Oqilona foydalanilgan tomorqadan oilaga ham, yurtga ham rizq-baraka keladi

Yurt boshiga ish tushgan ayni sinovli kunlarda sabr-toqatli boʻlish kerakligi, insonlarda ertangi kunga umid, ishonch tuygʻularini yanada mustahkamlash, qolaversa, mamlakatimizda joriy qilinayotgan karantin tartibiga rioya qilish zaruriyligi mutasaddilar tomonidan aholiga keng tushuntirilmoqda.

Tumanimiz xalqi juda mehnatkash. Hozirgi karantin davrida uyda qolib, vaqtdan unumli foydalanayotgan, oʻz tomorqasida mehnat qilib, ertangi kunining gʻamini koʻrayotgan yurtdoshlarimiz ham talaygina. Qilichboylik Saparboy Tilovov ham karantin paytida uyda qolib, tomorqasini yoʻlga qoʻyib oldi. Uning tomorqasida, issiqxonasida ayni paytda hamma ekinlar unib chiqmoqda va barvaj oʻsmoqda.

  Shu oʻrinda aytish joizki, mamlakatimizda keyingi yillarda dehqon xoʻjaliklari va tomorqa yer uchastkalaridan samarali foydalanishni tashkil etish boʻyicha amalga oshirilgan islohotlar natijasida qishloq xoʻjaligi mahsulotlari ishlab chiqarish hajmi sezilarli darajada oshdi.

Mehnatkash xalqimiz bugun oʻzining tomorqasini ham daromad manbaiga aylantirmoqda. Ayni paytda xonadonlarda barpo etilgan issiqxonalarda turli sabzavot mahsulotlari, tsitrus mevalar yetishtirish, parranda va chorva parvarish qilish odatiy tusga kirdi. Oʻzbekiston Respublikasi Vazirlar Mahkamasining 2018-yil 18-martdagi “Dehqon xoʻjaliklari va tomorqa yer uchastkalaridan samarali foydalanishni tashkil etish chora-tadbirlari toʻgʻrisida”gi qarori bu boradagi ishlarni yangi bosqichga koʻtardi. Davlatimiz tomonidan tomorqa xoʻjaligini rivojlantirish, ularni qoʻllab-quvvatlashga eʼtibor kuchaytirilayotgani tufayli aksariyat xonadonlar oʻziga tegishli yer maydonlaridan unumli foydalanib, nafaqat oilasi daromadini oshirmoqda, balki bozor toʻkinligi va el-yurt farovonligiga katta hissa qoʻshmoqda.

Tomorqasi borning xazinasi bor deyishadi. Buning isbotini kichkina tomorqasida turli koʻkatlar, mevali daraxtlar etishtirayotgan, moʻʼjaz issiqxonalar tashkil qilib, farovon hayot kechirayotgan omilkor xonadonlar misolida koʻrish mumkin.
Saparboy Tilovovlar oilasi ham oʻz tomorqalarida mehnat qilib, tomorqasida mevalardan olma, uzum, nok, oʻrik, olcha va boshqalar, sabzavotlardan – kartoshka, sabzi, piyoz, bodring pomidor hamda koʻkatlar yetishtirishadi. Oʻzlaridan ortganini bozorga olib chiqib ham el farovonligiga hissa qoʻshishadi, ham oilasi uchun qoʻshimcha daromad topishadi. Oilaning barcha aʼzolari katta-yu kichik birdek bu ishga jalb qilingan.

Tomorqa — rizq-nasiba, moʻmay daromad manbai. Uning dasturxonimiz fayzu barakasi, aholi turmush farovonligi, yurt obodligini taʼminlashdagi oʻrnining esa qiyosi yoʻq. Hamma gap undan nechogʻli oqilona foydalana olishda.

Ch. Arslonova.