Ijtimoiy himoya — insonparvarlik, mehr-muruvvat, tenglik va adolat masalasidir

Ijtimoiy himoya ayrim odamlar nazarida nogironligi boʻlgan shaxslar, kam taʼminlangan oilalar, keksa yoshdagi odamlarning hayoti bilan bogʻliqdek koʻrinadi. Aslida esa ijtimoiy himoya taʼlim, sogʻliqni saqlash, shuningdek, ijtimoiy hayotning turli jabhalariga kirib bormoqda.

Xususan, nogironligi boʻlgan bolalar inklyuziv taʼlimga jalb qilinib, sogʻliqni saqlashda nogironligi boʻlgan, muhtoj shaxslarga protez moslamalari va reabilitatsiya vositalarini navbat kutmasdan vaucher asosida, 20 foiz ragʻbatlantirish sifatida taqdim etish, yakka-yolgʻiz yashovchi, shuningdek, oʻzgalar parvarishiga muhtoj fuqarolarga kompleks individual xizmatlar koʻrsatishga alohida eʼtibor qaratilmoqda.

Bu borada Mangʻit shahrining Chordara mahalla fuqarolar yigʻinida aholining ijtimoiy himoyaga muhtoj qatlamini qoʻllab-quvvatlash, ularga ijtimoiy yordam va xizmatlar koʻrsatish ishlari namunali yoʻlga qoʻyilgan.

Ayni paytda mahalla hududidagi 666 ta xonadon tarkibida 1012 ta oila mavjud boʻlib, bu oilalarda 3650 nafar aholi istiqomat qiladi. Mahalla xonadonlari obod, har bir oila tinch-totuv yashashini taʼminlash maqsadida, aholi hayoti va turmush sharoitlari “Inson” ijtimoiy xizmat koʻrsatish markazi Amudaryo tuman boʻlimining mahallada faoliyat olib boruvchi ijtimoiy xodimi tomonidan “Mahalla yettiligi” aʼzolari bilan hamkorlikda individual yondashuv asosida oʻrganilib, ijtimoiy himoyaga muhtoj fuqarolar roʻyxati shakllantirildi.

Oʻrganishlar natijasida 148 nafar nogironligi boʻlgan shaxslar, 73 nafar kam taʼminlangan oilalar mavjudligi aniqlanib, alohida tizimga olindi.

Koʻrilgan chora-tadbirlar natijasida protez moslamalari va reabilitatsiya vositalariga muhtoj 17 nafar nogironligi boʻlgan shaxslar vaucher asosida protez moslamalari bilan taʼminlandi. Oʻzgalar parvarishiga muhtoj keksalar va nogironligi boʻlgan shaxslar bilan ishlashish boʻyicha koʻrilgan choralar natijasida ulardan 13 nafariga qarovchi ijtimoiy xizmat assistenti biriktirildi. Kambagʻallik reyestriga kiritilgan muhtoj oilalarga homiylar biriktirilib, oilalar har tomonlama qoʻllab-quvvatlandi.

Mamlakatimiz ijtimoiy siyosatida ustuvorlik kasb etgan “Inson qadri uchun!” tamoyili bugungi kunda xalqimiz hayotida oʻz ifodasini topmoqda. “Temir daftar”, “Ayollar daftari”, “Yoshlar daftari” kabi tashabbuslar aholining turli qatlamlarini ijtimoiy qoʻllab-quvvatlashga qaratilgani bu boradagi ishlarni yuksak sifat darajasiga koʻtardi. Ayniqsa, 2021-yildan boshlab ijtimoiy xizmatlar yagona reyestri joriy etilgani aholining ijtimoiy holatini chuqur tahlil qilish va aniq yordam koʻrsatish imkonini bermoqda.

Chordara mahallasi hududida istiqomat qiluvchi 148 nafar nogironligi bor boʻlgan fuqarolar hamda 73 ta kam taʼminlangan oilalarni nafaqat ijtimoiy qoʻllab-quvvatlash, balki turli bayram sanalari munosabati bilan ularni yoʻqlab borish, bayramona sovgʻalar ulashish orqali maʼnaviy ragʻbatlantirib, xush kayfiyat bagʻishlashga ham alohida eʼtibor qaratiladi. Chunki ijtimoiy himoya faqat davlat tomonidan beriladigan nafaqa yoki moddiy yordam koʻrsatishdangina iborat emas. Agar har bir yurtdosh, har bir rahbar, qoʻni-qoʻshni atrofidagi ehtiyojmand insonlarga mehr-oqibat, muruvvatli boʻlsalar — bu har qanday moddiyatdan koʻra kuchliroq taʼsirga ega boʻladi.

Jamiyatda ijtimoiy adolat, teng imkoniyatlar, mehr va eʼtibor muhitini yaratish har birimizning zimmamizdagi fuqarolik burchimizdir. Zero, ijtimoiy himoya — bu faqat tizim emas, balki yurak amri bilan qilinadigan haqiqiy insonparvarlik, mehr-muruvvat, tenglik va adolat masalasidir.

Gulbahor XIDIROVA, Chordara MFY kompleks ijtimoiy xizmat koʻrsatish xodimi.