FAYZLI XONADON

Yurtboshimiz tashabbusi bilan joriy yilning "Obod turmush” yili deb eʼlon qilinishi munosabati bilan tumanimiz qishloqlari, barcha mahallalarimizda ham uy oldi tomorqa yerlarining unumdorligi oshirilib, xonadonlar obodligi uchun xizmat qilmoqda.

Xususan, tumanning "Bosuv” mahallasi hududida yashovchi Oʻgʻiljon momo Rahimovalar oilasi ana shunday halol mehnatlar evaziga fayzga ega boʻlgan ibratli xonadonlardan biridir. Farzand tarbiyasiga nihoyatda eʼtiborli boʻlib yondoshgan Oʻgʻiljon momo turmush oʻrtogʻi rahmatli Qozoq bobo bilan birgalikda 5 ta oʻgʻil va 5 ta  qizni voyaga yetkazdi. Ularni mehnatsevar, oʻz ishiga puxta, birovdan yordamini ayamaydigan qilib katta qildi.

Hozir ularning katta oʻgʻli Fayzulla Buyuk ipak yoʻli qurilishida mehnat qilmoqda. Saʼdulla tadbirkor, Zarifboy quruvchi, Muzaffar dehqonchilik bilan shugʻullanadi, kichik oʻgʻli Rashid Toshkent  Tibbiyot oliygohi Nukus filialida prorektor, rafiqasi ham shu filial oʻqituvchisi. Qizlarining biri oʻqituvchi, yana biri shifokor boʻlib faoliyat koʻrsatmoqda. Ularning oilasida har kim ishdan boʻsh vaqtlarida erta bahordan to qishgacha tomorqa yerida koʻpgina poliz ekinlarini yetishtirib, oilaning moddiy ahvolini taʼminlabgina qoʻymasdan, mahalliy aholi dasturxoni toʻkinligiga ham hissa qoʻshmoqdalar. Bundan tashqari, parrandachilik bilan  ham shugʻullanishadi. Ushbu tomorqaga kirsangiz, goʻyo  qushdek yengil his qilasiz oʻzingizni. Boisi, toʻrt tomoni bogʻ-rogʻ, mevali daraxtlar, poliz ekinlaridan iborat tomorqadan toza havo-dala nafasi ufuradi.

Tomorqasida asosan kartoshka, pomidor, karam, bodring, piyoz kabi poliz mahsulotlari yetishtiriladi.

Mevali daraxtlardan esa oʻrik judayam koʻp. Oʻrikning har xil navlari mavjud boʻlib, mevalari moʻl.

Xonadon sohiblari oʻzlaridan ortgan meva-poliz mahsulotlarini bozorga sotuvga chiqarib, daromadlari evaziga har oʻgʻil oʻziga hovli solib, mashina, uy-joyga ega boʻlishgan.

Oʻgʻillarini, qizlarini uy-joyli qilib, ayni kunda haqiqiy obod turmush egasi sifatida el-yurtda obroʻ-eʼtiborga ega Oʻgʻiljon momo keksaydim, deb qoʻl qovushtirib oʻtirmaydi. Har ishda farzandlariga maslahatgoʻy, koʻmakdosh. Oilada oʻziga loyiq ishlarni qilib ketaveradi.

- Hayot - harakat, degani. Tirik jon qarab oʻtirmasligi kerak. Bolalarimga ozgina koʻmagim tegsa ham harna, - deydi Oʻgʻiljon momo kulib. 75 yoshdan oshgan hamon tetik va bardam momoga bolalaringizning rohatini koʻrib yanada uzoq yashang, deya tilak bildirdik.

Aziza MADRAHIMOVA,

Mangʻit iqtisodiyot kasb-hunar kolleji talabasi.