VATAN VA ISTIQLOL KUYChISI

Qadim yurtga qaytsin qadim navolarim,

Qumlar bosib, qurimasin daryolarim.

Alpomishga alla aytgan momolarim,

Ruhini shod etay desang, xalq boʻl, elim!

Oʻz sheʼrlarida insonlarni birlashishga, xalq boʻlishga, samimiylikka chorlagan shoir Muhammad Yusuf agar hayot boʻlganlarida bu yil 64 bahorni qarshilagan, oilasi, farzandlari, oʻgʻil-qiz-u nabiralari ardogʻida hayot gashtini surayotgan boʻlardi.

El suygan va elini suygan shoir Muhammad Yusuf 1954-yil 26-aprelda Andijon viloyatining Marhamat tumani, Qovunchi qishlogʻida tavallud topdi. U yoshligidanoq sheʼriyatga, adabiyotga mehri boʻlakcha boʻlib voyaga etdi. Otasi Yusuf ota va onasi Enaxon aya ikki oʻgʻil va uch qizining ichida oʻgʻli Muhammadni boshqacha suyib-erkalardi. Bunga sabab uning xayolparastligi va kitobga oʻchligida edi. Shoirning adabiyotga, sheʼriyatga boʻlgan havasi, mehri uygʻonishida Marhamatda Otin oyi deb nom taratgan buvisi Tursunxon enaning xizmati katta boʻldi.

Muhammad Yusuf maktabni tugatganidan soʻng, Reshetov nomidagi Respublika rus tili va adabiyoti institutida tahsil oldi. Institutni tamomlab, 1978-1980-yillarda harbiy xizmatda boʻldi. Shundan soʻng, shoirning ijodiy faoliyati boshlandi. U Respublika kitobxonlar jamiyatida muharrir, Gʻafur Gʻulom nomidagi adabiyot va sanʼat nashriyotida muharrir, “Oʻzbekiston ovozi” gazetasida muharrir, Oʻzbekiston yozuvchilari uyushmasida adabiy maslahatchi, “Navroʻz” xayriya jamgʻarmasida tashkiliy ishlar va xatlar boʻlimi mudiri lavozimida ishladi. Shuningdek, Oʻzbekiston Respublikasi Oliy Majlisi deputati sifatida faoliyat olib bordi.

Uning “Tanish teraklar”, “Iltijo”, “Uyqudagi qiz”, “Halima enam allalari”, “Bevafo koʻp ekan”, “Seni osmonimga olib ketaman”, “Erka kiyik”, “Ulugʻimsan Vatanim”, “Biz baxtli boʻlamiz” kabi sheʼriy kitoblari nashrdan chiqdi.

Muhammad Yusuf adabiyotimiz va xalqimizga qilgan fidoyi mehnatlari uchun 1996-yilda “Doʻstlik” ordeni, 1998-yilda «Oʻzbekiston Xalq shoiri» faxriy unvoni bilan taqdirlandi.

Xalqimiz sevib, ardoqlagan shoir Muhammad Yusuf 2001-yil 30-iyulda Qoraqalpogʻiston Respublikasining Ellikqalʼa tumanida ijodiy safar paytida yurak hurujidan vafot etdi.

Oʻzbekning sodda oʻgʻli Muhammad Yusuf juda qisqa umr koʻrdi. Lekin shu qisqa hayoti davomida barhayot sheʼrlar yozdi. Uning har bir sheʼri har kuni ming-ming muxlislari bilan yangidan tugʻiladi. Kamtarin shoir samimiy sheʼrlari bilan oʻzi ardoqlagan xalq orasida barhayot yashaydi.

Marhabo YOʻLdosheva, 30-sonli maktab oʻqituvchisi.