Mustaqillik bayrami oldidan keng koʻlamli obodonlashtirish ishlari davom etmoqda

Yurtimiz boʻylab eng ulugʻ va eng aziz ayyom – Oʻzbekiston Respublikasi davlat mustaqilligining 35 yilligini keng koʻlamda nishonlashga puxta hozirlik koʻrilmoqda. Ozod va obod yurtimizning barcha goʻshalarida katta shodiyona oldidan oʻziga xos tayyorgarlik jarayonlari qizgʻin pallaga kirgan. Bu yilgi bayram tadbirlari “Yagona Vatan, yagona xalq boʻlib, yangi hayot va kelajak yaratamiz!” degan elu yurtni birlashtiruvchi, qalblarga faxr va iftixor tuygʻularini baxsh etuvchi ezgu gʻoya ostida nishonlanadi. Ushbu shonli sanani har tomonlama munosib hamda yuqori saviyada kutib olish maqsadida butun respublikamiz hududlarida boʻlgani kabi, Amudaryo tumanida ham keng koʻlamli obodonlashtirish, koʻkalamzorlashtirish va bunyodkorlik ishlari uyushqoqlik bilan tashkil etilmoqda.

Hududlarda olib borilayotgan ushbu keng qamrovli obodonlashtirish tadbirlaridan koʻzlangan asosiy maqsad, eng avvalo, mahalla ahli uchun yanada qulay, toza-ozoda va har tomonlama fayzli muhit yaratishdan iboratdir. Qolaversa, chekka hududlar va mahallalarning sanitariya holatini tubdan yaxshilash, aholi oʻrtasida sogʻlom turmush tarzini keng targʻib qilish hamda ekologik barqarorlikni taʼminlash ustuvor vazifalar qatorida belgilangan. Shu orqali eng ulugʻ va eng aziz bayramimiz boʻlmish Mustaqillik ayyomini barcha xonadonlarda, mahalla va koʻchalarda munosib, koʻtarinki hamda oʻziga xos bayramona kayfiyatda kutib olish uchun zarur shart-sharoitlar yaratilmoqda. Obodlik koʻngildan boshlanadi, deganlaridek, bugun yurtdoshlarimizning qalbidagi poklik ularning yon-atrofni goʻzallashtirish yoʻlidagi saʼy-harakatlarida oʻz aksini topmoqda.

Amudaryo tumanining barcha ovul va mahallalarida ham umumxalq hasharlari qizgʻin davom etmoqda. Jumladan, tumandagi Choykoʻl ovulida ham bayram oldidan tayyorgarlik ishlari avjida. Jarayonlarni bevosita nazorat qilish va xalq bilan hamnafas boʻlish maqsadida Amudaryo tumani hokimining oʻrinbosari Jasur Yaxshimov oʻzi masʼul qilib biriktirilgan ushbu ovulda boʻldi hamda hududda olib borilayotgan obodonlashtirish ishlari bilan yaqindan tanishib, mahalla faollari va aholi vakillari bilan yaqindan muloqot qildi. Bundan tashqari, jarayonlarni yanada jadallashtirish uchun zarur boʻlgan barcha tashkiliy hamda texnik yordamlarni koʻrsatdi. Hududlarga maxsus texnikalar jalb qilinib, ogʻir qoʻl mehnati talab etiladigan ishlarda aholiga yaqindan yordam koʻrsatilmoqda.

Choykoʻl ovuli aholisi oʻzaro hamjihatlikda milliy qadriyatimizga aylangan hashar yoʻli bilan hovlilari, koʻcha va guzarlarni tartibga keltirmoqdalar. Barcha xonadon egalari bayramni koʻtarinki ruhda kutib olish maqsadida ahillik va birdamlikda mehnat qilmoqda. Koʻcha boʻylari va ichki yoʻllar chetidagi manzarali hamda mevali daraxtlarga shakl berilib, oqlanmoqda. Shu bilan birga, suv yoʻllarining ravonligini taʼminlash, ekinlarni sugʻorishda muammolar kelib chiqmasligi uchun ariq va zovurlar turli chiqindilardan, xas-choʻplardan tozalanmoqda. Keksayu yoshning hamjihatlikda qilayotgan bunday mehnati natijasida butun hudud obod va koʻrkam qiyofa kasb etmoqda.

Mustaqilligimizning 35 yillik bayrami oldidan olib borilayotgan bu kabi bunyodkorlik va tozalik tadbirlari nafaqat koʻcha va mahallalarimizning qiyofasini tubdan yaxshilamoqda, balki odamlarning ruhiyatiga yuqori kayfiyat, qalbiga esa yurtga boʻlgan cheksiz muhabbat tuygʻularini baxsh etmoqda. Ovul ahlining yuz-koʻzlaridagi tabassum va ertangi kunga boʻlgan mustahkam ishonch elu yurtimizning "Yagona Vatan, yagona xalq boʻlib, yangi hayot va kelajak yaratamiz!" degan oliy maqsad yoʻlida jipslashganining amaliy ifodasidir. Zero, oʻz mahallasi va goʻshasini obod qilgan insonning hayoti ham, kelajagi ham albatta farovon boʻladi.