IQTIDORLI SOZANDA

Soz va musiqa sehriga maftun boʻlmaydigan inson boʻlmasa kerak. Ajdodlarimiz maʼnaviy hayotining mahsuli boʻlgan musiqa sanʼati, uning sehrli olami har kimni ham oʻziga tortadi.
Sanʼat sohasini tanlagan, yaqindan beri tuman Madaniyat boʻlimidagi musiqa toʻgaragiga rahbarlik qilib, oʻquvchi-yoshlarga qashqar rubobini chalishni oʻrgatib kelayotgan Ilyosbek Oʻrinboyev yosh boʻlishiga qaramasdan koʻplab shogirdlar orttirishga ulgurdi. Oʻzining oliygohda oʻrgangan bilimlarini sidqidildan kichik havaskorlarga oʻrgatib kelayotgan bu iqtidorli yigit tez fursatda ham ustozlari va hamkasblarining, ham tobora safi ortayotgan shogirdlarining mehrini qozonishga ulgurdi.
Ilyosbek 1996-yilda Tosh yop ovulidagi namunali oilalardan biri boʻlgan Ilhom aka Xudoyorov va Rohatoy opa Yusupovalar xonadonida dunyoga keldi. Bu xonadon aʼzolarining sanʼatga mehri boʻlakcha boʻlgani sababli u ham soz chalishga kichikligidan qiziqdi. Otasi Ilhom aka tumandagi 4-sonli MTTda musiqa oʻqituvchisi boʻlganligi sababli Ilyosbekning iqtidorini rivojlantirishga eʼtibor qaratib, musiqa asboblarini chalishni oʻrganishiga sharoit yaratdi. Ovuldagi 5-sonli maktabga 2003-yilda 1-sinfga qadam qoʻygan Ilyosbek musiqa darslarini alohida diqqat bilan kuzatar, ustozi bergan bilimlarni qunt bilan oʻrganardi. Ayniqsa, maktabda oʻtkaziladigan bayram tadbirlarida ishtirok etib, birorta qoʻshiq kuylash uning jonu-dili edi.
Maktabdagi musiqa fani oʻqituvchisi tavsiyasi, qolaversa, Ilyosbekning oʻzining tobora ortayotgan qiziqishi sababli uni tumandagi musiqa maktabidagi toʻgaraklarga qatnab, qashqar rubob chalishni mukammal oʻrgana boshladi. Bu bilan cheklanib qolmasdan, mashgʻulotlar davomida sanʼat, musiqa sirlarini ham chuqurroq bilib olishga intildi. Turli tadbirlarda oʻzining iqtidorini namoyon etib, eʼtiborga tushgan yosh havaskor 2012-yilda umumtaʼlim maktabini tugatganidan soʻng, Nukus madaniyat va sanʼat kollejining xalq cholgʻulari boʻlimida tahsil oldi va 2015-yilda qashqar rubob mutaxassisligini  tugatdi.
Ilyosbek 2017-21-yillarda Oʻzbekiston davlat sanʼat va madaniyat institutida folklor-etnografiya yoʻnalishida oʻqib tahsil oldi. U talabalik davrida ham tirishqoqligi, intiluvchanligi bilan ustozlarining olqishiga sazovor boʻldi, samimiyligi, eʼtiborliligi bilan doʻstlarining qalbidan joy oldi. Darslardagi bilim bilan cheklanib qolmasdan, oʻzi mustaqil izlanib oʻrganishdan erinmaydigan Ilyosbek atrofdagilarga bilganlarini oʻrgatishdan aslo charchamadi. Ayniqsa, qoraqalpoq milliy cholgʻusi boʻlgan alamuynaq dutorini chalishga juda qiziqdi va oʻrganib, folklor qoʻshiqlarini shu soz joʻrligida kuylashni eng sevimli mashgʻulotiga aylantirdi.
 Bugungi kunda tuman Madaniyat boʻlimidagi faoliyati davomida ham qisqa fursat ichida namunali xulqi va tirishqoqligi bilan jamoa orasida obroʻ-eʼtibor topishga erishdi. Ayni paytda Ilyosbek nafaqat tumanda, balki Respublika miqyosida oʻtkazilayotgan  bayram  tadbirlarda, tanlovlarda ham faol ishtirok etib, faxrli oʻrinlarni egallab kelmoqda. Zimmasiga yuklatilgan vazifalarni bekamu-koʻst  bajarib,  fidoyilik bilan  mehnat  qilmoqda.
Oilada Ilyosbekning ukalari Anvar, Sardorlar ham otasi Ilhom aka va akasining izidan borib, sanʼat yoʻnalishiga ixlos qoʻyishgan. Ular ishdan boʻsh vaqtlarida uydagi pianino va boshqa musiqa asboblarida turli kuylarni chalishni mashq qilishadi. Qarindosh, qoʻni-qoʻshnilarning tuy-hashamlarida shirali ovozda qoʻshiq aytib, barchani xushnud etishadi.
Iqtidorli sozanda Ilyosbek qashqar rubobini qoʻliga olib, maqom kuylarini maromiga keltirib chalganida davralarga fayz kiradi. Har qanday tinglovchi u chalgan musiqani, kuylagan qoʻshiqni maroq bilan tinglaydi. Tuman Madaniyat boʻlimidagi bu eng yosh murabbiy havaskorlarga milliy cholgʻu asboblarini chalishni, sanʼatni qadrlashni oʻrgatish, ularning iqtidorlarini rivojlantirish bilan birga, oʻzi ham oʻzbek estradasi yoʻnalishida ijod qilib, soha rivojiga munosib hissa qoʻshishni ezgu maqsadiga aylantirgan. Hozirda u mana shu niyatini amalga oshirish yoʻlida sidqidildan harakat qilmoqda.

Ozoda Xudoyberganova.