55-сонли мактабда “Уч авлод учрашуви” номли тадбир ўтказилди

Мамлакатимизда кекса авлод вакилларини эъзозлаш, уларга ҳурмат-эҳтиром кўрсатиш миллий-маънавий қадриятларимиздан бири саналади. “Қариси бор уйнинг париси бор”, “Кексалар – хонадонларимиз фаришталари” каби ҳикматлар ҳам бежизга яратилмаган. Чунки катта ҳаётий тажрибага эга бўлган нуроний отахон ва онахонларимизнинг ўгит ва насиҳатлари, уларнинг дуолари биз ҳаётда эришаётган муваффақиятларимизнинг илҳомчисидир. Шу боис, пир-у бадавлат отахон ва онахонларимиз ҳамиша халқимиз ҳамда давлатимиз эъзозида.

Ўзбекистон Республикаси Вазирлар Маҳкамасининг 2020 йил 28 майдаги “Кексаларни давлат томонидан қўллаб-қувватлаш тизимини янада такомиллаштиришнинг қўшимча чора-тадбирлари тўғрисида”ги Қарорига асосан ҳар йилнинг ноябрь ойи юртимизда “Кексалар учун туризм ойлиги” сифатида белгиланган.

Ойлик доирасида кекса ва ногиронларни қўллаб-қувватлаш, уларнинг вақтини мазмунли ташкил этиш мақсадида турли ижтимоий лойиҳалар амалга оширилади, мамлакатимизнинг диққатга сазовор жойларига саёҳатлар уюштирилади. Ойлик давомида мамлакатимиздаги барча туман ва шаҳарлардаги масъуллар иштирокида саёҳат қилиш истагини билдирган кексалар ва ногиронлар рўйхатлари шакллантирилиб, уларнинг мазмунли саёҳат қилишлари учун зарур шароитлар яратилмоқда. Бундан ташқари, овул ва маҳаллаларда, жамоат ташкилотлари ҳамда таълим-тарбия муассасаларида кўпни кўрган нуроний отахон ва онахонлар иштирокида “Уч авлод учрашуви” тадбирлари ташкил этилиб, унда юзлаб ёшларнинг иштироки таъминланаётгани барчага манзур бўлмоқда.

Жорий йилнинг 14 ноябрь санасида Амударё тумани Мактабгача ва мактаб таълими бўлимига қарашли 55-сонли умумтаълим мактабида ҳам “Кексаларни эъзозлаш, уларга ҳурмат-эҳтиром кўрсатиш – халқимизга хос эзгу фазилат”, “Қаҳрамонлар хотираси мангудир” мавзуларида маънавий-маърифий тадбир ўтказилди.

Тадбирда Амударё туман Мудофаа ишлари бўлими бошлиғининг тарбиявий ва мафкуравий ишлар бўйича ўринбосари Зокиржон Саъдуллаев, Мудофаа Вазирлиги фахрийлари Эндирбой Ўрозбоев, Илҳом Ердашев, Миллий гвардия ходими Нурлан Ўрозбоев, Ўзбекистон “Ветеран” жангчи-фахрий ва ногиронлар бирлашмасининг Амударё тумани бўлими аъзолари Мамбатсолий Абдуллаев, Озод Хўжаниёзов, Қадамбой Эримбетов, Анвар Қўшбоев, 55-сонли мактабнинг чақириққа қадар бошланғич таълим раҳбари Нурбек Ўрозбоевлар ҳамда ўқувчи-ёшлар иштирок этдилар.

Тадбирда Мудофаа Вазирлиги фахрийлари Илҳом Ердошев ва Эндирбой Ўрозбоевлар ўзларининг жанговор ҳарбий хизмат даврлари, она Ватан сарҳадларини ҳимоя қилишдаги сафдошларининг мардлик ва жасоратлари, шунингдек, Ватан ҳимоячиси бўлишдек шарафли касбнинг масъулияти хусусида сўз юритиб, Миллий Армиямизнинг куч ва салоҳияти тўғрисидаги ўқувчи-ёшларни қизиқтирган саволларга ҳам жавоб бердилар.

Тадбирнинг “Қаҳрамонлар хотираси мангудир” деб номланган қисмида ўқувчи-ёшлар Ўзбекистон “Ветеран” жангчи-фахрий ва ногиронлар бирлашмасининг Амударё туман бўлими аъзолари – собиқ Афғонистон уруши иштирокчилари билан дилдан суҳбат қурдилар.

Бундан 35-40 йил аввал Афғонистон давлати ҳудудида кечган аёвсиз жангларда қаҳрамонлик ва мардлик намуналарини кўрсатган фахрий жангчилар бугун нуроний ёшга етишган. Улар айни пайтда кексалик гаштини сураётган бўлишсалар-да, ҳамиша ёшлар даврасида, маънавий-маърифий суҳбатлари орқали ёш авлодни Истиқлол ғояларига, миллий-маънавий қадриятларимизга даъват этиб келишади.

Мазкур тадбирда ҳам собиқ фахрий-жангчилар Афғон урушида шаҳид кетган амударёлик қаҳрамон юртдошларимиз билан боғлиқ хотиралари ҳақида ёшларга сўзлаб бердилар. Шу билан бирга бугунги тинч-фаровон ҳаётнинг қадрига етиш, Она Ватанга муносиб, билимли, юксак маънавиятли инсонлар сифатида камол топишга интилиб яшаш ҳар бир ёшнинг зиммасидаги бурч ва масъулияти эканлигини таъкидладилар.

Тадбир давомида ўқувчи-ёшлар нуроний отахонларнинг ўгит ва насиҳатлари, уларнинг жанговор фаолиятлари ўзлари учун ибрат ва намуна бўлажагини таъкидладилар.

Самимий руҳда, нуронийлар билан дилдан суҳбат тарзида ўтган “Уч авлод учрашуви” тадбири ўзининг маънавий-маърифий, тарбиявий аҳамияти билан ўқувчи-ёшларда катта таассурот қолдирди.

Робия Йўлдошева.