ТЕНГЛИК, ОШКОРАЛИК, ОЧИҚЛИК ВА ШАФФОФЛИК ТАЪМИНЛАНАДИ

Жаҳон ҳамжамиятида ўз мавқеини эгаллаб, барча соҳаларда тараққиётнинг янги босқичига қадам қўйган, дунёда том маънода янги қиёфада намоён бўлаётган мустақил Ўзбекистонда муҳим сиёсий воқелик – бугун, яъни 22 декабрь куни вакиллик органларига сайловлар ўтказилмоқда.

Туманимизда ҳам бу муҳим сиёсий жараёнга пухта ҳозирлик кўрилди. Ўзбекистон Республикаси Олий Мажлиси Қонунчилик палатаси депутатлигига сайлов ўтказувчи 4-Амударё округ сайлов комиссияси томонидан сайлов компаниясига старт берилган 2019 йил 20 сентябрь санасидан бошлаб ушбу муҳим сиёсий жараённи муваффақиятли ташкил этиш ва сайлов кунини демократик тарзда, ошкоралик руҳида ўтказиш мақсадида янги таҳрирдаги сайлов Кодексида белгиланган янги, илғор амалиётни жорий этган ҳолда иш олиб борилди. Аввало, Ўзбекистон Республикаси Сайлов Кодексининг 10-, 22-моддаларига асосан Ўзбекистон Республикаси Олий Мажлиси Қонунчилик палатасига сайлов ўтказувчи 4-Амударё округ сайлов комиссияси қарорига мувофиқ Амударё ва Беруний туманлари ҳокимларининг тақдимномаси асосида 4-Амударё сайлов округи ҳудудида 42 та Ягона сайлов участкалари тузилиб, барча сайлов участкаларининг сайловчиларни қамров ҳудудлари белгиланди.

Сайлов участкаларининг марказлари асосан таълим муассасалари, овул ва маҳалла фуқаролар йиғинлари биноларида жойшлаштирилиб, барча Ягона сайлов участкаларининг тўлиқ электр энергияси, иситиш тизимлари, замонавий ахборот технологиялари билан таъминишига алоҳида эътибор берилди. Шунингдек, сайлов участкалари Ўзбекистон ва Қорақалпоғистон Республикаси давлат рамзлари, сайлов қонунчилигига оид ҳуқуқий-норматив ҳужжатлар, адабиётлар, матбуот нашрлари, сайлов тарғиботига оид рангли баннерлар, сиёсий партиялардан кўрсатилган номзодлар ҳақидаги маълумотлар ҳамда 5 та сиёсий партиянинг сайловолди ҳаракат дастурлари билан безатилди.

Сайлов компаниясининг муваффақиятли ўтишини таъминлаш мақсадида  округ ҳудудидаги барча участка сайлов комиссиялари раислари, ўринбосарлари, котиб ва аъзолари учун ўқув-семинар машғулотлари ташкил этилиб, сайлов қонунчилигидаги янгиликлар билан ўз вақтида таништирилди. 5 та сиёсий партиядан кўрсатилган номзодларнинг сайловчилар билан учрашувларини ташкил этишда холислик, ошкоралик ва шаффофлик тамойилига амал қилинди. Сайловга тайёргарлик жараёнида партиялар томонидан ҳаракат дастурлари ва номзодлар тарғиботини амалга оширишлари учун тенг шароитлар яратиб берилди.

Янги таҳрирдаги Сайлов Кодексига асосан ижтимоий хавфи катта бўлмаган ва унча оғир бўлмаган жиноят содир этгани учун озодликдан маҳрум этиш жойларида бўлиб турган ёки вақтинча ҳибсда сақланаётган шахсларда ҳам сайлов ҳуқуқи вужудга келди. Туманимизда ҳам вақтинча яъни судгача ҳибсда сақланаётган шахсларнинг овоз беришлари учун шароит яратилиб, кўчма сайлов қутилари ташкил этилди.

4-Амударё округ сайлов комиссияси томонидан сайловларни ташкил этиш, халқимизнинг сайлов ҳуқуқини тўлақонли рўёбга чиқариш бўйича олиб борилган ишлар кўлами шуни кўрсатадики, жорий йилги сайловлар мутлақо янги сиёсий шароитда, партиялараро кучли рақобат асосида, ғоялар ва дастурлар курашига бой  вазиятда ўтмоқда.

Буни сайловда шод-у хуррамлик билан иштирок этаётган сайловчиларнинг кўтаринки кайфиятларида, сайловга оид ҳуқуқий кафолатларнинг амалда таъминланаётганида ҳам яққол кўриш мумкин.

Робия ЙЎЛДОШЕВА.