Amudaryoliklar tomorqalaridan samarali foydalanib, yuqori daromad olishmoqda

Amudaryoliklar azaldan mehnatsevar xalq, yerga mehri baland. Bugun qishning izgʻirinli kunlarida ham yurtdoshlarimiz tomorqalaridan unumli foydalanib, ixcham issiqxonalar tashkil qilishgan, issiqxonalarda turli koʻkatlar hamda sabzavot mahsulotlarini yetishtirib, ichki bozorlarimizni oziq-ovqat mahsulotlari bilan taʼminlab kelishmoqda.

Xususan, Qilichboy ovuli hududida yashovchi Qoʻchqorboy Nurimov 25 sotix tomorqasining 5 sotixiga ixcham issiqxona tashkil etib, yiliga 2-3 marotaba hosil olib kelmoqda. Tomorqaning 10 sotix maydonida yaratilgan intensiv bogʻdagi turli mevali daraxtlardan ham yaxshi hosil olinmoqda. Qoʻchqorboy aka ayni paytda issiqxonasida koʻk piyoz va koʻkatlar yetishtirmoqda, bahor faslining boshlarida esa, bodring va pomidor ekishni rejalashtirmoqda.

Oilaviy mehnat natijasida tomorqadan yuqori daromad olinib, oilaning iqtisodi tobora yaxshilanmoqda. Qoʻchqorboy akaning mehnatlari tuman Fermer, dehqon xoʻjaliklari va tomorqa yer egalari kengashi tomonidan ragʻbatlantirilib, doimiy qoʻllab-quvvatlanib kelinmoqda. Hamyurtimizning fidokorana mehnatlari eʼtirof etilib, “Namunali tomorqachi” koʻkrak nishoni bilan taqdirlangan.

Shu oʻrinda qayd etish joizki, bugungi kunda butun mamlakatimiz boʻylab hududlarni ijtimoiy-iqtisodiy rivojlantirish, aholi daromadlarini oshirish, kambagʻallikni qisqartirish va bandlikni taʼminlash masalalariga alohida eʼtibor qaratib, keng koʻlamli islohotlar amalga oshirilmoqda. Bunda chekka hududlardagi aholining tomorqalaridan samarali foydalanishiga, ixcham issiqxonalar tashkil etilishi orqali aholi daromadini oshirishga alohida eʼtibor qaratilib, keng imkoniyatlar yaratilmoqda.

Oʻzbekiston Respublikasi Prezidentining “Issiqxona xoʻjaliklari faoliyati samaradorligini oshirish yuzasidan qoʻshimcha chora-tadbirlar toʻgʻrisida”gi qarori mamlakat aholisiga sifatli va kafolatli qishloq xoʻjaligi mahsulotlarini yetkazib berish orqali oziq-ovqat xavfsizligini taʼminlash, issiqxona xoʻjaliklari va muzlatkichli omborxonalarning iqtisodiy jihatdan samarali ishlashi uchun yanada qulay shart-sharoitlar yaratish, shuningdek, mazkur sohada band boʻlgan aholi daromadlarini oshirishni qoʻshimcha ragʻbatlantirish kabi ustuvor maqsadlarga xizmat qilmoqda.

Amudaryo tumanining Xolimbeg ovulida yashovchi Erkin Qoʻshayev ham mehnatsevarlikni oʻzining hayotiy shiori qilib olgan insonlardan biri desak, aslo mubolagʻa boʻlmaydi. Erkin aka xonadoniga tashrif buyurgan har bir mehmonning juda katta havas va unutilmas taassurotlar bilan qaytishi, shubhasiz.

Biz ham ijodiy jamoamiz bilan “Namunali tomorqachi” koʻkrak nishoni sohibining tomorqasi bilan tanishar ekanmiz, juda katta mehnat va oʻz ustida ishlash orqali erishilgan natijalarni koʻrib hayratda qoldik. Xonadonning oʻzgacha fayzi uning egalarining ochiqkoʻngilligidan, samimiyligidan ekaniga ishonch hosil qildik. Uy oldidagi 10 yillik tarixga ega haybatli archa daraxtlari hovliga koʻrk bagʻishlab turibdi.

Erkin aka tomorqasida limon, qulupnay, arab xurmosi kabi mevalar yetishtirishni yoʻlga qoʻygan boʻlib, 30 sotix ekin maydonining 2 sotixida ixcham issiqxona tashkil etgan va unda yetishtirilayotgan limondan bu yil ikkinchi marotaba hosil olmoqda. Tuman Fermer, dehqon xoʻjaliklari va tomorqa yer egalari kengashi tomonidan limon koʻchatlarini koʻpaytirishni yoʻlga qoʻyish borasida tegishli tavsiyalar hamda amaliy yordamlar berilib kelinmoqda.

Shuningdek, tomorqada erta bahordan sabzavot va poliz ekinlarini ekishga yerlarni tayyorlash ishlari olib borilmoqda. Tomorqachi oʻzi yetishtirgan kartoshka, piyoz, karam, qovun, tarvuz kabi mahsulotlarni nafaqat tumanimiz ichki bozorlariga, balki qoʻshni tumanlar bozorlariga ham yetkazib, ularni ham sifatli va arzon oziq-ovqat mahsulotlari bilan taʼminlashga hissa qoʻshmoqda. Yerdan olinadigan daromad ham yil sayin ortib bormoqda. Tomorqada yetishtirilgan hosildan yiliga 100 mln soʻmga yaqin daromad olinishi tinimsiz va samarali mehnat natijasidir.

Charos Arslonova, tuman hokimligining Axborot xizmati rahbari.