Ramazon — mehr-muruvvat va saxovat oyi: Amudaryoda xayriya ishlari izchil davom etmoqda
Oʻzbekiston Respublikasi Prezidentining Ramazon oyini munosib kutib olish va yuqori saviyada oʻtkazishga doir qarori yurtimizning barcha hududlarida boʻlgani kabi Amudaryo tumanida ham ezgu amallar, xayriya tadbirlari va saxovat ishlarining yanada keng quloch yoyishiga zamin yaratmoqda. Mazkur qarorda ilgari surilgan “Ramazon – mehr-muruvvat, ahillik va shukronalik oyi” degan ulugʻ gʻoya asosida aholining ehtiyojmand qatlamlarini qoʻllab-quvvatlash, kam taʼminlangan va ijtimoiy himoyaga muhtoj oilalar holidan xabar olish, ularga maʼnaviy va amaliy koʻmak koʻrsatishga alohida eʼtibor qaratilmoqda.
Xususan, “Yusuf eshon bobo” jomeʼ masjidi imom-xatibi Abdurahmon Matsapoyev va noib imom Sodiq Toʻrayev tomonidan mahallalarda istiqomat qilayotgan ehtiyojmand, boquvchisini yoʻqotgan va kam taʼminlangan oilalar holidan xabar olinib, ularga mehr-eʼtibor koʻrsatilmoqda.
Masʼullar Choykoʻl ovulida yashovchi, boquvchisini yoʻqotgan Qunduzoy Oʻrazboyeva xonadonida boʻlishib, u yerda iftorlik dasturxoni yozdilar. Bu xayrli tadbir orqali bir xonadonga nafaqat moddiy, balki katta maʼnaviy dalda ham berildi.
Shuningdek, Oʻrtaqalʼa ovulida yashovchi kam taʼminlangan oila vakili Zarifboy Davletov xonadonidan ham xabar olinib, bu yerda ham iftorlik dasturxoni tashkil etildi. Ushbu xayrli amallar aholi orasida saxovat va insoniylik fazilatlarini yanada kuchaytirishga xizmat qilmoqda. Zero, Ramazon oyida qilingan har bir yaxshilik, har bir savobli ish insonlar qalbida shukronalik tuygʻusini mustahkamlashga hissa qoʻshadi.
Xayriya ishlari faqat iftorlik dasturxonlari bilan cheklanib qolmayapti. Mutasaddilar Choykoʻl ovulida yashovchi Qunduzoy Oʻrazboyeva xonadonida ham boʻlishib, homiylarni jalb qilgan holda uning taʼmirtalab uyida qurilish va taʼmirlash ishlarini amalga oshirish jarayoni bilan tanishdilar. Imom-xatib, noib imom va mahalla imomi ushbu xonadonda olib borilayotgan qurilish ishlarini koʻzdan kechirib, ezgu tashabbusning amaliy ijrosiga alohida eʼtibor qaratdilar. Bu esa Prezident qarorida belgilangan ehtiyojmand insonlarni har tomonlama qoʻllab-quvvatlash vazifasi joylarda samarali amalga oshirilayotganining yorqin namunasidir.
Xayriya tadbirlari doirasida Doʻstlik mahallasida yashovchi kam taʼminlangan oila vakili, 2-guruh nogironi Qoʻchqor Xolmuradov xonadonida ham iftorlik dasturxoni yozildi. Mazkur xayriya tadbiri nogironligi boʻlgan fuqarolarga eʼtibor va gʻamxoʻrlik koʻrsatish, ularning hayotiga yengillik va koʻngliga taskin bagʻishlash yoʻlidagi muhim qadamlardan biri boʻldi.
Amudaryo tumanida amalga oshirilayotgan bu kabi xayrli ishlar yurtimizda inson qadrini yuksaltirish, ehtiyojmand insonlarni qoʻllab-quvvatlash borasida olib borilayotgan davlat siyosati joylarda izchil va samarali ijro etilayotganini koʻrsatadi. Ayniqsa, muqaddas Ramazon oyida diniy-maʼrifiy soha vakillari, mahalla faollari, homiylar va jamoatchilikning birlashib, savobli ishlarda yelkadosh boʻlayotgani jamiyatimizdagi ahillik va hamjihatlik muhitini yanada mustahkamlamoqda.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
