“Vatanparvarlar” harbiy-sport musobaqasining respublika bosqichi oʻtkazildi

Qoraqalpogʻiston Respublikasida yoshlarni vatanparvarlik ruhida tarbiyalash, ularning harbiy-amaliy koʻnikmalarini rivojlantirish, jismoniy va maʼnaviy barkamolligini oshirishga qaratilgan “Vatanparvarlar” harbiy-sport musobaqasining respublika bosqichi yuqori saviyada oʻtkazildi. Mudofaa vaziri kubogi uchun tashkil etilgan mazkur nufuzli bellashuvda umumtaʼlim maktablarining eng faol va iqtidorli oʻquvchilari oʻz bilim, mahorat va jasoratini namoyon etdi.

Musobaqada tuman bosqichlarida faxrli birinchi oʻrinni egallagan 17 ta jamoa ishtirok etdi. Ular umumtaʼlim maktablarining 10–11-sinf oʻquvchilaridan iborat “Vatan tayanchi” otryadi aʼzolaridir. Yoshlar 7 ta jamoaviy va 3 ta yakka tartibdagi, jami 10 ta murakkab hamda masʼuliyatli shart asosida oʻzaro bellashdi. Har bir shart ishtirokchilardan nafaqat jismoniy chidam va chaqqonlikni, balki tezkor fikrlash, jamoaviy hamjihatlik va yurtga sadoqat kabi muhim fazilatlarni ham talab qilishi bilan ahamiyatli boʻldi.

Bellashuvlar davomida saf qoʻshigʻini ijro etish, arqon tortish, turnikda tortinish, press mashqlari, harbiy estafeta va oʻq otish boʻyicha sinovlar tashkil etildi. Bu shartlar yoshlarning jismoniy tayyorgarligi, intizomi va matonatini sinash bilan birga, ularda harbiy muhitga xos masʼuliyat va irodani ham shakllantirdi. Shu bilan birga, “Temur tuzuklari bilimdoni” sharti orqali ishtirokchilar milliy tarix, harbiy meros va ajdodlar jasoratiga oid bilimlarini sinovdan oʻtkazdilar.

Musobaqaning yana bir muhim jihati shundaki, unda yoshlarning amaliy tayyorgarligiga ham alohida eʼtibor qaratildi. Xususan, birinchi tez tibbiy yordam koʻrsatish, AK-74 qurolini sochish va yigʻish kabi sinovlar ishtirokchilarning nazariy bilimi amaliyot bilan uygʻun ekanini koʻrsatdi. Zamonaviy tafakkur va innovatsion yondashuvni aks ettirgan robototexnika koʻrgazmasi esa musobaqaga alohida ruh bagʻishlab, yosh avlodning texnologiyalarga boʻlgan qiziqishi va salohiyatini yaqqol namoyon qildi.

Bellashuvlar jarayonida har bir jamoa oʻzining jipsligi, qatʼiyati va vatanparvarlik tuygʻusini koʻrsatib, gʻalaba sari intilishini namoyon etdi. Maydonda hukm surgan sogʻlom raqobat, shijoat va joʻshqin kayfiyat yoshlarning qalbida yurtga sadoqat, xalq va Vatan oldidagi masʼuliyat hissini yanada mustahkamladi.

Tadbir yakunida gʻoliblar va faol ishtirok etgan jamoalar Shimoli-gʻarbiy harbiy okrug qoʻmondoni, Yoshlar ittifoqining Qoraqalpogʻiston Respublikasi Kengashi, Yoshlar ishlari agentligi hamda hududiy “Vatanparvar” tashkiloti tomonidan munosib taqdirlandi. Eng yuqori natijani qayd etib, faxrli birinchi oʻrinni qoʻlga kiritgan jamoaga qoʻmondon kubogi topshirildi va ular Mudofaa vazirligi bosqichida ishtirok etish huquqini qoʻlga kiritdi.

Mazkur musobaqa yoshlarni harbiy-vatanparvarlik ruhida tarbiyalash, ularni jismonan baquvvat, maʼnan yetuk va yurt taqdiriga daxldor avlod sifatida voyaga yetkazish yoʻlida muhim ahamiyat kasb etdi. Zero, Vatan kelajagi uni sevuvchi, himoya qilishga tayyor va bilimli yoshlar qoʻlidadir. Bu kabi musobaqalar esa Yangi Oʻzbekistonning ishonchli tayanchi boʻlgan vatanparvar yoshlarni tarbiyalashda muhim oʻrin tutadi.