ИҚТИДОРЛИ СОЗАНДА

Соз ва мусиқа сеҳрига мафтун бўлмайдиган инсон бўлмаса керак. Аждодларимиз маънавий ҳаётининг маҳсули бўлган мусиқа санъати, унинг сеҳрли олами ҳар кимни ҳам ўзига тортади.
Санъат соҳасини танлаган, яқиндан бери туман Маданият бўлимидаги мусиқа тўгарагига раҳбарлик қилиб, ўқувчи-ёшларга қашқар рубобини чалишни ўргатиб келаётган Илёсбек Ўринбоев ёш бўлишига қарамасдан кўплаб шогирдлар орттиришга улгурди. Ўзининг олийгоҳда ўрганган билимларини сидқидилдан кичик ҳаваскорларга ўргатиб келаётган бу иқтидорли йигит тез фурсатда ҳам устозлари ва ҳамкасбларининг, ҳам тобора сафи ортаётган шогирдларининг меҳрини қозонишга улгурди.
Илёсбек 1996 йилда Тош ёп овулидаги намунали оилалардан бири бўлган Илҳом ака Худоёров ва Роҳатой опа Юсуповалар хонадонида дунёга келди. Бу хонадон аъзоларининг санъатга меҳри бўлакча бўлгани сабабли у ҳам соз чалишга кичиклигидан қизиқди. Отаси Илҳом ака тумандаги 4-сонли МТТда мусиқа ўқитувчиси бўлганлиги сабабли Илёсбекнинг иқтидорини ривожлантиришга эътибор қаратиб, мусиқа асбобларини чалишни ўрганишига шароит яратди. Овулдаги 5-сонли мактабга 2003 йилда 1-синфга қадам қўйган Илёсбек мусиқа дарсларини алоҳида диққат билан кузатар, устози берган билимларни қунт билан ўрганарди. Айниқса, мактабда ўтказиладиган байрам тадбирларида иштирок этиб, бирорта қўшиқ куйлаш унинг жону-дили эди.
Мактабдаги мусиқа фани ўқитувчиси тавсияси, қолаверса, Илёсбекнинг ўзининг тобора ортаётган қизиқиши сабабли уни тумандаги мусиқа мактабидаги тўгаракларга қатнаб, қашқар рубоб чалишни мукаммал ўргана бошлади. Бу билан чекланиб қолмасдан, машғулотлар давомида санъат, мусиқа сирларини ҳам чуқурроқ билиб олишга интилди. Турли тадбирларда ўзининг иқтидорини намоён этиб, эътиборга тушган ёш ҳаваскор 2012 йилда умумтаълим мактабини тугатганидан сўнг, Нукус маданият ва санъат коллежининг халқ чолғулари бўлимида таҳсил олди ва 2015 йилда қашқар рубоб мутахассислигини  тугатди.
Илёсбек 2017-21 йилларда Ўзбекистон давлат санъат ва маданият институтида фольклор-этнография йўналишида ўқиб таҳсил олди. У талабалик даврида ҳам тиришқоқлиги, интилувчанлиги билан устозларининг олқишига сазовор бўлди, самимийлиги, эътиборлилиги билан дўстларининг қалбидан жой олди. Дарслардаги билим билан чекланиб қолмасдан, ўзи мустақил изланиб ўрганишдан эринмайдиган Илёсбек атрофдагиларга билганларини ўргатишдан асло чарчамади. Айниқса, қорақалпоқ миллий чолғуси бўлган аламуйнақ дуторини чалишга жуда қизиқди ва ўрганиб, фольклор қўшиқларини шу соз жўрлигида куйлашни энг севимли машғулотига айлантирди.
 Бугунги кунда туман Маданият бўлимидаги фаолияти давомида ҳам қисқа фурсат ичида намунали хулқи ва тиришқоқлиги билан жамоа орасида обрў-эътибор топишга эришди. Айни пайтда Илёсбек нафақат туманда, балки Республика миқёсида ўтказилаётган  байрам  тадбирларда, танловларда ҳам фаол иштирок этиб, фахрли ўринларни эгаллаб келмоқда. Зиммасига юклатилган вазифаларни бекаму-кўст  бажариб,  фидойилик билан  меҳнат  қилмоқда.
Оилада Илёсбекнинг укалари Анвар, Сардорлар ҳам отаси Илҳом ака ва акасининг изидан бориб, санъат йўналишига ихлос қўйишган. Улар ишдан бўш вақтларида уйдаги пианино ва бошқа мусиқа асбобларида турли куйларни чалишни машқ қилишади. Қариндош, қўни-қўшниларнинг туй-ҳашамларида ширали овозда қўшиқ айтиб, барчани хушнуд этишади.
Иқтидорли созанда Илёсбек қашқар рубобини қўлига олиб, мақом куйларини маромига келтириб чалганида давраларга файз киради. Ҳар қандай тингловчи у чалган мусиқани, куйлаган қўшиқни мароқ билан тинглайди. Туман Маданият бўлимидаги бу энг ёш мураббий ҳаваскорларга миллий чолғу асбобларини чалишни, санъатни қадрлашни ўргатиш, уларнинг иқтидорларини ривожлантириш билан бирга, ўзи ҳам ўзбек эстрадаси йўналишида ижод қилиб, соҳа ривожига муносиб ҳисса қўшишни эзгу мақсадига айлантирган. Ҳозирда у мана шу ниятини амалга ошириш йўлида сидқидилдан ҳаракат қилмоқда.

Озода Худойберганова.