Muruvvat koʻrsatish – bagʻrikenglik timsoli

Yiqilganni suyash, bemorlar, yetim-yesirlar, koʻngli yarim kishilarga beminnat yordam koʻrsatish kabi xalqimizning azaliy ezgu qadriyatlari asrlar osha hayotimizni bezab kelmoqda. Istiqlol yillarida ushbu anʼana shakl va mazmun jihatidan boyib, yanada sayqallanib bormoqda.

Tumanimizda ham manzilli ijtimoiy himoyani hamda yolgʻiz keksalarga va imkoniyati cheklangan kishilarga amaliy yordam koʻrsatishni yanada kuchaytirishga qaratilgan chora-tadbirlar izchil davom ettirilayotir.

Jumladan, "Mahalla" xayriya jamoat fondi tuman boʻlinmasi tomonidan 2013-yil Navroʻz - umumxalq bayrami arafasida tumanimizning eng chekka qishloqlaridagi mahallalarda istiqomat qilayotgan 265 nafar kam taʼminlangan oilaga 12 turdagi umumiy miqdori 47.9 mln. soʻmlik oziq-ovqat mahsulotlari tarqatildi. 3500 dan ortiq yosh oilaga 110.8 mln. soʻmlik sovgʻalar berildi. 4 ta kam taʼminlangan oilalarning har biriga bir boshdan jami 5.2 mln. soʻmlik qoramol hadya etildi.

Shuningdek moddiy madadga muhtoj oilalar farzandlarining nikoh toʻylari oʻtkazildi. Ularga maishiy sharoitlarini yaxshilash maqsadida 3 mln. soʻmlik uy-roʻzgʻor buyumlari sovgʻa qilindi.

1 nafar nogiron 1.6 mln. soʻmlik kompyuter jamlanmasi bilan taʼminlandi.

Oliy taʼlim muassasalarida taʼlim olayotgan 1 nafar talabaning oʻquv shartnoma mablagʻini toʻlashda amaliy yordam koʻrsatildi.

«Mahalla muruvvati» masʼuliyati cheklangan jamiyati bilan hamkorlikda 1.8 mln. soʻmlik 11 turdagi kiyim-kechaklar kam taʼminlangan oilalar farzandlariga yetkazib berildi.

«Mahalla» xayriya jamoat fondi tuman boʻlinmasiga ariza bilan murojaat qilgan 39 nafar fuqaroning ahvoli oʻrganilib, ularga har tomonlama moddiy va maʼnaviy yordam koʻrsatildi. Eng chekka qishloqlarda yashovchi 3 nafar nogironga aravacha olib berildi. Tabiiy ofatlardan zarar koʻrgan 2 ta oilaga moddiy koʻmak uyushtirildi.

Yozgi taʼtil davrida 300 nafar kam taʼminlangan oilalar farzandlarining oromgohlarda bepul hordiq olishlari tashkil etilib, bu ishlarga 4.8 mln. soʻm mablagʻ sarflandi.

4 ta kam taʼminlangan yakka-yolgʻiz fuqaroning uylarini taʼmirlash ishlariga 2 mln. soʻm miqdorda mablagʻ sarflandi.

Xalqaro bolalarni himoya qilish kuni munosabati bilan 47 ta oila farzandlariga 1 mln. soʻmlik kiyim-kechaklar ulashildi.

Ehtiyojmand kishilarni yoʻqlash, ularga yordam berish xalqimizga xos bagʻrikenglik, mehr-oqibatlilikning yorqin koʻrinishidir. Istiqlol yillarida mazkur qadriyat yangicha shakl va mazmun kasb etib, sayqal topib borayotgani quvonarli holdir.

Yurtimizni obod qilib, aholini ijtimoiy himoyalash orqali farovon turmushini taʼminlash – bizning bosh vazifamiz. Ana shu masʼuliyatni chuqur his qilgan holda faoliyat yuritib, «Obod turmush yili»da kam taʼminlangan oilalar roʻyxatini shakllantirdik. Bayramlar, turli ommaviy tadbirlar munosabati bilan tumandagi yordamga muhtoj 78 ta oilaning uylari homiylar koʻmagida taʼmirlanib, 3115 ta kam taʼminlangan oilaga 12 turdagi oziq-ovqat mahsulotlari, 2645 oilaga 46.4 mln. soʻmlik uch kanalli radio bepul tarqatildi.

Tumanimizdagi 16 ta ovul fuqarolar yigʻini va uning hududidagi 19 ta mahallalarning faollari tashabbusi bilan fermer xoʻjaliklari homiyligida 61 ta kam taʼminlangan, boquvchisini yoʻqotgan oilaga bir boshdan qoramol olib berildi. Vatan himoyachilari kuni, Navroʻz bayrami hamda Xotira va qadrlash kuni munosabati bilan Ikkinchi jahon urushi qatnashchilari va front ortida mehnat qilgan faxriylar, 100 yoshdan oshgan keksalar, sobiq baynalmilalchi jangchilar, nogiron va yolgʻiz qariyalar holidan xabar olindi. Ularga bir martalik pul mukofot, hassa, qoʻltiqtayoq, eshitish moslamalari va boshqa sovgʻalar topshirildi.

Oʻqishda yuqori natijalarni qoʻlga kiritgan 30 nafar oʻquvchi va talabalar uchun respublikamizning tarixiy va diqqatga sazovor shaharlariga sayohat tashkil etildi.

Bugungi kunda fuqarolarning oʻzini-oʻzi boshqarish organlari yurt ravnaqi yoʻlida olib borilayotgan barcha ezgu ishlarda faol ishtirok etayotir. Buning uchun mahallalarning moddiy-texnik bazasini mustahkamlash, yigʻin faollarining samarali mehnat qilishlari uchun zarur shart-sharoit yaratishni davrning oʻzi taqozo etmoqda.

«Mahalla» xayriya jamoat fondi tuman boʻlinmasi tomonidan ham ushbu yoʻnalishda qator ishlar amalga oshirildi.

May-iyul oylarida Navroʻz - umumxalq xayriya hasharidan tushgan mablagʻlar hisobidan 10 ta fuqarolar yigʻiniga 10 ta kompyuter jamlamasi, 12 dona stol, 33 dona stul, 8 dona kitob javoni olib berildi.

Sentyabr-dekabr oylarida Mustaqillik bayrami munosabati bilan oʻtkazilgan hashardan tushgan mablagʻlar hisobidan 10 ta mahalla 10 ta kompyuter jamlanmasi, 15 dona stol, 30 dona stul, 3 dona kitob javoni bilan taʼminlandi. Bunga jami 58 mln. soʻm mablagʻ sarflandi.

A.BOLTABOYeV,

"Mahalla” xayriya jamoat fondi tuman boʻlinmasi masʼul kotibi.