НАВОИЙ ИЗДОШЛАРИ НАВОИЙ АСАРЛАРИНИ ЎРГАНМОҚДАЛАР

Умумтаълим мактабларида бўлиб ўтаётган Навоийхонлик кечалари ўқувчи-ёшлар қалбида Навоий даҳосига чексиз ҳурмат ва эҳтиром туйғуларини уйғотиб, мумтоз адабиётимиздан янада катта баҳра олишларига имконият яратмоқда.

Улуғ шоир, буюк давлат ва жамоат арбоби Низомиддин Мир Алишер Навоий таваллудининг 579 йиллигига бағишланган маънавий-маърифий тадбирлар 64-сонли умумтаълим мактабининг нафақат юқори синфлари, балки қуйи синф ўқувчилари томонидан ҳам ташкиллаштирилаётгани эътиборга лойиқ.

Мактабнинг 8-“В”синф ўқувчилари томонидан ўзбек тили ва адабиёт фани ўқитувчиси Ҳулкар Ярашева раҳбарлигида “Биз Навоий издошимиз” мавзусида адабий-мусиқий кеча ташкил этилди. Унда ўқувчилар Алишер Навоий ҳаёти ва ижоди ҳақида ҳикоя қилувчи жонли лавҳалар намойиш этишди. Навоий ва Гули монологи ўқилганида гўё ҳамма хаёлан Навоий замонасига қайтгандай, қалбларни муҳаббат ва садоқат туйғулари безади. Ҳусайн Бойқаро ва Навоийнинг дўстона муносабатлари, Фарҳод ва Шириннинг жаҳоний муҳаббати акс эттирилган саҳна кўринишлари, буюк ҳукмдор Ҳусайн Бойқаро билан буюк шоир Навоийнинг ўзаро суҳбатлари асосидаги адабий композициялар барчада бири-биридан гўзал таассуротлар уйғотди.

 Адабий-мусиқий кечада ўқувчи-ёшлар томонидан ижро этилган куй-қўшиқлар, ажиб оҳангларда янграган Навоий ғазаллари кечага янада файз-тароват бағишлади.
Шунингдек, мактабнинг 3-“А”синф ўқувчилари томонидан бошланғич синф ўқитувчиси Моҳира Сафарбоева раҳбарлигида тайёрланган маънавий-маърифий тадбир ҳам Низомиддин Мир Алишер Навоий таваллудининг 579 йиллигига бағишланди. “Навоий асарларини ўрганамиз” мавзусида ўтказилган мазкур тадбирда Дурдонахон Бахтиёрова ҳамда Қудрат Бозорбоевлар бошловчилик қилдилар.

Шуниси эътиборга моликки, бошланғич синф ўқувчилари бўлишларига қарамай, 3-”А”синф ўқувчилари ўзларининг Навоий асарларини ўрганишга иштиёқи баланд эканликларини намоён этишди. Моҳира Сафарбоева раҳбарлигида ушбу синф ўқувчилари Навоийнинг “Хамса” асари ҳақидаги зарур маълумотларга эга бўлишганини асардан ёдлаган парчалар, Алишер Навоий асарларида қўлланган ҳикматли иборалар, шоир ғазаллари, рубоий ва туюқларини ёд айтиб бериш орқали кўрсатиб беришди.

Болажонлар ёш бўлишларига қарамай, Навоий асарларини севиб мутолаа қилишларида, асар тилини тушуниб, ўзлаштиришларида синф раҳбари Моҳира Сафарбоеванинг хизмати катта. У ўқувчиларни мазкур тадбирга тайёрлашда Навоий асарларининг тили, мазмун-моҳияти  хусусида ўқувчилар билан алоҳида шуғуллангани боис, болалар шоир ғазаллари, мухаммаслари, рубоий ва туюқлари хусусида тўлиқ маълумотга эга бўлдилар.

Бошланғич синф ўқувчилари томонидан ташкил этилган мазкур тадбир болаларнинг она Ватанга муҳаббат, ўзаро меҳр-оқибат туйғулари тараннум этилган куй-қўшиқлари жўрлигида янада файзли ўтди.

Мактабда Алишер Навоий таваллуди муносабати билан ўтказилган ушбу тадбирлар ўқувчиларга жуда манзур бўлди.

Р.ЙЎЛДОШЕВА.