NAVOIY IZDOShLARI NAVOIY ASARLARINI OʻRGANMOQDALAR

Umumtaʼlim maktablarida boʻlib oʻtayotgan Navoiyxonlik kechalari oʻquvchi-yoshlar qalbida Navoiy dahosiga cheksiz hurmat va ehtirom tuygʻularini uygʻotib, mumtoz adabiyotimizdan yanada katta bahra olishlariga imkoniyat yaratmoqda.

Ulugʻ shoir, buyuk davlat va jamoat arbobi Nizomiddin Mir Alisher Navoiy tavalludining 579-yilligiga bagʻishlangan maʼnaviy-maʼrifiy tadbirlar 64-sonli umumtaʼlim maktabining nafaqat yuqori sinflari, balki quyi sinf oʻquvchilari tomonidan ham tashkillashtirilayotgani eʼtiborga loyiq.

Maktabning 8-“V”sinf oʻquvchilari tomonidan oʻzbek tili va adabiyot fani oʻqituvchisi Hulkar Yarasheva rahbarligida “Biz Navoiy izdoshimiz” mavzusida adabiy-musiqiy kecha tashkil etildi. Unda oʻquvchilar Alisher Navoiy hayoti va ijodi haqida hikoya qiluvchi jonli lavhalar namoyish etishdi. Navoiy va Guli monologi oʻqilganida goʻyo hamma xayolan Navoiy zamonasiga qaytganday, qalblarni muhabbat va sadoqat tuygʻulari bezadi. Husayn Boyqaro va Navoiyning doʻstona munosabatlari, Farhod va Shirinning jahoniy muhabbati aks ettirilgan sahna koʻrinishlari, buyuk hukmdor Husayn Boyqaro bilan buyuk shoir Navoiyning oʻzaro suhbatlari asosidagi adabiy kompozitsiyalar barchada biri-biridan goʻzal taassurotlar uygʻotdi.

 Adabiy-musiqiy kechada oʻquvchi-yoshlar tomonidan ijro etilgan kuy-qoʻshiqlar, ajib ohanglarda yangragan Navoiy gʻazallari kechaga yanada fayz-tarovat bagʻishladi.
Shuningdek, maktabning 3-“A”sinf oʻquvchilari tomonidan boshlangʻich sinf oʻqituvchisi Mohira Safarboyeva rahbarligida tayyorlangan maʼnaviy-maʼrifiy tadbir ham Nizomiddin Mir Alisher Navoiy tavalludining 579-yilligiga bagʻishlandi. “Navoiy asarlarini oʻrganamiz” mavzusida oʻtkazilgan mazkur tadbirda Durdonaxon Baxtiyorova hamda Qudrat Bozorboyevlar boshlovchilik qildilar.

Shunisi eʼtiborga molikki, boshlangʻich sinf oʻquvchilari boʻlishlariga qaramay, 3-”A”sinf oʻquvchilari oʻzlarining Navoiy asarlarini oʻrganishga ishtiyoqi baland ekanliklarini namoyon etishdi. Mohira Safarboyeva rahbarligida ushbu sinf oʻquvchilari Navoiyning “Xamsa” asari haqidagi zarur maʼlumotlarga ega boʻlishganini asardan yodlagan parchalar, Alisher Navoiy asarlarida qoʻllangan hikmatli iboralar, shoir gʻazallari, ruboiy va tuyuqlarini yod aytib berish orqali koʻrsatib berishdi.

Bolajonlar yosh boʻlishlariga qaramay, Navoiy asarlarini sevib mutolaa qilishlarida, asar tilini tushunib, oʻzlashtirishlarida sinf rahbari Mohira Safarboyevaning xizmati katta. U oʻquvchilarni mazkur tadbirga tayyorlashda Navoiy asarlarining tili, mazmun-mohiyati  xususida oʻquvchilar bilan alohida shugʻullangani bois, bolalar shoir gʻazallari, muxammaslari, ruboiy va tuyuqlari xususida toʻliq maʼlumotga ega boʻldilar.

Boshlangʻich sinf oʻquvchilari tomonidan tashkil etilgan mazkur tadbir bolalarning ona Vatanga muhabbat, oʻzaro mehr-oqibat tuygʻulari tarannum etilgan kuy-qoʻshiqlari joʻrligida yanada fayzli oʻtdi.

Maktabda Alisher Navoiy tavalludi munosabati bilan oʻtkazilgan ushbu tadbirlar oʻquvchilarga juda manzur boʻldi.

R.YOʻLDOShEVA.