ЎЗБЕКИСТОН МАҲАЛЛАСИНИНГ ИҚТИДОРЛИ ҚИЗЛАРИ

Ҳар бир бола иқтидор эгаси бўлиб туғилади. Унинг иқтидорини юзага чиқариш эса ота-она ва мактабгача таълим, умумий ўрта таълим муассасалари ходимлари зиммасидадир. Болаларнинг илмли, ақлли ва етук бўлиб вояга етиши жамият тараққиёти учун ҳам зарурдир. Шунинг учун ўқитувчи-мураббийлар иқтидорли ўқувчиларни аниқлаши, уларни шу йўналишда ривожлантириши, уни юзага чиқаришга интилмоғи лозим.

Бунингдек шарафли вазифани адо этиш йўлида ҳаракат қилаётган Амударё туманидаги 44-сонли мактаб ўқитувчилари кўпгина ютуқларга эришмоқдалар.

Муассаса биноси қуввати 464 нафар ўқувчи ўрнига мўлжалланган бўлиб, ҳозирда 495 нафар ўқувчиларга 46 нафар ўқитувчилар таълим-тарбия беришмоқда. Уларнинг 12 нафари касб малакасига кўра ойлик устамага эга.

“Тараққиёт кўзгуси” газетаси таҳририяти амалга ошираётган “Билимли ва маънавиятли ёшлар билан – Учинчи Ренессанс сари” грант лойиҳаси иш режасига мувофиқ уларнинг бир гуруҳи билан яқиндан танишдик.

Мактабнинг 11-синф ўқувчиси Райҳон Назарбоева иқтидорли, интилувчан, умидли ёшларидан бири. У аъло хулқи, фан асосларини пухта эгаллаётганидан ўқитувчиларнинг эътиборига тушган. Шу боисдан улар Райҳон билан дарсдан ташқари алоҳида ҳам шуғулланишади ва дарс машғулотлари давомида олган билимларини мустаҳкамлайдилар.

Райҳон бадиий китоблар ўқишни ҳам яхши кўради. У “Ёш китобхон” кўрик-танловининг қуйи босқичларида ғолиб бўлиб, туман босқичида иштирок этди ва фахрли иккинчи ўринни эгаллади. Асосий фанлар олимпиадасининг туман босқичида она тили ва адабиёт фанидан иштирок этиб, қайд этган натижаларига кўра, кучли ўнталикка кирди.

Райҳон Назарбоеванинг ўз келажаги учун белгилаган орзулари юксак -бошланғич таълим ўқитувчиси бўлиб, жажжи ўғил-қизларни илмлар дунёси сари етаклаш, ўқиб, билим олишга қизиқтириш, иқтидорларига кўра ривожлантириш.

Мазкур мактабнинг 2-синф ўқувчиси Дилнура Аҳмаджонова эса аъло ўқиш билан бирга туман спорт мактабининг гимнастика тўгарагида бадиий гимнастика билан шуғулланади. Бу жажжигина қизалоқнинг Ўзбекистон маҳалласидан Манғит шаҳрига қатнаб, устози Шаҳодат Ражабова машғулотларида ушбу спорт турини нечоғлик яхши эгаллаётганини турли мусобақаларда эришган натижалари яққол кўрсатиб турибди.

У 2023 йилда Тошкент шаҳрида “Весёлые звёздочки” номли билан 2009-2019 йилларда туғилган қизлар ўртасида ўтказилган бадиий гимнастика бўйича республика очиқ турнир, Урганч шаҳар, Нукус шаҳар, Боғот туман спорт мактаблари ўтказган очиқ биринчилик мусобақаларининг ғолиби. Келажакда спортчи бўлишни ният қилиб машғулотларни пухта ўзлаштираётган қизалоқ ўз натижалари билан туманимиз спорт шарафини юксалтиришни ният қилган.

Туман спорт мактабининг гимнастика тўгарагида бадиий гимнастика маҳоратини қунт билан ўрганаётган иқтидорли қизларнинг бири Севинчой Гулимбетовадир. У 44-сонли мактабнинг 3-синфида ўқийди. Уч йилдан бери дарсдан бўш вақтларида Ўзбекистондан Манғитга қатнаб, туман спорт мактабида мураббий Шаҳодат Ражабова раҳбарлигидаги бадиий гимнастика гуруҳи машғулотларида қатнашади.

Ўз маҳоратини оширишга сидқидилдан интилаётган қизалоқнинг спортда эришган ютуқлари кўпчиликка ибрат бўлгулик. Хусусан, у “Спорт маликалари”, “Қиш эртаги” республика мусобақаларида биринчи, иккинчи ўринларни, Беруний туман спорт мактаби, Навоий шаҳар спорт мактаби, Нукус шаҳар 1-сонли спорт мактаб очиқ биринчиликларида фахрли ўринларни эгаллади. 2023 йил “Весёлые звёздочки” номли республика мусобақасида биринчи, “Янги йил саргузаштлари” республика очиқ турнирида иккинчи ўринни енгиб олди. Унинг ҳисобидаги медаллар шодасининг 9таси 1-ўрин учун берилган.

Севинчой ўзи эришаётган ғалабалари замирида мураббийи Шаҳодат Ражабованинг, ўзининг спорт билан шуғулланишига шароит яратиб берган ота-онасининг эътибори, ғамхўрлиги борлигини фахр билан айтади.

Орзулари осмон қадар юксак Ўзбекистон маҳалласининг бу иқтидорли қизларининг келажаги порлоқ бўлишини тилаб қоламиз.

Ойгул РАЖАБОВА.