SOLIQ TIZIMIDAGI ShAFFOFLIK — AHOLI FAROVONLIGINING ASOSI

Zamonaviy dunyoda rivojlangan davlatlarning taraqqiyot omillari soliq siyosati bilan bogʻliq. Eng muhim sohalarni, xalq turmush tarzi bilan bogʻliq yoʻnalishlarni moliyalashtirish bevosita soliq tizimi orqali amalga oshiriladi. Amudaryo tumani Soliq inspektsiyasi xodimlari ham bu borada samarali faoliyat olib borishmoqda. Inspektsiyaga 2025-yil uchun byudjet tushumlariga 51,6 mlrd soʻm undirish rejasi belgilangan boʻlib, 2025-yilning 1-dekabr holatiga 53,6 mlrd soʻm byudjetga undirildi va bu boradagi reja 11 oydayoq 103,8 foizga bajarildi.

Prezidentimiz tashabbusi bilan mahallani joylarda muammolarni hal qiladigan institutga aylantirish maqsadida birgalikda ishlaydigan “Mahalla yettiligi” faoliyatini yoʻlga qoʻyish boʻyicha berilgan topshiriq va vazifalar ijrosini taʼminlash maqsadida, Amudaryo tumani boʻyicha 49 ta mahallaga 15 nafar soliq xodimlari biriktirilgan.

Mahallabay ishlash tizimi orqali birgina 2025-yilning yanvar-iyun oylarida 714 ta tadbirkorlik subʼektlarida tovar aylanmasi 12,5 mlrd soʻmga oshirilishi hisobiga byudjetga qoʻshimcha 1,1 mlrd soʻm aylanmadan olinadigan soliq hisoblandi. 843 ta tadbirkorlik subʼektlarida 1 ming 721 ta norasmiy ishchi qonuniylashtirildi hamda byudjetga qoʻshimcha 302 mln soʻm daromad soligʻi hisoblanishiga erishildi.

Soliq inspektsiyasi xodimlari va “Mahalla yettiligi” aʼzolarining oʻzaro hamkorlikda olib borgan xatlov natijalariga koʻra, noqonuniy faoliyat yuritayotgan 512 nafar tadbirkor yangidan roʻyxatdan oʻtkazildi. “Mahalla yettiligi” bilan birgalikda 13 ming 223 nafar fuqaro oʻzini-oʻzi band qilish tamoyili asosida doimiy daromad manbaiga ega boʻlishlari uchun sharoitlar yaratildi.

Oʻtgan yil boshidan aholini kichik biznesga jalb etish va ularning bandligini taʼminlash boʻyicha amalga oshirilgan tadbirlar davomida roʻyxatdan oʻtmasdan faoliyat koʻrsatayotgan fuqarolarni aniqlash hisobiga 61 nafar yuridik shaxs, 451 nafar yakka tadbirkor, 13 ming 223 nafar oʻzini-oʻzi band qilganlar va 22 ta dehqon xoʻjaliklari roʻyxatga olinib, faoliyatini vaqtincha toʻxtatgan 269 nafar yakka tadbirkorlarning faoliyati tiklanishi taʼminlandi. Shuningdek, sanoat va ishlab chiqarish korxonalarini xatlovdan oʻtkazish davomida qoʻshimcha ravishda 85 nafar ishchi faoliyat olib borayotgani aniqlanib, qayta hisobotlar qabul qilindi.

Amudaryo tumani Soliq inspektsiyasi xodimlari tomonidan amalga oshirilayotgan bu kabi chora-tadbirlar aholi farovonligini taʼminlash, iqtisodiyotni yanada rivojlantirish, xalqimiz salomatligini mustahkamlash, oʻsib kelayotgan yosh avlod taʼlim-tarbiyasi bilan bogʻliq keng koʻlamli bunyodkorlik yoʻnalishlaridagi ishlarni moliyalashtirishda shaffoflikni taʼminlash imkonini bermoqda.

Tuman Soliq inspektsiyasi jamoasi 2025-yilga belgilangan barcha reja-koʻrsatkichlarni ortigʻi bilan bajarib, 2026-yilda ham soliq toʻlovchilarga sifatli xizmatlar koʻrsatish, mahalliy, Respublika va mamlakat byudjetini toʻldirishga munosib hissa qoʻshishni maqsad qilishgan. Zero, soliqlar – mamlakat iqtisodiyotining tayanchi, davlat byudjeti barqarorligini taʼminlovchi, ijtimoiy sohalar rivoji hamda infratuzilmani yaxshilashga xizmat qiladigan muhim moliyaviy manbadir. Ularning oʻz vaqtida va adolatli undirilishi esa iqtisodiy taraqqiyot, aholi farovonligi hamda jamiyatda ijtimoiy adolatni qaror toptirishda hal qiluvchi ahamiyat kasb etadi.