Мустақиллик байрами олдидан кенг кўламли ободонлаштириш ишлари давом этмоқда

Юртимиз бўйлаб энг улуғ ва энг азиз айём – Ўзбекистон Республикаси давлат мустақиллигининг 35 йиллигини кенг кўламда нишонлашга пухта ҳозирлик кўрилмоқда. Озод ва обод юртимизнинг барча гўшаларида катта шодиёна олдидан ўзига хос тайёргарлик жараёнлари қизғин паллага кирган. Бу йилги байрам тадбирлари “Ягона Ватан, ягона халқ бўлиб, янги ҳаёт ва келажак яратамиз!” деган элу юртни бирлаштирувчи, қалбларга фахр ва ифтихор туйғуларини бахш этувчи эзгу ғоя остида нишонланади. Ушбу шонли санани ҳар томонлама муносиб ҳамда юқори савияда кутиб олиш мақсадида бутун республикамиз ҳудудларида бўлгани каби, Амударё туманида ҳам кенг кўламли ободонлаштириш, кўкаламзорлаштириш ва бунёдкорлик ишлари уюшқоқлик билан ташкил этилмоқда.

Ҳудудларда олиб борилаётган ушбу кенг қамровли ободонлаштириш тадбирларидан кўзланган асосий мақсад, энг аввало, маҳалла аҳли учун янада қулай, тоза-озода ва ҳар томонлама файзли муҳит яратишдан иборатдир. Қолаверса, чекка ҳудудлар ва маҳаллаларнинг санитария ҳолатини тубдан яхшилаш, аҳоли ўртасида соғлом турмуш тарзини кенг тарғиб қилиш ҳамда экологик барқарорликни таъминлаш устувор вазифалар қаторида белгиланган. Шу орқали энг улуғ ва энг азиз байрамимиз бўлмиш Мустақиллик айёмини барча хонадонларда, маҳалла ва кўчаларда муносиб, кўтаринки ҳамда ўзига хос байрамона кайфиятда кутиб олиш учун зарур шарт-шароитлар яратилмоқда. Ободлик кўнгилдан бошланади, деганларидек, бугун юртдошларимизнинг қалбидаги поклик уларнинг ён-атрофни гўзаллаштириш йўлидаги саъй-ҳаракатларида ўз аксини топмоқда.

Амударё туманининг барча овул ва маҳаллаларида ҳам умумхалқ ҳашарлари қизғин давом этмоқда. Жумладан, тумандаги Чойкўл овулида ҳам байрам олдидан тайёргарлик ишлари авжида. Жараёнларни бевосита назорат қилиш ва халқ билан ҳамнафас бўлиш мақсадида Амударё тумани ҳокимининг ўринбосари Жасур Яхшимов ўзи масъул қилиб бириктирилган ушбу овулда бўлди ҳамда ҳудудда олиб борилаётган ободонлаштириш ишлари билан яқиндан танишиб, маҳалла фаоллари ва аҳоли вакиллари билан яқиндан мулоқот қилди. Бундан ташқари, жараёнларни янада жадаллаштириш учун зарур бўлган барча ташкилий ҳамда техник ёрдамларни кўрсатди. Ҳудудларга махсус техникалар жалб қилиниб, оғир қўл меҳнати талаб этиладиган ишларда аҳолига яқиндан ёрдам кўрсатилмоқда.

Чойкўл овули аҳолиси ўзаро ҳамжиҳатликда миллий қадриятимизга айланган ҳашар йўли билан ҳовлилари, кўча ва гузарларни тартибга келтирмоқдалар. Барча хонадон эгалари байрамни кўтаринки руҳда кутиб олиш мақсадида аҳиллик ва бирдамликда меҳнат қилмоқда. Кўча бўйлари ва ички йўллар четидаги манзарали ҳамда мевали дарахтларга шакл берилиб, оқланмоқда. Шу билан бирга, сув йўлларининг равонлигини таъминлаш, экинларни суғоришда муаммолар келиб чиқмаслиги учун ариқ ва зовурлар турли чиқиндилардан, хас-чўплардан тозаланмоқда. Кексаю ёшнинг ҳамжиҳатликда қилаётган бундай меҳнати натижасида бутун ҳудуд обод ва кўркам қиёфа касб этмоқда.

Мустақиллигимизнинг 35 йиллик байрами олдидан олиб борилаётган бу каби бунёдкорлик ва тозалик тадбирлари нафақат кўча ва маҳаллаларимизнинг қиёфасини тубдан яхшиламоқда, балки одамларнинг руҳиятига юқори кайфият, қалбига эса юртга бўлган чексиз муҳаббат туйғуларини бахш этмоқда. Овул аҳлининг юз-кўзларидаги табассум ва эртанги кунга бўлган мустаҳкам ишонч элу юртимизнинг "Ягона Ватан, ягона халқ бўлиб, янги ҳаёт ва келажак яратамиз!" деган олий мақсад йўлида жипслашганининг амалий ифодасидир. Зеро, ўз маҳалласи ва гўшасини обод қилган инсоннинг ҳаёти ҳам, келажаги ҳам албатта фаровон бўлади.