.
Айниқса, истеъмолчиларни, аҳоли хонадонларини узлуксиз электр энергияси билан таъминлашга қаратилган чора-тадбирлар туфайли иссиқлик энергиясига эҳтиёж энг кўп бўладиган куз-қиш мавсумида бу борадаги ишларга эътибор янада кучайтирилади.
Биз ижодий гуруҳимиз билан янги йил байрами арафасида Амударё туман электр тармоқлари корхонаси томонидан куз-қиш мавсумини талафотларсиз ўтказиш мақсадида амалга оширилган ишларнинг бугунги ҳолати билан танишиш асносида бу борадаги ишлар кўнгилдагидай ташкил этилганининг гувоҳи бўлдик.
Хусусан, туманда электр энергияси билан боғлиқ фавқулодда ҳолатларнинг ҳолатларнинг олдини олиш мақсадида 2024-2025 йиллар куз-қиш мавсумига пухта тайёргарлик кўрилган. Тайёргарлик жараёнида 56 дона трансформатор пунктлари, 177,1 км узунликдаги ҳаво электр тармоқларида мукаммал таъмирлаш ишлари бажарилиб, 113 дона трансформатор пункти, 299,5 км узунликдаги ҳаво электр тармоқларида жорий таъмирлаш ишлари амалга оширилди.
Шунингдек, Президентимизнинг 2024 йил 17 июль кунги маҳаллалар инфратузилмасини яхшилаш, аҳоли фаровонлигини ошириш мақсадида имзолаган махсус қарори асосида туманимизда 15,6 км ҳаво тармоғи хамда 324 дона таянч устунларида реконструкция ишлари амалга оширилди.
Хусусан, Бештом маҳалласи ҳудудида 3,6 км замонавий СИП кабель тармоғи ва 61 дона темир-бетон таянч устунлари, Қаромон маҳалласи ҳудудида 3,7 км замонавий СИП кабель тармоғи ва 84 дона темир-бетон таянч устунлари, Бўз солма маҳалласи ҳудудида 3,7 км замонавий СИП кабель тармоғи ва 71 дона темир-бетон таянч устунлари, Амир Темур овули ҳудудида эса 4,5 км замонавий СИП кабель тармоғи ва 108 дона темир-бетон устунлари реконструкция қилинди.
Бундан ташқари, юқори кучланишли Манғит подстанциясидаги 16 минг кВА қувватли куч трансформатори 25 минг кВА қувватли куч трансформаторига, Қипчоқ подстанциясидаги 2 минг 500 кВА қувватли куч трансформатори 6 минг 300 кВА қувватли куч трансформаторига алмаштирилди. Тумандаги мавжуд подстанциялар ва электр энергияси узатиш ҳаво тармоқларида амалга оширилган реконструкция ва жорий таъмирлаш ишлари натижасида истеъмолчиларнинг электр энергиясига бўлган эҳтиёжларини тўлиқ қондириш имконияти юзага келди.
Муҳими, бугунги кунда амударёликлар “ризқини сотиб равшан олиш” фикридан тамоман йироқ, аксинча, электр энергияси ресурсларидан самарали фойдаланиш орқали оилаларининг ризқ-насибаси янада зиёда бўлишини таъминлашаётгани қувонарли.
Бундан ҳам қувонарлиси, туман электр тармоқлари корхонаси томонидан 2025 йилда фавқулодда ҳолатларнинг олдини олиш мақсадида 58 дона трансформатор пунктлари, 170,2 км узунликдаги ҳаво электр тармоқларини мукаммал таъмирлаш, 162 дона трансформатор пункти, 460,5 км узунликдаги ҳаво электр тармоғида жорий таъмирлаш, 9 дона трансформатор пунктлари, 14,1 км узунликдаги ҳаво электр тармоқларида реконструкция ишларини амалга ошириш режалаштирилган.
Демак, амударёликлар 2025 йилни янада чароғон, ранг-баранг, ёрқин чироқлар билан безатилган Янги йил арчаси атрофида шод-у хуррам кутиб оладилар ва... “фарзандлари ризқини сотиб, равшан олмайдилар”. Қутилардаги шамлар эса ўтмишда қолди.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
