АҲОЛИНИНГ ИШ БИЛАН БАНДЛИГИНИ ТАЪМИНЛАШ – ХАЛҚ ФАРОВОНЛИГИНИ ТАЪМИНЛАШДИР

Мамлакатимизда аҳолининг иш билан бандлигини таъминлашга қаратилган чора-тадбирлар туфайли йил сайин ишсизлик даражаси камайишига эришилмоқда. Бу борада Амударё тумани Камбағалликни қисқартириш ва бандликка кўмаклашиш бўлими томонидан амалга оширилаётган режали саъй-ҳаракатлар аҳоли бандлигини таъминлаш билан боғлиқ муаммолар ечимини топишда муҳим аҳамият касб этмоқда.

Жорий йилнинг 23 август куни Амударё муҳандислик техникуми биносида бўлиб ўтган меҳнат ярмаркасида ҳам туманнинг турли ҳудудларида яшовчи кўплаб фуқаролар нинг иш билан бандлиги таъминланди. Очиқлик ва шаффофлик асосида бўлиб ўтган меҳнат ярмаркасида Амударё туман прокурори, адлия маслаҳатчиси Абат Жумамуратов, маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман ҳокими ёрдамчилари ҳамда бошқа ҳамкор ташкилотлар, тижорат банклари вакиллари қатнашдилар.

Ярмаркада тумандаги 97 та корхона ва ташкилотлар вакиллари 509 та бўш (вакант) иш ўринлари билан иштирок этдилар. Меҳнат ярмаркасида 63 нафар ишсиз фуқаролар, алимент тўловчилар, ногиронлиги бўлган шахслар, битирувчи ёшлар корхона ва ташкилотлар томонидан таклиф этилган бўш иш ўринлари билан батафсил танишдилар ва ўзларининг касбий кўникмаларига мутаносиб иш ўринларини танлашлари учун зарур шароитлар яратилди.

Ярмаркани Амударё тумани Камбағалликни қисқартириш ва бандликка кўмаклашиш бўлими бошлиғи Рашид Салаев очди ва олиб борди. Шунингдек, Рашид Салаев ярмарка орқали тавсия этилаётган бўш иш ўринлари тўғрисида батафсил маълумотлар берди. Шундан сўнг, ярмарка иштирокчиларига Камбағалликни қисқартириш ва бандликка кўмаклашиш бўлими ходимлари томонидан бўш иш ўринлари ва уларга аҳолини ишга жойлаштириш, ишсиз аҳолини касб-ҳунарга ўқитиш аҳолини хорижий давлатларга ишга жойлаштириш ҳамда уларнинг меҳнат ҳуқуқлари ва меҳнат муҳофазасини таъминлаш масалалари бўйича ҳуқуқий маслаҳат ва маълумотлар олишлари учун барча шароитлар, жумладан, видеороликлар, баннерлар, рисолалар, буклетлар тарқатилиб, ярмаркада таклиф этилаётган бўш иш ўринлари бўйича суҳбатлар ташкил қилинди.

Тадбирда 10 нафар ишсиз хотин-қизларга ҳоким ёрдамчилари тавсиялари асосида ўзини-ўзи банд қилиш орқали доимий даромадга эга бўлиши учун субсидия ҳисобидан тикув машиналари берилди ҳамда уларнинг бандлиги таъминланди.

Шунингдек, Манғит шаҳрининг Ойбек номли маҳалласида жойлашган Ахборот кутубхонасида 3 ойлик ўқув курсини битирган 10 нафар ишсиз хотин-қизларга “компьютер саводхонлиги” йўналишида сертификатлар топширилди ва уларга ушбу йўналишда фаолият юритишлари ва субсидия асосида тикув машиналари олишлари мумкинлиги тушунтирилди.

Ярмаркада 28 нафар фуқаро доимий ишга жойлаштирилдилар, шундан 16 нафари хотин-қизлар, 10 нафари ёшлар, 7 нафари олий таълим муассасаси битирувчиларидир. 7 нафар ишсиз фуқаролар эса касб-ҳунарга ўқитишга жалб қилинди.

Ярмарка давомида бўлим ходимлари томонидан бўш иш ўринлари, уларга аҳолини ишга жойлаштириш бўйича 18 фуқарога, ишсиз аҳолини касб-ҳунар ва тадбиркорликка ўқитиш бўйича 21 фуқарога, аҳолини хорижий давлатларда ишга жойлаштириш бўйича 17 фуқарога, аҳолининг меҳнат ҳуқуқлари ва меҳнат муҳофазасини таъминлаш бўйича 14 фуқарога ҳуқуқий маслаҳатлар, керакли маълумот ва тавсиялар, шунингдек, чет давлатларда ишлаш истагини билдирган фуқароларга ZOOM платформаси орқали тўғридан-тўғри иш берувчилар билан суҳбатларда қатнашиш имкониятлари мавжудлиги тўғрисида ҳам маълумотлар берилди.

Рашид Салаев, Амударё тумани Камбағалликни қисқартириш ва бандликка кўмаклашиш бўлими бошлиғи.