Ulkan xirmonga munosib hissamiz

Amudaryo tumani iqtisodiy salohiyati bagʻoyat kuchli, yaratuvchanlik, bunyodkorlik imkoniyatlari nihoyatda keng tuman sifatida respublikamizda taniqlidir. Ayniqsa amudaryolik usta paxtakorlar har yili zalvorli "oq oltin” xirmonini yaratishlari bilan koʻpchilikni hayratga solib kelmoqda. Qisqa muddatda, yaʼni, sentyabr oyi ichidayoq paxta tayyorlash boʻyicha yillik shartnomaviy rejani ortigʻi bilan bajarish hazilakam gap emas. Bu albatta amudaryolik paxtakorlarning benihoya ishchanligi, mehnatsevarligi, oʻz kasbining mohir ustalari, fidoyilari boʻlganligi tufayli qoʻlga kiritilayotgan zafarli yutuqlar, ulkan muvaffaqiyatlardir.

Yana mening amudaryoliklarga qoyil qoladiganim ularning yuksak odamiyligi, nihoyatda oliyjanobligi va mehmondoʻstligi, gʻoyat bagʻrikengligidir. Buni tumanning  qaysi xonadoniga, qaysi goʻshasiga bormang, dildan chuqur his qilasiz.

Mana soʻnggi oʻn uch yildan buyon amudaryoliklar bilan bizning Ajiniyoz nomidagi NDPI professor-oʻqituvchilar va talabalar jamoasi oʻzaro hamkorlik qilib kelmoqda. Hamkorlik qamrovi keng boʻlib taʼlim-tarbiya sohasidagi tajriba almashuvlar taʼlim jarayonlaridagi yangi pedagogik texnologiyalar, taʼlim jarayonlarida zamonaviy  axborot telekommunikatsiya texnologiyalari yangiliklarini, yutuqlarni tatbiq etish borasidagi pedagogik uslubiy tajribalar olib borish, qoʻllanish izchilligini, muntazamligini va davomiyligini taʼminlash taʼlim-tarbiya sohasidagi hamkorligimizning asosini va mazmun-mohiyatini tashkil etadi. Bunga yorqin misol sifatida Mangʻit shahrida joylashgan bizning homiyligimizdagi 3-sonli Amudaryo akademik litseyning oʻqituvchi pedagoglar va oʻquvchilar jamoasi bilan bizning yaqin hamkorligimizni koʻrsatishimiz mumkin. Mazkur akademik litsey intellektual salohiyatining yildan-yilga bosqichma-bosqich  oshib borayotganligi,  taʼlim-tarbiya borasida boy tajribalar toʻplanayotganligi va soha boʻyicha quvonarli yutuqlar qoʻlga kiritilayotganligi mana shu hamkorliklarimizning eng yaxshi samaralari, eng ulkan muvaffaqiyatlarimizdir. Mana shunday samara, mana shunday muvaffaqiyatlar natijasida oʻquvchilar kelgusida bilimdon va malakali kadrlar boʻlib maydonga chiqadi. Bunday kadrlar elimizning yanada yuksak taraqqiy etishi uchun, yanada gullab yashnashi uchun juda zarurdir.

Endi hamkorlikning amaliy oʻzaro yordam jihatlariga toʻxtaladigan boʻlsak, oliy taʼlim dargohimizdagi talabalar – navqiron yoshlar juda katta bunyodkor jismoniy kuch hisoblandi. Talabalar bizda besh ming nafarga yaqin boʻlib, ularning toʻrt ming nafardan ortigʻi ayni kunda amudaryolik paxtakorlar bilan yonma-yon turib paxta yigʻim-terim ishlarida yaqindan yordam berishmoqda. Ularning shu kunga qadar tergan "oq oltin” durdonalari 5 ming tonnadan oshib ketdi. Bu bilan talabalarimiz va professor-oʻqituvchilarimiz amudaryolik paxtakorlar erishgan bugungi ulkan mehnat gʻalabalariga oʻzlarining munosib hissalarini qoʻshdilar.

Talabalarimiz tumanda faoliyat koʻrsatayotgan 261 ta fermer xoʻjaliklarining deyarli barchasidagi yigʻim-terim ishlarida faol qatnashmoqdalar. Ayniqsa institutimizning fizika-matematika, tabiatshunoslik, oʻzbek tili va adabiyoti, boshlangʻich taʼlim, tarix fakultetlari professor-oʻqituvchilari hamda talabalari paxta yigʻim-terimida peshqadamlik koʻrsatib, terim surʼatining oshirilishiga oʻzlarning munosib hissalarini qoʻshmoqdalar. Mavjud 9 ta fakultet ichida va fakultetlararo oʻzaro musobaqalar tashkil etganligimiz ham oʻzining yaxshi samarasini berib, "oq oltin” xirmonlarining kun sayin yuksalishini taʼminlamoqda. 20-sentyabr kuni, dastlabki oʻn kunlik yakuni boʻyicha "Toʻlqin” ovulidagi Rufat Ahmedov boshqarayotgan "Ahmad goʻja” fermer xoʻjaligi paxtazorlarida mavjud 9 ta fakultetning eng ilgʻor terimchi talabalari va professor-oʻqituvchilari kun boʻyi oʻzaro musobaqalashib, eng peshqadam epchil terimchi talabalar va professor oʻqituvchilar aniqlandi. Musobaqa natijasiga koʻra professor-oʻqituvchilar orasida intitutning botanika kafedrasi oʻqituvchisi Karimboy Eshchonov 168 kilogramm paxta terib faxrli 1-oʻrinni egallab gʻolib boʻldi va qimmatbaho sovgʻalar bilan mukofotlandi.

Shunday qilib, paxta yigʻim-terimining ayni dolzarb davrida professor-oʻqituvchilarimiz va talabalarimiz amudaryoliklarning navbatdagi yuksak marrasi – 43 ming tonnalik sarbaland "oq oltin” xirmonini bunyod etishda yaqindan yordam berish uchun har bir soat, terim surʼatiga baraka kiritmoqdalar.

Fursatdan foydalanib, barcha paxtakorlarimizni dastlabki yuksak xirmon va 1-oktyabr – oʻqituvchi va murabbiylar kuni – umumxalq bayrami bilan qizgʻin tabriklab, ularga sihat-salomatlik va mashaqqatli ishlarida muvaffaqiyatlar tilayman.

Quvondiq Qodirov,