Ёнғин хавфсизлиги ойлиги доирасида тадбирлар ўтказилмоқда

15 ноябрдан 15 декабргача мамлакатимиз бўйлаб “Ёнғин хавфсизлиги ойлиги” тадбирлари ўтказилаётгани Амударё тумани Фавқулодда вазиятлар бўлими ходимларини янада самарали фаолият олиб боришга ундамоқда. Ойлик доирасида Амударё тумани ихтисослаштирилган мактаби ўқувчилари билан учрашув ўтказилиб, унда ёнғинни ўчириш техникалари намойиш қилинди.

Ўқувчиларга ёнғин хавфсизлиги қоидаларига амал қилиш, ёқилғи ёқиладиган мосламаларни қаровсиз қолдирмаслик, электр ускуналарини фақат соз ҳолатда ишлатиш, ёнувчан материалларини махсус жойларда сақлаш бўйича тавсиялар берилди. Бундан ташқари, бирламчи ёнғин ўчириш воситалари ҳақида маълумот берилиб, ёнғин содир бўлганда ҳаракатланиш тартиби бўйича маълумотлар берилди.

Шунингдек, масъуллар мактабда ёнғин хавфсизлигини таъминлаш бўйича кўрилган чоралар билан яқиндан танишиб, иситиш тизими жойлашган қозонхонада ҳаво алмашинувини таъминлаш, хавфсизлик талабларига қатъий риоя қилиш, иситиш қурилмаларини доимий равишда текшириб, соз ҳолатда ишлатиш бўйича тавсиялар бердилар. Барқарор иситиш тизимлари ижтимоий объектларда соғлом муҳитни таъминлаб, ўқувчи ва ўқитувчиларнинг фаолиятига ижобий таъсир кўрсатиши алоҳида қайд этилди.

Ойлик доирасида масъуллар овул ва маҳаллаларда бўлиб, аҳоли ўртасида тушунтириш ишларини олиб боришга ҳам эътибор қаратишмоқда. Маълумки, кунлар совиб, иситиш тизимлари ишга тушиши билан, аҳоли ўртасида ис газидан заҳарланишдек нохуш ҳодисалар кўпроқ содир бўла бошлайди. Ис гaзи – ранги ва ҳиди бўлмаган заҳарли газ бўлиб, у углероднинг тўлиқ ёнимаслиги натижасида пайдо бўлади. Бу газ ҳаво таркибида юқори концентрацияда бўлса, инсон саломатлигига жиддий хавф солади. Ис гaзи турли ёқилғиларнинг, жумладан, кўмир, табиий газ, ёғоч ёки бензиннинг чала ёниши оқибатида пайдо бўлади. Ҳаво йўли билан организмга кирган ис гaзи қондаги гемоглобин билан боғланиб, тана тўқималарига кислород етиб боришига тўсқинлик қилади, бу эса заҳарланишга олиб келади.

Мана шундай нохуш ҳолатлар содир бўлишининг олдини олиш, унга шароит яратиб берувчи сабабларни аниқлаш ва бартараф этиш ҳамда аҳолини огоҳликка чақириш мақсадида масъуллар мунтазам равишда аҳоли хонадонларида бўлиб, ўрганишлар ўтказмоқда ва тушунтириш ишларини олиб бормоқда.

Таҳлилларга кўра газ мосламаларидан фойдаланиш жараёнларида хавфсизлик қоидаларига риоя қилмаслик, ёқилғи ёқиш тизимларидаги нуқсонлар, яъни печлар, газ плиталари ва қозонлар техник ҳолатининг текширилмаслиги, хона ичида ҳаво айланишининг чекланганлиги, яъни вентилятор йўқлиги ёки ойналарнинг очмаслиги, қозонхона ёки газ плиталарининг уй ичида жойлашиши ис гaзидан заҳарланишнинг асосий сабаблари сирасига киради.

Масъуллар кўп қаватли уйларда, маҳаллалар ва кўчаларда бўлиб, аҳоли иштирокида йиғилишлар ўтказиб, тушунтириш-тарғибот ишларини олиб бордилар ҳамда ёнғин хавфсизлиги, хусусан ис газидан заҳарланишнинг олдини олиш бўйича зарур тавсиялар бердилар.