“OBOD MAHALLA”da hovli toʻylari

Xushxabar yaxshi-da, odamning dilini yayratib yuboradi. Tanish-u notanish hamyurtlarimizning quvonchlari, hayotlaridagi oʻzgarishlar, turmush tarziga monand yangilanishlar haqidagi xushxabarlar bizni hamisha safarga chorlaydi. Ayniqsa, bayram sanalari yaqinlashganda tahririyatimizga har kuni hech boʻlmaganda ikki-uchta quvonchli xabar keladi. Axir toʻyga toʻyonalar tayyorlash xalqimiz uchun bobomeros anʼana-ku, - deymiz-da, yurtdoshlarimizning yaxshi kunlarida birga boʻlish uchun ijodiy safarga otlanamiz.

Bugun ham shunday boʻldi. Mustaqillik bayrami arafasida "Amudaryo suv qurilish boshqarmasi” MChJ quruvchilari 10 ta namunali uy-joylar kalitini egalariga topshirishni boshlagani, namunali uy-joylarda hovli toʻylari oʻtkazilayotgani haqida maqola tayyorlash uchun Mangʻit shahrining "Taqir qalʼa” mavzesiga yoʻl oldik.

"Taqir qalʼa”, dedik. Bu mavze, agar "taqir” degan atamadan kelib chiqib nisbat beradigan boʻlsak, kechagi tap-taqir dala-dashtdan asar ham topa olmaysiz. Nisbatan qisqa davr – 4-yil ichida bu hudud haqiqiy obod va goʻzal maskanga aylantirildi. Davlatimiz tomonidan yaratib berilgan imkoniyatlardan, qulay shart-sharoitlardan bahramand yashayotgan oʻnlab yangi xonadon sohib va sohibalarining quvonchlari cheksiz.

Yaqindagina, 2014-yilning 30-iyul kuni Qoraqalpogʻiston Respublikasi Joʻqorgʻi Kengesi Prezidiumining "Amudaryo tumanidagi ayrim geografik obʼektlarning nomlariga oʻzgartish kiritish haqida”gi 288-sonli qaroriga asosan Mangʻit shahrining bu yangi mavzesiga "Obod mahalla” nomi berildi.

- Obod, desa obod, degulik, - deydi yangi uyga koʻchib oʻtgan yangi xonadon bekasi Sanobarxon Firsik. – Hamma shart-sharoitlar muhayyo. Tabiiy gaz, issiq-sovuq suv bilan taʼminlangan, kanalizatsiya tizimiga ega. Bunaqa qulaylik avval biz uchun xayoliy orzu edi.

- Orzularingiz hayotingizga aylanibdi-da, muborak boʻlsin! – quvonchlariga sherik boʻldik Sanobarning.

Xonadon bekasi quvona-quvona uy xonalarini koʻrsatadi.

- Mana bunisi mehmonxona, - deydi keng va yorugʻ, peshayvonli xona eshiklarini ochib.

Mehmonxonaning oshxonaga, vannaxonaga yaqin joylashgani uy bekasi uchun ham, mehmonlar uchun ham qulay. Aylanma shakldagi dolon esa qatorasiga joylashgan oromxonalar va bolalar uchun moʻljallangan qoʻshimcha xona havosini moʻʼtadillashtirib turadi. Barcha qulayliklarga ega oshxonaning kengligidan Sanobar ham, uning umr yoʻldoshi Azimboy Chorshamov ham xursand.

- Kuzgacha tomorqa yerimizni ekishga tayyorlab qoʻysak, uzum, anor, olma koʻchatlarini oʻtqazaman, - deydi Azimboy. – Hovli-joylarimizni kelasi yil tanimay qolasiz. Bogʻli hovli qilamiz hali!

Biz borgan kunimizdan bir kun avval hovli toʻyi oʻtkazgan Azimboy bilan Sanobarning quvonchi cheksiz. "Hasan-Husan veterinariya servis” MChJ raisi Azimboy Chorshamovning, MChJninghar bir ishiga masʼuliyat bilan qarab, umr yoʻldoshiga hamisha qoʻl-qanot boʻlib kelayotgan Sanobar Firsikning va bu ahil oila farzandlarining hayotiga kirib kelgan quvonchga oshno boʻlib, chiroyli turmush sharoitiga chin dildan havas qildik.

- Avvalgi uyimiz judayam eskirgan edi, - deydi Sanobar. – Jiddiy taʼmirlash holatiga kelib qolgandi. Oʻylab qarasak, taʼmirlash ishlari uchun ketadigan mablagʻni namunali uy-joylardan biri uchun oʻtkazsak, qolgan qismi uzoq muddatli bank krediti evaziga bitib qolarkan. Oʻzaro maslahatlashib, bir qarorga keldik-da, hujjatlarni rasmiylashtirdik. Bir yilning nari-berisida yangi hovli-joyli boʻldik. Eng asosiysi, yugur-yugurdan, asabbuzarliklardan qutuldik, quruvchilarga rahmat!

Bugun "Obod mahalla”da har kuni bir hovli toʻyi, har kuni bir baxtli oila yangi hovli-joyga koʻchib oʻtayotir. Ozod va obod, farovon hayotimizning quvonchlari, mustaqil Vatanning farogʻatga toʻla tarovatli lahzalari "Obod mahalla” tonglarida oʻz aksini topayotir. Ana, "Obod mahalla”ning yana bir obod xonadonida shoʻx-shodon kulgular sasi - yana bir oilaning hovli toʻyiga chorlov!Bunday shodliklar, chorlovlar mangu boʻlsin!

Robiya YOʻLDOShEVA.