AMUDARYoLIKLAR “RIZQINI SOTIB RAVShAN OLMAYDILAR” YoKI QUTILARDAGI ShAMLAR OʻTMIShDA QOLDI

Bolaligimizda uyimizdagi elektr chirogʻi tez-tez oʻchib turar, baʼzan kechki ovqat paytida, baʼzan oʻqituvchimiz bergan uyga vazifalarimizni bajarayotganimizda “lip” etib chiroq oʻchar, shunda opa-ukalar barchamiz bitta moychiroq atrofida oʻtirib, xiragina yorugʻlikda bir amallab darsimizni tayyorlardik. Ota-onalarimiz esa bunday vaziyatlarning oldini olish “yoʻli”ni qilishardi. “Yoʻl”i – bogʻimizda yetishtirilgan mevalarni bozorga olib borib, suv tekinga sotish va evaziga bir quti sham xarid qilish. Keyingi gal elektr chirogʻimiz oʻchganida onam rahmatlik: “mana, rizqingizni sotib, ravshan olib berdik, moychiroq – bizlarga, ravshan – sizlarga”, deya shamlarga ishora qilib, hazillashardilar.

Ming shukur, zamon oʻzgardi, elektr chirogʻimiz oʻchib qolishining oldini olish “yoʻli”ni endi davlatning oʻzi qilayotir. Xalqimiz hatto elektr energiyasidan samarali foydalanish orqali oʻz hayotini yaxshi va ijobiy tomonga oʻzgartirib, farovon va obod, nurafshon xonadonlarda yashayotir.

Ayniqsa, isteʼmolchilarni, aholi xonadonlarini uzluksiz elektr energiyasi bilan taʼminlashga qaratilgan chora-tadbirlar tufayli issiqlik energiyasiga ehtiyoj eng koʻp boʻladigan kuz-qish mavsumida bu boradagi ishlarga eʼtibor yanada kuchaytiriladi.

Biz ijodiy guruhimiz bilan yangi yil bayrami arafasida Amudaryo tuman elektr tarmoqlari korxonasi tomonidan kuz-qish mavsumini talafotlarsiz oʻtkazish maqsadida amalga oshirilgan ishlarning bugungi holati bilan tanishish asnosida bu boradagi ishlar koʻngildagiday tashkil etilganining guvohi boʻldik.

Xususan, tumanda elektr energiyasi bilan bogʻliq favqulodda holatlarning holatlarning oldini olish maqsadida 2024-2025-yillar kuz-qish mavsumiga puxta tayyorgarlik koʻrilgan. Tayyorgarlik jarayonida 56 dona transformator punktlari, 177,1 km uzunlikdagi havo elektr tarmoqlarida mukammal taʼmirlash ishlari bajarilib, 113 dona transformator punkti, 299,5 km uzunlikdagi havo elektr tarmoqlarida joriy taʼmirlash ishlari amalga oshirildi.

Shuningdek, Prezidentimizning 2024-yil 17-iyul kungi mahallalar infratuzilmasini yaxshilash, aholi farovonligini oshirish maqsadida imzolagan maxsus qarori asosida tumanimizda 15,6 km havo tarmogʻi xamda 324 dona tayanch ustunlarida rekonstruktsiya ishlari amalga oshirildi.

Xususan, Beshtom mahallasi hududida 3,6 km zamonaviy SIP kabel tarmogʻi va 61 dona temir-beton tayanch ustunlari, Qaromon mahallasi hududida 3,7 km zamonaviy SIP kabel tarmogʻi va 84 dona temir-beton tayanch ustunlari, Boʻz solma mahallasi hududida 3,7 km zamonaviy SIP kabel tarmogʻi va 71 dona temir-beton tayanch ustunlari, Amir Temur ovuli hududida esa 4,5 km zamonaviy SIP kabel tarmogʻi va 108 dona temir-beton ustunlari rekonstruktsiya qilindi.

Bundan tashqari, yuqori kuchlanishli Mangʻit podstantsiyasidagi 16 ming kVA quvvatli kuch transformatori 25 ming kVA quvvatli kuch transformatoriga, Qipchoq podstantsiyasidagi 2 ming 500 kVA quvvatli kuch transformatori 6 ming 300 kVA quvvatli kuch transformatoriga almashtirildi. Tumandagi mavjud podstantsiyalar va elektr energiyasi uzatish havo tarmoqlarida amalga oshirilgan rekonstruktsiya va joriy taʼmirlash ishlari natijasida isteʼmolchilarning elektr energiyasiga boʻlgan ehtiyojlarini toʻliq qondirish imkoniyati yuzaga keldi.

Muhimi, bugungi kunda amudaryoliklar “rizqini sotib ravshan olish” fikridan tamoman yiroq, aksincha, elektr energiyasi resurslaridan samarali foydalanish orqali oilalarining rizq-nasibasi yanada ziyoda boʻlishini taʼminlashayotgani quvonarli.

Bundan ham quvonarlisi, tuman elektr tarmoqlari korxonasi tomonidan 2025-yilda favqulodda holatlarning oldini olish maqsadida 58 dona transformator punktlari, 170,2 km uzunlikdagi havo elektr tarmoqlarini mukammal taʼmirlash, 162 dona transformator punkti, 460,5 km uzunlikdagi havo elektr tarmogʻida joriy taʼmirlash, 9 dona transformator punktlari, 14,1 km uzunlikdagi havo elektr tarmoqlarida rekonstruktsiya ishlarini amalga oshirish rejalashtirilgan.

Demak, amudaryoliklar 2025-yilni yanada charogʻon, rang-barang, yorqin chiroqlar bilan bezatilgan Yangi yil archasi atrofida shod-u xurram kutib oladilar va... “farzandlari rizqini sotib, ravshan olmaydilar”. Qutilardagi shamlar esa oʻtmishda qoldi.

Robiya Yoʻldosheva