KUTUBXONA – HAQIQATAN HAM NURXONA

Sabr-toqatlilik xalqimizga xos xislat. Biz oila aʼzolarimiz bilan karantin qoidalariga rioya qilib, uydamiz, adabiy kitoblar oʻqib, televizorda berilgan koʻrsatuvlarni birgalikda muhokama qilamiz.

Yaxshi kuy va tarona, raqs kayfiyatimizni koʻtaradi, nevaralarimiz bilan kichik davra quramiz, ular raqsga tushib, qoʻshiq va sheʼrlar aytishadi. Har bir kunimizni mazmunli, qiziqarli oʻtkazamiz.

Joriy yil iyun oyidan boshlab tuman Axborot-kutubxona markaziga oilaviy aʼzo boʻldik. Bizni Axborot-kutubxona markazi direktori Dilmurod Oʻrozoqov kutib oldi va ishchi xodimlari bilan tanishtirdi. Nevaralarim Rustam, Suhrob, Guli Baxtiyorovalarni ham yetaklab, bu kutubxonaga olib borib, oʻzlari qiziqqan kitoblarni olib oʻqishga yoʻlladim.

Bizni kutubxona xodimlari xush chehra bilan kutib oldilar va kutubxonadagi adabiyotlar haqida tushuncha berdilar. Oʻzbek, rus, qoraqalpoq va boshqa millatlar adabiyotlari tizilgan javonlardan oʻqish uchun kitob tanladik. Axborot-kutubxona markazi direktori Dilmurod Oʻrozoqov va ishchi xodimlari Gulasal Qoʻchqorova, Rohatoy Ramonova, Maxsuda Bekasheva, Islom Matyoqubov, Quvonchbek Oʻrozimbetov, Sohiba Bozorboyeva, Intizor Yoʻldosheva, Gulruh Avezmetova va Iroda Saʼdullayevalarga oʻz minnatdorchiligimizni bildirdik.

Shu yerda oddiy bir haqiqatni aytgim keldi. Kutubxona uchun ajratilgan xonalar kam, kitoblar esa juda koʻp ekan, tuman Madaniyat boʻlimi mudiri Sh.Yusupov ushbu holatga alohida eʼtibor bersa va albatta, xonaga yozda shamollatgich oʻrnatsa, nur ustiga aʼlo nur boʻlar edi. Shunda markazga tashrif buyuruvchi kitobxonlar safi ancha oshgan boʻlardi.

Axborot-kutubxona markazi 2 ta xonada joylashgan. Lekin kitoblarning koʻpligidan kitobxonlarga mavjud vaziyat biroz qiyinchilik tugʻdiradi. 63 mingdan ziyod kitob jamgʻarmasiga ega markaz binosi ichkarisi oʻta dim, issiq. Noyob kitoblarni shu yerning oʻzida oʻqishning imkoni yoʻq. Kutubxona xodimlari esa juda ishchan, madaniyatli. Men tumanimizdan chiqqan yozuvchi Xushnud Yoqubjonovning kitoblarini soʻragan edim, darrov topib berishdi. Hatto kitoblarning maʼno-mazmuni haqida ham tushunchalar berishdi. Men hozirgi zamon oʻzbek adabiyoti namoyandalari qatorida tumanimizdan yetishib chiqqan yozuvchi Xushnud Yoqubjonovning ham kitoblari xalqimiz tomonidan sevilib oʻqilayotganidan faxrlandim.

Azizlar! Kutubxona – nafaqat bilimlar koni, balki nurxonadir. Men har bir yurtdoshimga, albatta, ushbu kitoblar makoniga – nurxonaga borishini, karantin sharoitida vaqtini mazmunli oʻtkazishini maslahat beraman.

Baxtiyor RAJABOV,

Boyovul mahallasi.