“Долзарб 90 кун” лойиҳаси доирасидаги тадбирлар 46-сонли мактабда иқтидорли ёшларни кашф этиш имконини бермоқда

Инсоннинг шахс сифатида шаклланиш жараёни унинг болалик ва ўсмирлик даврида олган билим ва кўникмаларига боғлиқ, дейишади. “Ёшликда олган билим – тошга ўйилган нақш” ибораси эса инсонга илм-у ҳунар эгаллаш борасидаги энг мақбул даври – ёшликнинг ҳар бир дақиқасидан унумли фойдаланишга даъват этаётган каби жаранглайди.

Шу нуқтаи назардан олиб қарайдиган бўлсак, жорий йилнинг 15 май санасида Президентимиз раҳбарлигида бўлиб ўтган, таълим тизимида амалга оширилаётган ислоҳотларга бағишланган видеоселектор йиғилишида шахсан давлатимиз раҳбари ташаббуси билан илгари сурилган “Долзарб 90 кун” лойиҳаси доирасида бутун мамлакатимиз бўйлаб кенг қулоч ёйган маънавий-маърифий тадбирлар ҳам моҳиятан ёшларнинг иқтидор ва салоҳиятларини ривожлантириш, уларни янги марралар сари руҳлантириш, умрнинг ўтаётган ҳар бир куни, ҳар бир дақиқасидан унумли фойдаланишга даъват қилаётгани билан муҳим аҳамият касб этмоқда.

Бу борада Амударё тумани ҳокимлиги, туман Мактабгача ва мактаб таълими бўлими ҳамда бошқада ҳамкор ташкилотлар масъуллари иштирокида ишлаб чиқилган режа асосида ташкиллаштирилаётган дилдан мулоқот тарзидаги давра суҳбатлари, “Уч авлод учрашуви”, шеърият ва китобхонлик кечалари, турли спорт мусобақаларида 7 ёшдан 17 ёшгача бўлган болалар, ўсмир-ёшлар иштирок этишмоқда.

Ана шундай кўнгилочар тадбирлардан бири туманнинг Хизр эли маҳалласи ҳудудидаги 46-сонли умумтаълим мактабида ҳам бўлиб ўтди. Мазкур таълим муассасасида ўқувчилар таътилга чиққан кундан эътиборан “Долзарб 90 кун” лойиҳаси доирасида амалга ошириладиган ишлар бўйича аниқ вазифалар белгилаб олинди ва шу асосда ўқувчи-ёшларнинг таътил даврини мазмунли ўтказишлари, ўзларининг қизиқиш ва иқтидорларини амалда намоён этишлари учун бир неча йўналишларда тўгараклар фаолияти йўлга қўйилиб, зарур шарт-шароитлар яратилди.

Айниқса, ўқувчи-ёшларнинг бўш вақтларини мазмунли ўтказишга қаратилган спорт-соғломлаштириш мусобақалари, бадиий ҳаваскорлик тўгараклари аъзолари иштирокидаги маънавий-маърифий кўнгилочар тадбирлар ўсиб келаётган ёш авлод қалбида миллий-маънавий қадриятларга ҳурмат туйғусини мустаҳкамлаб,, ватанпарвар, ўзаро меҳр-оқибатли инсонлар сифатида вояга етишларида муҳим омил бўлмоқда.

“Биз ватанпарвар ёшлармиз!” шиори остида ташкиллаштирилган уч авлод учрашуви тарзидаги тадбирда Амударё туман Оила ва хотин-қизлар бўлими раҳбари Гўзал Сабурова, Экология партияси Амударё туман Кенгаши раиси Саъдулла Содиқов, Амударё муҳандислик техникуми директори Шуҳрат Юлдашевлар ва мактаб педагогика жамоаси ҳамда ўқувчи-ёшлар иштирок этдилар.

Тадбир аввалида меҳмонлар мактаб директори Одилбек Жумабоев таклифига кўра, “Долзарб 90 кун” лойиҳаси доирасида ташкил этилган тўгараклар фаолияти билан яқиндан танишдилар. “Экология”, “Ёш китобхон”, “Ёш мусаввир” тўгараклари аъзолари томонидан ташкил этилган жонли табиат, китоблар ва расмлар, қўл меҳнати ва тўқимачилик маҳсулотлари кўргазмалари, шунингдек, ёшларни соғлом турмуш тарзига риоя қилишга ундовчи тўғри овқатланиш ва вақтида дам олиш бўйича йўналтиришга қаратилган санитария-гигиена талаблари бўйича ташкил этилган кўргазмалар тадбир меҳмонларида катта таассуротлар қолдирди.

Айниқса, математика ва мантиқ тўгараги аъзолари томонидан ташкиллаштирилган савол-жавоблар тарзидаги, инглиз тили тўгараги аъзоларининг жонли мулоқот кўринишидаги кўргазмали тақдимотлари Хизр эли маҳалласи ҳудудидаги 46-сонли мактабда ҳақиқий билимдон ва юксак салоҳиятли ёшлар таълим-тарбия олиб, ёзги таътил даврини ҳам ўзлари учун фойдали машғулотлар билан шуғулланиш орқали ижодкорлик билан мазмунли ўтказаётганликларни тадбир меҳмонлари алоҳида эътироф этдилар.

Тадбир давомида иштирокчилар мактабда ташкил этилган бокс, шахмат-шашка, волейбол ва футбол тўгараклари фаолияти билан ҳам яқиндан танишиб, мазкур тўгараклар аъзолари билан мулоқотда бўлдилар.

Шу куни “Долзарб 90 кун” доирасида 2-синф ўқувчилари учун йўл ҳаракати қоидалари бўйича дарс-машғулотлари, 5-синфларда “Заковат” интеллектуал ўйини, китобхонлик дарси ҳамда 2-синфларда “Эртаклар оламига саёҳат” тадбирлари ҳам ташкил қилиниб, бу тадбирларда ўқувчилар ўзларининг ёзги таътил пайтида эгаллаган билим ва кўникмаларини амалда намоён этдилар.

Мактаб бадиий ҳаваскорлик тўгараги аъзолари томонидан ижро этилган куй ва қўшиқлар тадбирга янада жозиба, кўнгилларга кўтаринки кайфият бағишлади.

Тадбир якунида Амударё туман Оила ва хотин-қизлар бўлими раҳбари Гўзал Сабурова, 2024-2025 ўқув йилида алоҳида ютуқларга эришган бир гуруҳ ўқитувчиларга туман ҳокимининг ташаккурномаларини тақдим этди ва ёшларнинг иқтидор ва қобилиятларини ривожлантириш, ёзги таътил даврида уларнинг бўш вақтларини мазмунли ўтказиш борасида фидойилик билан меҳнат қилаётган мактаб педагогика жамоасига миннатдорчилик билдирди.

РОБИЯ ЙЎЛДОШЕВА.