AHOLINING ISh BILAN BANDLIGINI TAʼMINLASh – XALQ FAROVONLIGINI TAʼMINLAShDIR

Mamlakatimizda aholining ish bilan bandligini taʼminlashga qaratilgan chora-tadbirlar tufayli yil sayin ishsizlik darajasi kamayishiga erishilmoqda. Bu borada Amudaryo tumani Kambagʻallikni qisqartirish va bandlikka koʻmaklashish boʻlimi tomonidan amalga oshirilayotgan rejali saʼy-harakatlar aholi bandligini taʼminlash bilan bogʻliq muammolar yechimini topishda muhim ahamiyat kasb etmoqda.

Joriy yilning 23-avgust kuni Amudaryo muhandislik texnikumi binosida boʻlib oʻtgan mehnat yarmarkasida ham tumanning turli hududlarida yashovchi koʻplab fuqarolar ning ish bilan bandligi taʼminlandi. Ochiqlik va shaffoflik asosida boʻlib oʻtgan mehnat yarmarkasida Amudaryo tuman prokurori, adliya maslahatchisi Abat Jumamuratov, mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchilari hamda boshqa hamkor tashkilotlar, tijorat banklari vakillari qatnashdilar.

Yarmarkada tumandagi 97 ta korxona va tashkilotlar vakillari 509 ta boʻsh (vakant) ish oʻrinlari bilan ishtirok etdilar. Mehnat yarmarkasida 63 nafar ishsiz fuqarolar, aliment toʻlovchilar, nogironligi boʻlgan shaxslar, bitiruvchi yoshlar korxona va tashkilotlar tomonidan taklif etilgan boʻsh ish oʻrinlari bilan batafsil tanishdilar va oʻzlarining kasbiy koʻnikmalariga mutanosib ish oʻrinlarini tanlashlari uchun zarur sharoitlar yaratildi.

Yarmarkani Amudaryo tumani Kambagʻallikni qisqartirish va bandlikka koʻmaklashish boʻlimi boshligʻi Rashid Salayev ochdi va olib bordi. Shuningdek, Rashid Salayev yarmarka orqali tavsiya etilayotgan boʻsh ish oʻrinlari toʻgʻrisida batafsil maʼlumotlar berdi. Shundan soʻng, yarmarka ishtirokchilariga Kambagʻallikni qisqartirish va bandlikka koʻmaklashish boʻlimi xodimlari tomonidan boʻsh ish oʻrinlari va ularga aholini ishga joylashtirish, ishsiz aholini kasb-hunarga oʻqitish aholini xorijiy davlatlarga ishga joylashtirish hamda ularning mehnat huquqlari va mehnat muhofazasini taʼminlash masalalari boʻyicha huquqiy maslahat va maʼlumotlar olishlari uchun barcha sharoitlar, jumladan, videoroliklar, bannerlar, risolalar, bukletlar tarqatilib, yarmarkada taklif etilayotgan boʻsh ish oʻrinlari boʻyicha suhbatlar tashkil qilindi.

Tadbirda 10 nafar ishsiz xotin-qizlarga hokim yordamchilari tavsiyalari asosida oʻzini-oʻzi band qilish orqali doimiy daromadga ega boʻlishi uchun subsidiya hisobidan tikuv mashinalari berildi hamda ularning bandligi taʼminlandi.

Shuningdek, Mangʻit shahrining Oybek nomli mahallasida joylashgan Axborot kutubxonasida 3 oylik oʻquv kursini bitirgan 10 nafar ishsiz xotin-qizlarga “kompyuter savodxonligi” yoʻnalishida sertifikatlar topshirildi va ularga ushbu yoʻnalishda faoliyat yuritishlari va subsidiya asosida tikuv mashinalari olishlari mumkinligi tushuntirildi.

Yarmarkada 28 nafar fuqaro doimiy ishga joylashtirildilar, shundan 16 nafari xotin-qizlar, 10 nafari yoshlar, 7 nafari oliy taʼlim muassasasi bitiruvchilaridir. 7 nafar ishsiz fuqarolar esa kasb-hunarga oʻqitishga jalb qilindi.

Yarmarka davomida boʻlim xodimlari tomonidan boʻsh ish oʻrinlari, ularga aholini ishga joylashtirish boʻyicha 18 fuqaroga, ishsiz aholini kasb-hunar va tadbirkorlikka oʻqitish boʻyicha 21 fuqaroga, aholini xorijiy davlatlarda ishga joylashtirish boʻyicha 17 fuqaroga, aholining mehnat huquqlari va mehnat muhofazasini taʼminlash boʻyicha 14 fuqaroga huquqiy maslahatlar, kerakli maʼlumot va tavsiyalar, shuningdek, chet davlatlarda ishlash istagini bildirgan fuqarolarga ZOOM platformasi orqali toʻgʻridan-toʻgʻri ish beruvchilar bilan suhbatlarda qatnashish imkoniyatlari mavjudligi toʻgʻrisida ham maʼlumotlar berildi.

Rashid Salayev, Amudaryo tumani Kambagʻallikni qisqartirish va bandlikka koʻmaklashish boʻlimi boshligʻi.