Amudaryoda iqtisodiy taraqqiyot va shaffoflik sari dadil qadam

Bugungi kunda mamlakatimiz miqyosida iqtisodiyotning barqaror oʻsishini taʼminlash, yashirin iqtisodiyotni qisqartirish va sohada shaffoflikni kuchaytirish davlat siyosatining ustuvor yoʻnalishlaridan biri boʻlib qolmoqda. Amudaryo tumanida ham mazkur yoʻnalishda izchil ishlar olib borilmoqda.

Amudaryo tumani hokimligining majlislar zalida tumanni ijtimoiy-iqtisodiy rivojlantirish dasturlari ijrosini taʼminlash hamda yashirin iqtisodiyotni qisqartirish chora-tadbirlarining tanqidiy muhokamasiga bagʻishlangan yigʻilish boʻlib oʻtdi.

Tadbirda Qoraqalpogʻiston Respublikasi Joʻqorgʻi Kengesining Sanoat, qurilish, transport va aloqa masalalari qoʻmitasi raisi Islam Sdiqov, tuman hokimi Sobir Xoʻjametov, tuman hokimining birinchi oʻrinbosari Faxriddin Yusupov, tegishli tashkilot va muassasalar rahbarlari, tijorat banklari vakillari, shuningdek hokim yordamchilari ishtirok etdilar.

Yigʻilishda tumanning iqtisodiy koʻrsatkichlari, sarmoya jalb etish holati, tadbirkorlikni rivojlantirish, yangi ish oʻrinlarini yaratish, soliqqa tortish tizimidagi shaffoflik masalalari keng tahlil qilindi.

Islam Sdiqov yigʻilishda soʻzga chiqib, yashirin iqtisodiyotning milliy iqtisodiy taraqqiyotga salbiy taʼsiri, uni bartaraf etish borasida amalga oshirilayotgan islohotlar, zamonaviy nazorat mexanizmlarini joriy etish zarurati haqida soʻz yuritdi. U shuningdek, joylarda bu boradagi ishlarni tizimli ravishda kuchaytirish, har bir rahbar masalaga masʼuliyat bilan yondashishi lozimligini taʼkidladi.

Mamlakatimizda yashirin iqtisodiyot darajasini pasaytirish, tadbirkorlik faoliyatini yuritish uchun, shu jumladan tartibga solish va maʼmuriy yukni kamaytirish hisobiga teng raqobat sharoitlarini yaratish, soliq qonunchiligi talablariga rioya qilish tartib-taomillarini avtomatlashtirish va uning tartibini soddalashtirish borasida samarali islohotlar amalga oshirilmoqda. Davlatimiz rahbarining “Yashirin iqtisodiyotni qisqartirish va soliq organlari faoliyati samaradorligini oshirish boʻyicha tashkiliy chora-tadbirlar toʻgʻrisida”gi farmoni bu borada muhim dasturulamal boʻlib xizmat qilmoqda.

Yigʻilishda tuman hokimi Sobir Xoʻjametov tumanda yashirin iqtisodiyotni aniqlash va oldini olish boʻyicha amalga oshirilayotgan ishlar, erishilgan natijalar hamda mavjud muammolar haqida batafsil toʻxtaldi.

Taʼkidlanganidek, iqtisodiy jarayonlarda shaffoflikni taʼminlash, soliqqa tortish tizimini soddalashtirish, mahalliy ishlab chiqaruvchilarni qoʻllab-quvvatlash orqali norasmiy faoliyatni qonuniylashtirish boʻyicha kompleks choralar amalga oshirilmoqda.

Muhokama jarayonida soha rahbarlari tomonidan oʻz tarmoqlari boʻyicha muammolar bayon qilinib, ularni hal qilish yuzasidan takliflar bildirildi. Har bir masʼulga natijadorlik, tahliliy yondashuv va aniq rejalarga ega boʻlish talabi qoʻyildi.

Yigʻilish yakunida aniqlangan kamchiliklarni bartaraf etish, iqtisodiy islohotlarning amaliy samarasini oshirish, aholi farovonligini yuksaltirishga qaratilgan topshiriq va tavsiyalar belgilab olindi.

Amudaryo tumanida iqtisodiy taraqqiyot va shaffoflik sari dadil qadamlar tashlanmoqda. Zero, bugun amalga oshirilayotgan islohotlar ertangi kunning barqaror iqtisodiy poydevorini yaratish, halol mehnat va qonun ustuvorligi tamoyillarini mustahkamlashga xizmat qiladi.

Charos Arslonova, tuman hokimligining Axborot xizmati rahbari.