Amudaryo tuman ixtisoslashtirilgan maktabi – iqtidorli yoshlar uchun imkoniyatlar maskani

Mamlakatimizda yosh avlodning intellektual salohiyatini rivojlantirish, ularning iqtidorini har tomonlama qoʻllab-quvvatlash, zamonaviy taʼlimga oid xalqaro tajribalarni joriy etish, ilm-fanga intilish ruhini shakllantirish davlat siyosati darajasidagi ustuvor vazifalardan biridir. Ana shunday ezgu maqsadlarni amalga oshirish yoʻlidagi muhim qadamlardan biri sifatida Prezidentning 2022-yil 14-aprel kungi Farmoni asosida Amudaryo tumanida ixtisoslashtirilgan maktab tashkil etilgani yoshlar uchun beqiyos imkoniyatlar eshigini ochdi.

2022-2023 oʻquv yilidan eʼtiboran oʻz faoliyatini boshlagan Amudaryo tuman ixtisoslashtirilgan maktabi qisqa fursat ichida tumandagi ilgʻor taʼlim maskanlaridan biriga aylandi. Maktabning bosh maqsadi – jahon tajribasi asosida keng dunyoqarashga, chuqur bilim va ilmiy salohiyatga ega, tanqidiy fikrlaydigan, zamonaviy texnologiyalardan xabardor va kelajakda milliy taraqqiyotga oʻz hissasini qoʻsha oladigan yoshlarni tayyorlashdan iborat.

Bu yerda taʼlimga yangicha yondashuv, innovatsion usullar asosida dars oʻtish, fanlararo integratsiyani taʼminlash va eng asosiysi, har bir oʻquvchi iqtidoriga koʻra individual yondashish printsipi joriy qilingan. Shu bois maktab oʻquvchilari nafaqat dars paytida, balki darsdan tashqari vaqtlarda ham oʻz qobiliyatlarini namoyon etish imkoniyatiga ega.

Maktabda darslar taʼlimga yangicha yondashuv va innovatsion usullar asosida olib boriladi. Oʻquvchilarda nazariy va amaliy bilimlarni uygʻunlashtirish bilan birga, ularning koʻnikma va iqtidorlarini oshirishga xizmat qiladigan turli toʻgaraklar ham yoʻlga qoʻyilgan. Jumladan, aniq va tabiiy fanlar, sunʼiy intellekt, robototexnika kabi zamonaviy yoʻnalishlar boʻyicha bepul toʻgaraklar faoliyat koʻrsatmoqda. Shuningdek, IELTS, TOEFL, SAT va milliy sertifikat imtihonlariga tayyorlov kurslari tashkil qilingani, bu yerdagi taʼlim darajasining xalqaro mezonlarga mos ekanidan dalolat beradi.

Amudaryo tuman ixtisoslashtirilgan maktabi zamonaviy taʼlim talablariga toʻla javob beradigan infratuzilmasi bilan ajralib turadi. Mazkur maktabda oʻquvchilarning taʼlim olishi, izlanishi va fanga boʻlgan qiziqishini rivojlantirish uchun barcha zarur shart-sharoitlar yaratilgan. Maktab binosida 120-oʻringa moʻljallangan faollar zali mavjud. Bu zalda turli maʼnaviy-maʼrifiy tadbirlar, uchrashuvlar, seminar va forumlar tashkil etilib, oʻquvchilarning ijtimoiy faolligi oshirilmoqda. Shu bilan birga, maktabda 2 ta zamonaviy kompyuter sinfxonasi tashkil etilgan boʻlib, ular zamonaviy texnika vositalari bilan jihozlangan. Bu esa oʻquvchilarga axborot texnologiyalari, sunʼiy intellekt va robototexnika kabi yoʻnalishlarda chuqur bilim olish imkonini beradi.

Maktabda tabiiy fanlarga alohida eʼtibor qaratiladi. Xususan, kimyo, biologiya va fizika fanlari uchun moʻljallangan laboratoriyalar toʻliq jihozlangan. Bu laboratoriyalar orqali oʻquvchilar nazariy bilimlarini amaliy tajriba bilan bogʻlaydilar, murakkab jarayonlarni mustaqil oʻrganish imkoniga ega boʻladilar. Ushbu infratuzilma maktabning umumiy taʼlim sifatiga ijobiy taʼsir koʻrsatib, oʻquvchilarning fanga boʻlgan qiziqishini oshirish, ularning bilim va koʻnikmalarini hayotda qoʻllay oladigan, ilmiy fikrlashga ega shaxs sifatida shakllanishiga xizmat qilmoqda. Shu tariqa, maktab infratuzilmasi taʼlimning samaradorligini oshirish bilan birga, iqtidorli yoshlarning salohiyatini yuzaga chiqarishga ham muhim hissa qoʻshmoqda.

2023–2024 oʻquv yili natijalari Amudaryo tuman ixtisoslashtirilgan maktabida taʼlim samaradorligining yuqori darajada ekanini koʻrsatdi. Maktab bitiruvchilari bilimlari va intilishi bilan katta muvaffaqiyatlarga erishmoqda. Jumladan, oʻtgan oʻquv yilida 45 nafar bitiruvchi yurtimizning yetakchi oliy taʼlim muassasalariga yuqori ballar bilan qabul qilindi. Hozirda esa 80 nafar bitiruvchining ham 100 foiz natija bilan oliygohlarga oʻqishga kirishi kutilmoqda. Bu esa maktabdagi oʻquv-tarbiya jarayonining samaradorligi, oʻqituvchi va oʻquvchilarning birgalikdagi mehnati samarasi sifatida eʼtirof etiladi.

Bundan tashqari, maktab oʻquvchilari respublika va xalqaro miqyosda oʻtkazilayotgan turli tanlovlar hamda olimpiadalarda ham faol ishtirok etib, munosib yutuqlarga erishmoqdalar. Xususan, 11-sinf oʻquvchisi Jahongir Yoʻldoshev AQShning TOP-300 roʻyxatiga kiruvchi 6 ta nufuzli oliy taʼlim muassasasiga grant asosida oʻqishga qabul qilindi. Bu nafaqat oʻquvchining shaxsiy yutugʻi, balki maktab jamoasining ham faxri hisoblanadi.

Asosiy fan olimpiadasining III bosqichida maktab oʻquvchilari 10 ta sovrinli oʻrinni qoʻlga kiritdi, respublika bosqichida esa 2 nafar oʻquvchi munosib ishtirok etdi. Shu bilan birga, STEAM fanlari boʻyicha tashkil etilgan olimpiadada 7 nafar oʻquvchi sovrindor boʻlib, ulardan 4 nafari respublika bosqichida qatnashish huquqini qoʻlga kiritdi. Qizlar oʻrtasida oʻtkazilgan matematika olimpiadasida ham maktab oʻquvchilari faol ishtirok etib, 2 nafar qiz respublika bosqichida oʻz bilim va salohiyatini namoyon etdi.

Ushbu yutuqlar maktabda yuqori saviyadagi taʼlim-tarbiya jarayoni tashkil etilganini, oʻquvchilarning ilmiy va intellektual salohiyatini yuzaga chiqarish uchun yaratilgan shart-sharoitlar oʻz samarasini berayotganini yaqqol koʻrsatib turibdi. Maktab jamoasi bundan keyin ham yosh avlodning bilimli, iqtidorli va vataniga sadoqatli shaxslar boʻlib voyaga yetishi uchun barcha imkoniyatlarni safarbar etishda davom etadi.

Amudaryo tuman ixtisoslashtirilgan maktabi oʻquvchilari umumtaʼlim fanlari boʻyicha ham yuqori natijalarga erishib, turli sertifikatlarga sazovor boʻlmoqdalar. Jumladan, 7-sinf oʻquvchilaridan 1 nafari IELTS, 1 nafari esa CEFR sertifikatiga ega boʻldi. 8-sinfda 2 nafar, 9-sinfda 6 nafar, 10-sinfda 18 nafar, 11-sinfda esa 47 nafar oʻquvchi umumtaʼlim fanlari boʻyicha xalqaro va milliy darajadagi sertifikatlarni qoʻlga kiritdi. Bu koʻrsatkich maktab oʻquvchilarining chet tillari va boshqa fanlar boʻyicha bilim darajasining yuqoriligini yaqqol namoyon etmoqda.

Maktabda taʼlim sifati yuqori darajada taʼminlangan boʻlib, bu birinchi navbatda bilimli va tajribali pedagog kadrlar mehnati samarasidir. Hozirgi kunda maktabda 25 nafar oliy toifali, 23 nafar I toifali va 4 nafar II toifali oʻqituvchi faoliyat yuritmoqda. Shu bilan birga, 2 nafar oliy maʼlumotli mutaxassis va 47 nafar oʻqituvchi milliy sertifikatlarga ega. Bu oʻqituvchilar zamonaviy taʼlim metodlarini qoʻllash orqali oʻquv jarayonini yanada samarali tashkil etmoqdalar. Qolaversa, 4 nafar pedagog “Vazir ustamasi”ga ega boʻlib, oʻz sohasida yuqori mahorat va ilgʻor tajriba namoyish etmoqda.

Ushbu mutaxassislarning fidokorona mehnati va bilim berishdagi zamonaviy yondashuvi maktabning taʼlim sifatiga, oʻquvchilarning muvaffaqiyatlariga va ularning kelajakdagi yutuqlariga asosiy zamin yaratmoqda. Bu koʻrsatkichlar taʼlim sifati bilan bogʻliq asosiy mezonlardan biri — pedagog kadrlar salohiyati yuqori ekanini koʻrsatadi.

Amudaryo tuman ixtisoslashtirilgan maktabiga qabul jarayoni tanlov asosida, belgilangan aniq fanlar va ingliz tilidan test sinovlari orqali amalga oshiriladi. Bu jarayon maktabning yuqori taʼlim sifati va iqtidorli oʻquvchilarni saralashga qaratilgan tizimli yondashuvini namoyon etadi. Har yili 5-sinfga 48 nafar oʻquvchilar qabul qilinadi.

Talabgorlardan qabul jarayonida tugʻilganlik haqidagi guvohnomaning nusxasi, soʻnggi ikki oy ichida tushirilgan 3x4 santimetr oʻlchamdagi rasm hamda ota-onasi yoki qonuniy vakili pasporti nusxasi talab qilinadi.

Qabul jarayonining shaffofligi, adolatliligi va aniq mezonlar asosida amalga oshirilishi maktabdagi taʼlim sifati, oʻz navbatida, qobiliyatli va izlanuvchan oʻquvchilarni jalb qilish imkonini beradi. Bu esa maktabning yuksak natijalarga erishishida muhim omillardan biri hisoblanadi.

Amudaryo tuman ixtisoslashtirilgan maktabi – bu nafaqat taʼlim muassasasi, balki iqtidorlarni aniqlaydigan va ularga yoʻl ochib beradigan ilmiy-maʼrifiy maskandir. Ushbu maktab tuman yoshlari uchun kelajakka ishonch bilan odimlash, orzu va maqsadlar sari intilish yoʻlida muhim poydevor boʻlib xizmat qilmoqda.

Zero, taʼlim – taraqqiyot tayanchi, ilm – milliy yuksalish garovidir. Shu maʼnoda, bunday imkoniyatlar maktabida taʼlim olayotgan yoshlar ertangi rivojlangan Oʻzbekistonning salohiyatli yetakchilariga aylanishi shubhasiz.

Shohzod Qurbonboyev.