Amudaryo tumanida obodonlashtirish ishlari jadallik bilan davom etmoqda

Oʻzbekiston Respublikasi davlat mustaqilligining 35 yilligi munosabati bilan yurtimiz boʻylab “Dolzarb 40 kun” umumxalq aktsiyasi davom etmoqda. Joriy yilning 28-iyulidan 6-sentyabriga qadar oʻtkaziladigan mazkur tashabbus doirasida hududlarni obodonlashtirish, sanitariya-tozalash ishlarini kuchaytirish, atrof-muhit musaffoligini taʼminlash hamda aholining ekologik madaniyatini yuksaltirishga qaratilgan keng koʻlamli amaliy tadbirlar izchil davom ettirilmoqda.

“Yagona Vatan, yagona xalq boʻlib, yangi hayot va kelajak yaratamiz!” shiori ostida oʻtkazilayotgan ushbu ezgu tashabbuslar Amudaryo tumanida ham qizgʻin pallaga kirgan. Tumanning barcha hududlarida koʻchalar, mahallalar, jamoat maskanlari, taʼlim muassasalari va tashkilotlar atrofini obodonlashtirish, koʻkalamzorlashtirish hamda sanitariya holatini yaxshilash boʻyicha keng koʻlamli bunyodkorlik ishlari olib borilmoqda.

Obodonlashtirish tadbirlari nafaqat hududlar qiyofasini yanada chiroyli va fayzli etishga, balki aholi uchun sogʻlom, ozoda va qulay yashash muhitini yaratishga xizmat qilmoqda. Tozalik va tartib-intizomni taʼminlash, daraxt va manzarali butalarni parvarishlash, sugʻorish tarmoqlarini tartibga keltirish, chiqindilarni oʻz vaqtida olib chiqish kabi ishlar izchil tashkil etilayotgani tumanning yanada obod va koʻrkam qiyofa kasb etishini taʼminlamoqda.

Mazkur tadbirlarda Amudaryo tumani Sanitariya-epidemiologik osoyishtalik va jamoat salomatligi boʻlimi jamoasi ham faol ishtirok etmoqda. Boʻlim xodimlari oʻzlariga biriktirilgan hududlarda hashar tadbirlarini uyushqoqlik bilan tashkil etib, bino atrofi va yondosh hududlarni tartibga keltirmoqdalar. Ariq va zovurlar loyqa hamda chiqindilardan tozalanib, begona oʻtlar oʻrib tashlanmoqda, hududlar obodonlashtirilib, ozoda va koʻrkam maskanga aylantirilmoqda. Bunday amaliy ishlar sanitariya holatini yaxshilash bilan birga, fuqarolar salomatligini mustahkamlash va ekologik muhitni asrashga ham xizmat qilmoqda.

Shuningdek, tuman Sport boʻlimi hamda Qipchoq davlat oʻrmon xoʻjaligi xodimlari ham umumxalq obodonlashtirish tadbirlarida faol qatnashmoqda. Ular hududlarni tozalash, yashil maydonlarni parvarishlash, daraxt koʻchatlarini ekish va mavjud koʻkalamzor hududlarni asrab-avaylash ishlariga munosib hissa qoʻshmoqdalar. Turli soha vakillarining hamjihatlikda olib borayotgan saʼy-harakatlari tumanda bunyodkorlik muhitini yanada mustahkamlab, aholining ekologik masʼuliyatini oshirishga xizmat qilmoqda.

Taʼkidlash joizki, bunday umumxalq hasharlari insonlarda ona tabiatga mehr-muhabbat, Vatanga daxldorlik va yurt ravnaqiga munosib hissa qoʻshish tuygʻularini yanada kuchaytiradi. Zero, ozoda va obod mahalla, pokiza koʻcha hamda yashil hududlar — sogʻlom turmush tarzi, qulay hayot va farovon kelajakning muhim omilidir.

Mustaqillik bayrami arafasida amalga oshirilayotgan bunyodkorlik ishlari Amudaryo tumanining yanada chiroy ochishiga, aholi kayfiyatining koʻtarilishiga va yurtimiz taraqqiyotiga munosib hissa boʻlib qoʻshilmoqda. “Dolzarb 40 kun” aktsiyasi doirasidagi ezgu tashabbuslar kelgusida ham izchil davom etib, tumanning har bir mahallasi, har bir koʻchasi va har bir maskani yanada obod, fayzli hamda yashash uchun qulay hududga aylanishiga xizmat qiladi.

Charos Arslonova, tuman hokimligining Axborot xizmati rahbari.