Амударё туманида ободонлаштириш ишлари жадаллик билан давом этмоқда

Ўзбекистон Республикаси давлат мустақиллигининг 35 йиллиги муносабати билан юртимиз бўйлаб “Долзарб 40 кун” умумхалқ акцияси давом этмоқда. Жорий йилнинг 28 июлидан 6 сентябрига қадар ўтказиладиган мазкур ташаббус доирасида ҳудудларни ободонлаштириш, санитария-тозалаш ишларини кучайтириш, атроф-муҳит мусаффолигини таъминлаш ҳамда аҳолининг экологик маданиятини юксалтиришга қаратилган кенг кўламли амалий тадбирлар изчил давом эттирилмоқда.

“Ягона Ватан, ягона халқ бўлиб, янги ҳаёт ва келажак яратамиз!” шиори остида ўтказилаётган ушбу эзгу ташаббуслар Амударё туманида ҳам қизғин паллага кирган. Туманнинг барча ҳудудларида кўчалар, маҳаллалар, жамоат масканлари, таълим муассасалари ва ташкилотлар атрофини ободонлаштириш, кўкаламзорлаштириш ҳамда санитария ҳолатини яхшилаш бўйича кенг кўламли бунёдкорлик ишлари олиб борилмоқда.

Ободонлаштириш тадбирлари нафақат ҳудудлар қиёфасини янада чиройли ва файзли этишга, балки аҳоли учун соғлом, озода ва қулай яшаш муҳитини яратишга хизмат қилмоқда. Тозалик ва тартиб-интизомни таъминлаш, дарахт ва манзарали буталарни парваришлаш, суғориш тармоқларини тартибга келтириш, чиқиндиларни ўз вақтида олиб чиқиш каби ишлар изчил ташкил этилаётгани туманнинг янада обод ва кўркам қиёфа касб этишини таъминламоқда.

Мазкур тадбирларда Амударё тумани Санитария-эпидемиологик осойишталик ва жамоат саломатлиги бўлими жамоаси ҳам фаол иштирок этмоқда. Бўлим ходимлари ўзларига бириктирилган ҳудудларда ҳашар тадбирларини уюшқоқлик билан ташкил этиб, бино атрофи ва ёндош ҳудудларни тартибга келтирмоқдалар. Ариқ ва зовурлар лойқа ҳамда чиқиндилардан тозаланиб, бегона ўтлар ўриб ташланмоқда, ҳудудлар ободонлаштирилиб, озода ва кўркам масканга айлантирилмоқда. Бундай амалий ишлар санитария ҳолатини яхшилаш билан бирга, фуқаролар саломатлигини мустаҳкамлаш ва экологик муҳитни асрашга ҳам хизмат қилмоқда.

Шунингдек, туман Спорт бўлими ҳамда Қипчоқ давлат ўрмон хўжалиги ходимлари ҳам умумхалқ ободонлаштириш тадбирларида фаол қатнашмоқда. Улар ҳудудларни тозалаш, яшил майдонларни парваришлаш, дарахт кўчатларини экиш ва мавжуд кўкаламзор ҳудудларни асраб-авайлаш ишларига муносиб ҳисса қўшмоқдалар. Турли соҳа вакилларининг ҳамжиҳатликда олиб бораётган саъй-ҳаракатлари туманда бунёдкорлик муҳитини янада мустаҳкамлаб, аҳолининг экологик масъулиятини оширишга хизмат қилмоқда.

Таъкидлаш жоизки, бундай умумхалқ ҳашарлари инсонларда она табиатга меҳр-муҳаббат, Ватанга дахлдорлик ва юрт равнақига муносиб ҳисса қўшиш туйғуларини янада кучайтиради. Зеро, озода ва обод маҳалла, покиза кўча ҳамда яшил ҳудудлар — соғлом турмуш тарзи, қулай ҳаёт ва фаровон келажакнинг муҳим омилидир.

Мустақиллик байрами арафасида амалга оширилаётган бунёдкорлик ишлари Амударё туманининг янада чирой очишига, аҳоли кайфиятининг кўтарилишига ва юртимиз тараққиётига муносиб ҳисса бўлиб қўшилмоқда. “Долзарб 40 кун” акцияси доирасидаги эзгу ташаббуслар келгусида ҳам изчил давом этиб, туманнинг ҳар бир маҳалласи, ҳар бир кўчаси ва ҳар бир маскани янада обод, файзли ҳамда яшаш учун қулай ҳудудга айланишига хизмат қилади.

Чарос Арслонова, туман ҳокимлигининг Ахборот хизмати раҳбари.