ФАЙЗЛИ ХОНАДОН
Юртбошимиз ташаббуси билан жорий йилнинг "Обод турмуш” йили деб эълон қилиниши муносабати билан туманимиз қишлоқлари, барча маҳаллаларимизда ҳам уй олди томорқа ерларининг унумдорлиги оширилиб, хонадонлар ободлиги учун хизмат қилмоқда.
Хусусан, туманнинг "Босув” маҳалласи ҳудудида яшовчи Ўғилжон момо Раҳимовалар оиласи ана шундай ҳалол меҳнатлар эвазига файзга эга бўлган ибратли хонадонлардан биридир. Фарзанд тарбиясига ниҳоятда эътиборли бўлиб ёндошган Ўғилжон момо турмуш ўртоғи раҳматли Қозоқ бобо билан биргаликда 5 та ўғил ва 5 та қизни вояга етказди. Уларни меҳнатсевар, ўз ишига пухта, бировдан ёрдамини аямайдиган қилиб катта қилди.
Ҳозир уларнинг катта ўғли Файзулла Буюк ипак йўли қурилишида меҳнат қилмоқда. Саъдулла тадбиркор, Зарифбой қурувчи, Музаффар деҳқончилик билан шуғулланади, кичик ўғли Рашид Тошкент Тиббиёт олийгоҳи Нукус филиалида проректор, рафиқаси ҳам шу филиал ўқитувчиси. Қизларининг бири ўқитувчи, яна бири шифокор бўлиб фаолият кўрсатмоқда. Уларнинг оиласида ҳар ким ишдан бўш вақтларида эрта баҳордан то қишгача томорқа ерида кўпгина полиз экинларини етиштириб, оиланинг моддий аҳволини таъминлабгина қўймасдан, маҳаллий аҳоли дастурхони тўкинлигига ҳам ҳисса қўшмоқдалар. Бундан ташқари, паррандачилик билан ҳам шуғулланишади. Ушбу томорқага кирсангиз, гўё қушдек енгил ҳис қиласиз ўзингизни. Боиси, тўрт томони боғ-роғ, мевали дарахтлар, полиз экинларидан иборат томорқадан тоза ҳаво-дала нафаси уфуради.
Томорқасида асосан картошка, помидор, карам, бодринг, пиёз каби полиз маҳсулотлари етиштирилади.
Мевали дарахтлардан эса ўрик жудаям кўп. Ўрикнинг ҳар хил навлари мавжуд бўлиб, мевалари мўл.
Хонадон соҳиблари ўзларидан ортган мева-полиз маҳсулотларини бозорга сотувга чиқариб, даромадлари эвазига ҳар ўғил ўзига ҳовли солиб, машина, уй-жойга эга бўлишган.
Ўғилларини, қизларини уй-жойли қилиб, айни кунда ҳақиқий обод турмуш эгаси сифатида эл-юртда обрў-эътиборга эга Ўғилжон момо кексайдим, деб қўл қовуштириб ўтирмайди. Ҳар ишда фарзандларига маслаҳатгўй, кўмакдош. Оилада ўзига лойиқ ишларни қилиб кетаверади.
- Ҳаёт - ҳаракат, дегани. Тирик жон қараб ўтирмаслиги керак. Болаларимга озгина кўмагим тегса ҳам ҳарна, - дейди Ўғилжон момо кулиб. 75 ёшдан ошган ҳамон тетик ва бардам момога болаларингизнинг роҳатини кўриб янада узоқ яшанг, дея тилак билдирдик.
Азиза МАДРАҲИМОВА,
Манғит иқтисодиёт касб-ҳунар коллежи талабаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
