Оқилона фойдаланилган томорқадан оилага ҳам, юртга ҳам ризқ-барака келади

Юрт бошига иш тушган айни синовли кунларда сабр-тоқатли бўлиш кераклиги, инсонларда эртанги кунга умид, ишонч туйғуларини янада мустаҳкамлаш, қолаверса, мамлакатимизда жорий қилинаётган карантин тартибига риоя қилиш зарурийлиги мутасаддилар томонидан аҳолига кенг тушунтирилмоқда.

Туманимиз халқи жуда меҳнаткаш. Ҳозирги карантин даврида уйда қолиб, вақтдан унумли фойдаланаётган, ўз томорқасида меҳнат қилиб, эртанги кунининг ғамини кўраётган юртдошларимиз ҳам талайгина. Қиличбойлик Сапарбой Тиловов ҳам карантин пайтида уйда қолиб, томорқасини йўлга қўйиб олди. Унинг томорқасида, иссиқхонасида айни пайтда ҳамма экинлар униб чиқмоқда ва барваж ўсмоқда.

  Шу ўринда айтиш жоизки, мамлакатимизда кейинги йилларда деҳқон хўжаликлари ва томорқа ер участкаларидан самарали фойдаланишни ташкил этиш бўйича амалга оширилган ислоҳотлар натижасида қишлоқ хўжалиги маҳсулотлари ишлаб чиқариш ҳажми сезиларли даражада ошди.

Меҳнаткаш халқимиз бугун ўзининг томорқасини ҳам даромад манбаига айлантирмоқда. Aйни пайтда хонадонларда барпо этилган иссиқхоналарда турли сабзавот маҳсулотлари, цитрус мевалар етиштириш, парранда ва чорва парвариш қилиш одатий тусга кирди. Ўзбекистон Республикаси Вазирлар Маҳкамасининг 2018 йил 18 мартдаги “Деҳқон хўжаликлари ва томорқа ер участкаларидан самарали фойдаланишни ташкил этиш чора-тадбирлари тўғрисида”ги қарори бу борадаги ишларни янги босқичга кўтарди. Давлатимиз томонидан томорқа хўжалигини ривожлантириш, уларни қўллаб-қувватлашга эътибор кучайтирилаётгани туфайли аксарият хонадонлар ўзига тегишли ер майдонларидан унумли фойдаланиб, нафақат оиласи даромадини оширмоқда, балки бозор тўкинлиги ва эл-юрт фаровонлигига катта ҳисса қўшмоқда.

Томорқаси борнинг хазинаси бор дейишади. Бунинг исботини кичкина томорқасида турли кўкатлар, мевали дарахтлар этиштираётган, мўъжаз иссиқхоналар ташкил қилиб, фаровон ҳаёт кечираётган омилкор хонадонлар мисолида кўриш мумкин.
Сапарбой Тилововлар оиласи ҳам ўз томорқаларида меҳнат қилиб, томорқасида мевалардан олма, узум, нок, ўрик, олча ва бошқалар, сабзавотлардан – картошка, сабзи, пиёз, бодринг помидор ҳамда кўкатлар етиштиришади. Ўзларидан ортганини бозорга олиб чиқиб ҳам эл фаровонлигига ҳисса қўшишади, ҳам оиласи учун қўшимча даромад топишади. Оиланинг барча аъзолари катта-ю кичик бирдек бу ишга жалб қилинган.

Томорқа — ризқ-насиба, мўмай даромад манбаи. Унинг дастурхонимиз файзу баракаси, аҳоли турмуш фаровонлиги, юрт ободлигини таъминлашдаги ўрнининг эса қиёси йўқ. Ҳамма гап ундан нечоғли оқилона фойдалана олишда.

Ч. Арслонова.