TENGLIK, OShKORALIK, OChIQLIK VA ShAFFOFLIK TAʼMINLANADI

Jahon hamjamiyatida oʻz mavqeini egallab, barcha sohalarda taraqqiyotning yangi bosqichiga qadam qoʻygan, dunyoda tom maʼnoda yangi qiyofada namoyon boʻlayotgan mustaqil Oʻzbekistonda muhim siyosiy voqelik – bugun, yaʼni 22-dekabr kuni vakillik organlariga saylovlar oʻtkazilmoqda.

Tumanimizda ham bu muhim siyosiy jarayonga puxta hozirlik koʻrildi. Oʻzbekiston Respublikasi Oliy Majlisi Qonunchilik palatasi deputatligiga saylov oʻtkazuvchi 4-Amudaryo okrug saylov komissiyasi tomonidan saylov kompaniyasiga start berilgan 2019-yil 20-sentyabr sanasidan boshlab ushbu muhim siyosiy jarayonni muvaffaqiyatli tashkil etish va saylov kunini demokratik tarzda, oshkoralik ruhida oʻtkazish maqsadida yangi tahrirdagi saylov Kodeksida belgilangan yangi, ilgʻor amaliyotni joriy etgan holda ish olib borildi. Avvalo, Oʻzbekiston Respublikasi Saylov Kodeksining 10-, 22-moddalariga asosan Oʻzbekiston Respublikasi Oliy Majlisi Qonunchilik palatasiga saylov oʻtkazuvchi 4-Amudaryo okrug saylov komissiyasi qaroriga muvofiq Amudaryo va Beruniy tumanlari hokimlarining taqdimnomasi asosida 4-Amudaryo saylov okrugi hududida 42 ta Yagona saylov uchastkalari tuzilib, barcha saylov uchastkalarining saylovchilarni qamrov hududlari belgilandi.

Saylov uchastkalarining markazlari asosan taʼlim muassasalari, ovul va mahalla fuqarolar yigʻinlari binolarida joyshlashtirilib, barcha Yagona saylov uchastkalarining toʻliq elektr energiyasi, isitish tizimlari, zamonaviy axborot texnologiyalari bilan taʼminishiga alohida eʼtibor berildi. Shuningdek, saylov uchastkalari Oʻzbekiston va Qoraqalpogʻiston Respublikasi davlat ramzlari, saylov qonunchiligiga oid huquqiy-normativ hujjatlar, adabiyotlar, matbuot nashrlari, saylov targʻibotiga oid rangli bannerlar, siyosiy partiyalardan koʻrsatilgan nomzodlar haqidagi maʼlumotlar hamda 5 ta siyosiy partiyaning saylovoldi harakat dasturlari bilan bezatildi.

Saylov kompaniyasining muvaffaqiyatli oʻtishini taʼminlash maqsadida  okrug hududidagi barcha uchastka saylov komissiyalari raislari, oʻrinbosarlari, kotib va aʼzolari uchun oʻquv-seminar mashgʻulotlari tashkil etilib, saylov qonunchiligidagi yangiliklar bilan oʻz vaqtida tanishtirildi. 5 ta siyosiy partiyadan koʻrsatilgan nomzodlarning saylovchilar bilan uchrashuvlarini tashkil etishda xolislik, oshkoralik va shaffoflik tamoyiliga amal qilindi. Saylovga tayyorgarlik jarayonida partiyalar tomonidan harakat dasturlari va nomzodlar targʻibotini amalga oshirishlari uchun teng sharoitlar yaratib berildi.

Yangi tahrirdagi Saylov Kodeksiga asosan ijtimoiy xavfi katta boʻlmagan va uncha ogʻir boʻlmagan jinoyat sodir etgani uchun ozodlikdan mahrum etish joylarida boʻlib turgan yoki vaqtincha hibsda saqlanayotgan shaxslarda ham saylov huquqi vujudga keldi. Tumanimizda ham vaqtincha yaʼni sudgacha hibsda saqlanayotgan shaxslarning ovoz berishlari uchun sharoit yaratilib, koʻchma saylov qutilari tashkil etildi.

4-Amudaryo okrug saylov komissiyasi tomonidan saylovlarni tashkil etish, xalqimizning saylov huquqini toʻlaqonli roʻyobga chiqarish boʻyicha olib borilgan ishlar koʻlami shuni koʻrsatadiki, joriy yilgi saylovlar mutlaqo yangi siyosiy sharoitda, partiyalararo kuchli raqobat asosida, gʻoyalar va dasturlar kurashiga boy  vaziyatda oʻtmoqda.

Buni saylovda shod-u xurramlik bilan ishtirok etayotgan saylovchilarning koʻtarinki kayfiyatlarida, saylovga oid huquqiy kafolatlarning amalda taʼminlanayotganida ham yaqqol koʻrish mumkin.

Robiya YOʻLDOShEVA.