КУТУБХОНА – ҲАҚИҚАТАН ҲАМ НУРХОНА

Сабр-тоқатлилик халқимизга хос хислат. Биз оила аъзоларимиз билан карантин қоидаларига риоя қилиб, уйдамиз, адабий китоблар ўқиб, телевизорда берилган кўрсатувларни биргаликда муҳокама қиламиз.

Яхши куй ва тарона, рақс кайфиятимизни кўтаради, невараларимиз билан кичик давра қурамиз, улар рақсга тушиб, қўшиқ ва шеърлар айтишади. Ҳар бир кунимизни мазмунли, қизиқарли ўтказамиз.

Жорий йил июнь ойидан бошлаб туман Ахборот-кутубхона марказига оилавий аъзо бўлдик. Бизни Ахборот-кутубхона маркази директори Дилмурод Ўрозоқов кутиб олди ва ишчи ходимлари билан таништирди. Невараларим Рустам, Суҳроб, Гули Бахтиёроваларни ҳам етаклаб, бу кутубхонага олиб бориб, ўзлари қизиққан китобларни олиб ўқишга йўлладим.

Бизни кутубхона ходимлари хуш чеҳра билан кутиб олдилар ва кутубхонадаги адабиётлар ҳақида тушунча бердилар. Ўзбек, рус, қорақалпоқ ва бошқа миллатлар адабиётлари тизилган жавонлардан ўқиш учун китоб танладик. Ахборот-кутубхона маркази директори Дилмурод Ўрозоқов ва ишчи ходимлари Гуласал Қўчқорова, Роҳатой Рамонова, Махсуда Бекашева, Ислом Матёқубов, Қувончбек Ўрозимбетов, Соҳиба Бозорбоева, Интизор Йўлдошева, Гулруҳ Авезметова ва Ирода Саъдуллаеваларга ўз миннатдорчилигимизни билдирдик.

Шу ерда оддий бир ҳақиқатни айтгим келди. Кутубхона учун ажратилган хоналар кам, китоблар эса жуда кўп экан, туман Маданият бўлими мудири Ш.Юсупов ушбу ҳолатга алоҳида эътибор берса ва албатта, хонага ёзда шамоллатгич ўрнатса, нур устига аъло нур бўлар эди. Шунда марказга ташриф буюрувчи китобхонлар сафи анча ошган бўларди.

Ахборот-кутубхона маркази 2 та хонада жойлашган. Лекин китобларнинг кўплигидан китобхонларга мавжуд вазият бироз қийинчилик туғдиради. 63 мингдан зиёд китоб жамғармасига эга марказ биноси ичкариси ўта дим, иссиқ. Ноёб китобларни шу ернинг ўзида ўқишнинг имкони йўқ. Кутубхона ходимлари эса жуда ишчан, маданиятли. Мен туманимиздан чиққан ёзувчи Хушнуд Ёқубжоновнинг китобларини сўраган эдим, дарров топиб беришди. Ҳатто китобларнинг маъно-мазмуни ҳақида ҳам тушунчалар беришди. Мен ҳозирги замон ўзбек адабиёти намояндалари қаторида туманимиздан етишиб чиққан ёзувчи Хушнуд Ёқубжоновнинг ҳам китоблари халқимиз томонидан севилиб ўқилаётганидан фахрландим.

Азизлар! Кутубхона – нафақат билимлар кони, балки нурхонадир. Мен ҳар бир юртдошимга, албатта, ушбу китоблар маконига – нурхонага боришини, карантин шароитида вақтини мазмунли ўтказишини маслаҳат бераман.

Бахтиёр РАЖАБОВ,

Бойовул маҳалласи.